ⴰⵣⴰⵍ ⴰⵎⵣⵉⵣⵣⵉⵍ ⵏ ⵉⵎⵔⵡⴰⵙⵏ ⵢⵉⵡⴹ 989,7 ⵎⵍⵢⴰⵕ ⴷⵔⵀⵎ ⴳ ⵜⵉⴳⵉⵔⴰ ⵏ ⵎⴰⵕⵚ 2022 (ⵍⵉⴱⵉⵔⴰⵙⵢⵓⵏ)

ⵉⵏⵏⴰ ⵍⴱⴰⵏⴽ ⵏ ⵍⵎⵖⵔⵉⴱ ⵉⵙ ⵢⵉⵡⴹ ⴰⵣⴰⵍ ⵏ ⵉⵎⵔⵡⴰⵙⵏ ⵏ ⵍⴱⴰⵏⴽ 989,7 ⵎⵍⵢⴰⵕ ⴷⵔⵀⵎ ⴳ ⵜⵉⴳⵉⵔⴰ ⵏ ⵎⴰⵕⵚ 2022, ⵙ ⵢⵉⵊⴳⵉⵍ ⴰⵙⴳⵯⵙⴰⵏ ⴰⵙⵖⵍ ⵏⵏⵙ 4,1 %, ⵉⵙⴼⴰⵡ ⵍⴱⴰⵏⴽ ⴰⵢⴰⵏⵏ ⴳ ⵜⴼⵍⵡⵉⵜ ⵏ ⵜⴰⵔⵏⴰ ⵉⵜⵜⵢⴰⴳⴰⵍⵏ ⵙ “ ⵉⵎⵔⵡⴰⵙⵏ ⴷ ⵜⵖⵍⴰⴼⵉⵏ ⵏ ⵍⴱⴰⵏⴽ” ⵏ ⵡⴰⵢⵢⵓⵔ ⵏ ⵎⴰⵕⵚ, ⵉⵎⵔⵡⴰⵙⵏ ⵉⵜⵜⵓⴼⴽⴰⵏ ⵉ ⵉⵎⵙⵏⵓⵔⴰⵢⵏ ⴰⵔⵓⵥⵕⵉⴼⵏ ⴰⵊⴳⵓⵍⵏ ⵙ 847,6 ⵎⵍⵢⴰⵕ ⴷⵔⵀⵎ (+ 2,9 %) ⴷ ⵡⵉⵍⵍⵉ ⵉⵜⵜⵓⴼⴽⴰⵏ ⵉ ⵉⵎⵙⵏⵓⵔⴰⵢⵏ ⵓⵥⵕⵉⴼⵏ ⵙ 142,1 ⵎⵍⵢⴰⵕ ⴷⵔⵀⵎ ⵙ ⵢⵉⵊⴳⵉⵍ ⵏ 11,9%. ⵉⵙⵙⵎⵜⵔ ⵓⵙⴰⴳⵎ ⴰ ⵏⵉⵜ ⵙ ⵜⵔⵏⵉ ⵜⴰⵙⴳⵯⵙⴰⵏⵜ ⵙ ⵓⵙⵖⵍ ⵏ 4,7% ⴳ ⵉⵎⵔⵡⴰⵙⵏ ⵉⵜⵜⵓⴼⴽⴰⵏ ⵉ ⵜⵎⵙⵙⵏⴰⵜⴰⵢ ⵜⴰⵔⵓⵥⵕⵉⴼⵉⵏ ⵜⵓⵙⵍⵉⴳⵉⵏ (409,7 ⵎⵍⵢⴰⵕ ⴷⵔⵀⵎ) ⵢⵓⵎⴰⵏ ⵉⵊⴳⵉⵍⵏ ⵙ ⵓⵙⵖⵍ ⵏ 8,1% ⴳ ⵉⵙⵡⵀⵏⵏ ⵏ ⵓⵙⴱⴰⵢⵏⵓ, ⴷ ⵙ 2,7% ⵉ ⵉⵎⵔⵡⴰⵙⵏ ⵏ ⵓⵎⴰⵡⴰ, ⵉⵎⴽⵉⵏⵏⴰ ⴳⴳⵣⵏ ⵉⵎⵔⵡⴰⵙⵏ ⵏ ⵜⵓⵚⴽⵉⵡⵉⵏ ⵙ ⵓⵙⵖⵍ ⵏ 3,3%. ⴳ ⵜⵙⴳⴰ ⵢⴰⴹⵏ, ⵉⵙⴱⵏⵏⴷ ⵍⴱⴰⵏⴽ ⵏ ⵍⵎⵖⵔⵉⴱ ⵉⵙ ⵉⵙⴱⵏⵏⴱ ⵓⵔⵣⵣⵓ ⵏⵏⵙ ⵏ ⵜⵎⵙⵓⵜⵍⵜ ⴳ ⵉⵎⵉⵔ ⴰⵎⵣⵡⴰⵔⵓ ⵏ ⵓⵙⴳⴳⵯⴰⵙ ⵏ 2022, 91% ⵏ ⵜⵎⵙⵙⵏⵜⴰⵢ ⵜⵉⵎⴳⵓⵔⴰⵏⵉⵏ ⵜⵜⵉⵏⵉⵏⵜ ⵉⵙ ⵉⴳⴰ ⵉⵙⵉⴷⴼ ⵙ ⴰⵙⵉⵥⵕⴼ “ⵓⵏⵣⵉⵍ”, ⴷ 9% ⵜⴻⵜⵜⵉⵏⵉ ⵉⵙ “ⵉⵎⵔⴰⵢ” ⵙ ⵡⴰⵜⵉⴳ ⵏ ⵓⵙⴼⵍⵙ ⵉⵡⵔⵏ.

ⵜⴰⴷⵉⵡⴰⵏⵜ : ⵜⵉⵏⵓⴷⴰⴼ ⵣⵔⵉⵏⵜ 111 ⵎⵍⵢⴰⵕ ⴷⵔⵀⵎ ⴳ ⵓⵙⴳⴳⵯⴰⵙ ⵏ 2021 (ⵓⵊⵓⵔⴷⵡⵉ ⵍⵓⵎⴰⵔⵓⴽ)

ⵡⴰⵅⵅⴰ ⵉⵙⵓⵍ ⵓⴱⴰⵢⵢⵓⵕ ⴽⵓⴼⵉⴷ-19 ⴷ ⵉⵙⴽⵔⴰⴷ ⴷ ⵉⴽⴽⴰⵏ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ, ⵉⵡⴹⵏⵜ ⵜⵏⵓⴷⴰⴼ ⵏ ⵜⴷⵉⵡⴰⵏⵜ 111.2 ⵎⵍⵢⴰⵕ ⴷⵔⵀⵎ ⴳ ⵓⵙⴳⴳⵯⴰⵙ ⵏ 2021, ⵣⵎⵎⴻⵎⵏⵜ ⵉⵊⴳⵉⵍ ⵙ ⵓⵙⵖⵍ ⵏ 22% ⴳ ⵓⵙⴳⴳⵯⴰⵙ ⵏ 2020, ⴰⵢⴰ ⴳ ⵓⵎⵙⴰⵙⴰ ⵏ ⵓⵢⵍⵍⵉ ⵙ ⵜⴱⵔⵔⵃ ⵜⵎⵀⵍⴰ ⵏ ⵜⴷⵉⵡⴰⵏⵜ ⴷ ⵉⵔⴳⴰⵢⵏ ⴰⵔⵓⵙⵔⵉⴷⵏ. ⴳ ⵓⵢⵏⵏⴰ ⵉⵥⵍⵉⵏ ⵙ ⵜⵏⵓⴷⴰⴼ ⵏ ⵜⵎⵙⴰⵙⵜⵍⵜ ⵜⴰⵎⴰⵜⴰⵢⵜ ⵏ ⵓⵡⴰⵏⴽ, ⵣⵔⵉⵏⵜ ⵜⵎⴳⴳⴰ, ⵉⵙⵏⵉⵎⴰⵍⵏ ⵏ ⵓⵙⵍⴳⵏ ⵏ ⵓⵥⵕⴼ 2021 ⵙ 14% (+12.9 ⵎⵍⵢⴰⵕ ⴷⵔⵀⵎ). ⴳ ⵓⵙⴳⴳⵯⴰⵙ ⴰ ⵏⵉⵜ, ⵜⴳⵏⵙⴻⵙ ⵜⵢⵓⵙⵉ ⵖⴼ ⵡⴰⵣⴰⵍ ⴰⵎⵔⵏⴰⵡ 58 % ⴳ ⵓⵖⵣⵓⵔⴰⵏ ⵏ ⵜⵏⵓⴷⴰⴼ ⵏ ⵜⵎⵙⴰⵙⵜⵍⵜ, ⵉⴹⴼⵓⵕ ⵜⵜ ⵓⵔⴳⴰⵢ ⴰⴳⵯⵏⵙⴰⵏ ⵖⴼ ⵓⵙⵎⵓⵔ ⵙ ⵓⵎⵓⵔ ⵏ 29.57%, ⴷ ⵉⵔⴳⴰⵢⵏ ⵏ ⵜⵏⵓⴷⴰⴼ (11.12%). ⵣⵎⵎⴻⵎⵏⵜ ⵜⵏⵓⴷⴰⴼ ⵏ ⵉⵔⴳⴰⵢⵏ ⵏ ⵜⵏⵓⴷⴰⴼ, ⴳ ⴽⴽⵓⵥ ⵏ ⵉⵙⴳⴳⵯⴰⵙⵏ ⵉⵣⵔⵉⵏ, ⵉⵊⴳⵉⵍ ⵙ ⵓⵙⵖⵍ ⵏ 7.6% ⵢⴰⵡⴷ ⴰⵡⵜⵜⵓ ⵏⵏⵙ ⴳ 2021(+26%).

ⵜⴰⵣⵔⴰⵡⵜ : ⴰⵏⵏⴳⵣⵓ ⵏ ⵜⵎⵙⵙⵏⵜⴰⵢ ⵔⴰⴷ ⵉⵣⵎⵎⴻⵎ 12% ⴳ ⵓⵙⴳⴳⵯⴰⵙ ⵏ 2022 (ⵓⵊⵓⵔⴷⵡⵉ ⵍⵓⵎⴰⵔⵉⴽ)

ⴰⵏⵏⴳⵣⵓ ⵏ ⵉⵎⵙⵙⵏⵜⴰⵢ ⴳ ⵍⵎⵖⵔⵉⴱ ⵔⴰⴷ ⵉⴳⵎ ⵙ 12% ⴳ ⵓⵙⴳⴳⵯⴰⵙ ⵏ 2022. ⵜⵙⵡⵓⵜⵜⴰ (Allianz Trade) ⵜⴰⵎⵣⵡⴰⵔⵜ ⵜⴰⵎⴰⴹⵍⴰⵏⵜ ⴳ ⵢⵉⴳⵔ ⵏ ⵓⵙⴼⵍⵙ ⵏ ⵉⵎⵔⵡⴰⵙⵏ, ⴰⵏⵏⴳⵣⵓ ⴰ ⴳ 10% ⴳ ⵓⵙⵡⵉⵔ ⴰⵎⴰⴹⵍⴰⵏ ⵙ ⵓⵙⵖⵍ ⵏ ⵓⵙⴳⴳⵯⴰⵙ ⴰ ⵏⵉⵜ ⴷ 14% ⴳ ⵓⵙⴳⴳⵯⴰⵙ ⵏ 2023, ⵍⵍⵉ ⵢⵓⴷⵙⵏ ⴰⵙⵡⵉⵔ ⵏⵏⵙ ⴷⴰⵜ ⵏ ⵜⴰⵙⵙⴰⵙⵜ ⵏ ⵓⴼⵉⵔⵓⵙ ⴽⵓⵕⵓⵏⴰ. ⵢⴰⵖⵓⵍ ⵓⵏⵏⴳⵣⵓ ⴰ ⵙ “ ⵉⵎⵔⵡⴰⵢⵏ ⵉⵣⴳⵔⴰⵔⵏ ⵏ ⵓⵙⴷⴷⵉ ⵏ ⵓⵙⵉⴷⴼ, ⴷ ⵢⵉⵊⴳⵉⵍ ⵏ ⵡⴰⵜⵉⴳⴳⵏ ⵏ ⵜⵎⵜⵜⵉⵡⵉⵏ ⵜⵉⵎⵣⵡⵓⵔⴰ, ⴳ ⵓⴼⵏⴰⵥ ⵏ ⵉⴷⵜⵏⵜ ⵜⵏⴽⵛⵓⵎⵉⵏ, ⴷ ⵉⵎⵙⵡⵓⵔⵉⵜⵏ, ⴰⵔ ⵜⵉⴳⵉⵔⴰ”. ⴳ ⵜⵙⴳⴰ ⵢⴰⴹⵏ, ⵉⵍⵍⴰ ⵖⴼ ⵜⵎⵙⵙⵏⴰⵜⴰⵢ ⴰⴷ ⵍⵎⴰⵡⴰⵢⵏⵜ ⴷ ⵢⵉⵊⴳⵉⵍ ⵏ ⵡⴰⵜⵉⴳⴳⵏ ⵏ ⵓⵙⵉⵥⵕⴼ ⴳ ⵓⵙⴰⵜⴰⵍ ⵏ ⵓⵎⵣⵉⵣⵍ ⵏ ⵓⴱⴱⴰⵔⴰⵢ ⴷ ⵓⵥⵢⵢⵕ ⵏ ⵜⵙⵔⵜⵉⵜⵉⵏ ⵏ ⵉⴷⵔⵉⵎⵏ.

ⴰⵙⵖⵓⴷⵓ ⵏ ⵉⵏⴳⵔⴰⵡⵏ ⵏ ⵜⴰⵏⴰⴼⵜ : ⵜⵙⵔⵙ ⵜⵏⴱⴰⴹⵜ ⵜⵉⵔⵙⵍⵜ ⵜⴰⵎⵣⵡⴰⵔⵓⵜ (ⵍⵉⴽⵓⵏⵓⵎⵉⵙⵜ)

ⵜⵖⴹⴼ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⵏ ⵓⵥⵕⴼ ⵏⴰⴷⵢⴰ ⴼⵜⵜⴰⵃ ⵍⵄⴰⵍⴰⵡⵉ, ⵉ ⵉⵎⵉⵣⵉ ⵏ ⵡⴰⴷⴷⴰⴷ ⵉⵅⵛⵏⵏ ⵏ ⵜⴼⵏⵉⵇⵉⵏ ⵏ ⵜⴰⵏⴰⴼⵜ. ⵎⴽ ⵜⵣⵣⴳⵔ ⵜⵏⴱⴰⴹⵜ ⴰⵙⵖⵓⴷⵓ ⴰⵎⵙⴰⵙⵜⴰⵍ, ⵉⴳⴰ ⴰⵣⵓⵛⵛⵍ ⴷ ⵓⴷⵙⵍⴰⵏ ⴰⵙⵙ ⴰ ⴰⴷ ⵜⵙⵎⴷ ⵜⴰⴼⵔⴽⵜ ⵜⴰⵎⴳⴳⴰⵔⵓⵜ ⵍⵍⵉ ⵉⴳⴰⵏ ⴰⵙⵉⵊⴳⵍ ⵏ ⵓⵡⵜⴰⵢ ⵏ ⵢⴰⵏⴰⴼⵜ ⵏ ⵉⵎⵙⵖⴰⵏⵏ ⵉⵎⴽⵉⵏⵏⴰ ⵉⵍⵍⴰⵏ ⴳ ⵉⵏⴳⵔⴰⵡⵏ ⵏ ⵜⵡⵙⵓⴷⵔⵉⵏ ⵜⵉⵎⴷⵏⴰⵏ. ⵉⴳⴰ ⵓⵢⴰⵏⵏ ⵜⴰⵙⵓⵔⵉⴼⵜ ⵜⴰⵎⵣⵡⴰⵔⵓⵜ ⴷ ⵉⴹⴼⴼⵓⵕ ⵓⵙⴽⵛⵎ ⵏ ⵉⵙⵖⵓⴷⵓⵜⵏ ⴰⴹⵏⵉⵏ ⵉ ⵉⵏⴰⴳⵔⴰⵡⵏ ⵢⴰⴹⵏⵉⵏ ⵍⵍⵉ ⵉⵍⵍⴰⵏ ⴳ ⵡⴰⴷⴷⴰⴷ ⴰⵥⵕⴼⴰⵏ ⴷⵔⵓⵙ ⵏ ⵜⵡⴰⵖⵉⵜ. ⴰⵡⵜⵜⴰⵙ ⵉⴳⴰ ⵜ ⴰⵙⵜⵔⴰⵔ ⵏ ⵙⵉⵏ ⵉⴳⵊⴷⴰⵏ, ⵢⴰⵏ ⴰⴳⴷⵓⴷⴰⵏ ⵡⴰⵢⵢⴰⴹ ⵓⵙⵍⵉⴳⵏ ⵉⵎⴽⵉⵏⵏⴰ ⴷ ⵢⵉⵡⵉ ⵓⵙⵉⵏⴰⵔⵢⵓ ⵍⵍⵉ ⵙ ⵢ=ⵜⵓⵙⵉ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵜⴰⵏⴰⴼⵜ.

ⵉⵎⵛⵉⵡⴰⵔⵏ ⵉⵏⴰⵎⵓⵔⵏ ⵙ ⵓⵙⴱⵓⵖⵍⵓ ⵏ ⵜⵉⵏⵎⴰⵍ (ⵍⵉⴽⵓⵏⵓⵎⵉⵙⵜ)

ⵉⵕⵥⵎ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⵛⴰⴽⵉⴱ ⴱⵏⵎⵓⵙⴰ ⵉ ⵉⵎⵛⴰⵡⴰⵕⵏ ⵉⵏⴰⵎⵓⵔⵏ. ⴰⵡⵜⵜⴰⵙ ⴷ ⴰⵙⵎⵓⵏ ⵉⵙⵖⵍⴰⴼ ⵉ ⵉⵙⵎⵓⵜⵜⴳ ⵏ ⵜⴽⴰⵕⴹⴰ ⵏ ⵓⴱⵔⵉⴷ, ⵉⵡⴰⵜⵙⵏ ⴰⵙⵖⵓⴷⵓ ⵏ ⵜⵖⴰⵔⴰ ⵏ ⵜⵉⵏⵎⴰⵍ ⵜⵉⴳⴷⵓⴷⴰⵏⵉⵏ. ⵙ ⵎⴰⵏ ⴰⵢⴰ ⵉⴷⵡⵍ ⵓⵎⴰⵡⵙⴰⵙ ⵖⵔ ⵓⵣⵓⵔⵜ ⵏ ⵉⵎⵛⴰⵡⴰⵕⵏ ⵉⴱⴰⵔⴰⵡⵏ ⵍⵍⵉ ⵜⴻⵜⵜⴳⴳ ⵜⵙⵇⵇⵉⵎⵜ ⵜⵓⵙⵍⵉⴳⵜ ⵙ ⵓⵣⵓⵔⵜ ⵏ ⵜⴳⵎⵉ, ⵍⵍⵉ ⵉⵙⵏⴰⵅⴼ ⵏⵜⵜⴰ ⵏⵉⵜ ⵙ ⵉⵎⴰⵏ ⵏⵏⵙ. ⵜⵏⵏⵓⵕⵥⵎ ⵉⴹⵏⵏⴰⵟ ⵜⴼⵔⴽⵜ ⵏ ⵢⵉⵔⵎ ⵏ ⵉⵎⵛⴰⵡⴰⵕⵏ ⴳ ⵜⵎⵏⴰⴹⵜ ⵏⵎⵔⵔⴰⴽⵛ ⴰⵙⴼⵉ ⴷ ⵔⴰⴷ ⵜⵙⵙⵓⴷⵓ ⴰⵔ ⵜⵉⴳⵉⵔⴰ ⵏ ⵢⵓⵏⵢⵓ 2022. ⵜⵙⵙⵏⵜⴰ ⵜⵎⵀⵍⵜ ⴳ ⵜⵉⵏⵎⵍ ⵜⴰⵎⵏⵣⵓⵜ ⴰⴽⴷ ⵉⵏⵍⵎⴰⴷⵏ ⴷ ⵜⵙⵇⵇⵉⵎⵜ ⵜⴰⵙⴳⵎⴰⵏⵜ ⴷ ⵉⵏⵖⵍⴰⴼⵏ. ⵉⵎⴽⵉⵏⵏⴰ ⵜⵓⵎⴰ ⵉⵎⴷⵔⴰⵡⵏ ⵏ ⵜⵎⴰⵡⴰⵙⵜ ⴷ ⵉⵎⵓⵣⴰⵢⵏ ⵏ ⵡⴰⵎⵓⵏ ⴰⵎⴷⵏⴰⵏ. ⴳ ⵓⵙⴰⵜⴰⵍ ⴰ, ⵜⴻⵜⵜⵓⴳⴰ ⵜⴱⴰⴷⵓⵜ www.madrastna.ma ⵉ ⵓⵙⴽⴽⵉⵏ ⴰ.

ⵜⴰⵙⵇⵇⵉⵎⵜ ⵜⴰⵎⵖⵔⴱⵉⵜ ⵏ ⵉⴳⴰⴷⴰⵣⵏ ⵏ ⵉⴷⴳⴰⵔⵏ : ⴰⵙⵜⵔⴰⵔ ⵏ ⵜⵣⵓⵏⵉ ⵜⴰⵎⴰⵢⵏⵓⵜ ⵉ “ ⵓⵎⵏⵏⵓⵖ ⵎⴳⴰⵍ ⵜⴰⵔⴷⴰ ⵏ ⵓⴷⵔⵉⵎ ⴷ ⵓⵎⵡⵡⵍ ⵏ ⵓⴱⵔⵙⵉⵡⴷ” ⴳ ⵡⴰⵏⵙⴰ ⵏⵏⵙ ⴰⵍⵉⴽⵟⵕⵓⵏⵉⵢ (ⵍⵉⵣⴰⵏⵙⴱⵉⵔⴰⵙⵢⵓⵏ ⵉⴽⵓ)

ⵜⴱⵔⵔⵃ ⵜⵙⵇⵇⵉⵎⵜ ⵜⴰⵎⵖⵔⴱⵉⵜ ⵏ ⵉⴳⴰⴷⴰⵣⵏ ⵏ ⵉⴷⴳⴰⵔⵏ, ⵉⴹⵍⵍⵉ ⴰⴽⵕⴰⵙ, ⵉⵙ ⵜⵕⵥⵎ ⵜⴰⵣⵓⵏⵉ ⵜⴰⵎⴰⵢⵏⵓⵜ ⵙ ⵢⵉⵙⵎ “ ⴰⵎⵏⵏⵓⵖ ⵎⴳⴰⵍ ⵜⴰⵔⴷⴰ ⵏ ⵓⴷⵔⵉⵎ ⴷ ⵓⵎⵡⵡⵍ ⵏ ⵓⴱⵔⵙⵉⵡⴷ”(LBC- FT) “ ⴳ ⵡⴰⵏⵙⴰ ⵏⵏⵙ ⴰⵍⵉⴽⵟⵕⵓⵏⵉ. ⴰⵎⵏ ⵉⵍⵍⴰⵏ ⴳ ⵓⵙⵉⵡⴹ ⵏ ⵜⵙⵇⵇⵉⵎⵜ, ⵜⴳⴰ ⵜ ⵜⵇⵎⵓⵜ ⴰ , ⵉⵥⵍⵉⵏ ⵉ ⵉⵎⵣⵣⵓⵍⵏ ⵏ ⵉⴳⴰⴷⴰⵣⵏ ⵏ ⵉⴷⴳⴰⵔⵏ ⴷ ⵓⴳⴷⵓⴷ ⴰⴱⴰⵔⴰⵡ, ⵜⵙⵙⵏⴽⴰⵔ ⴰⵙⴰⵜⵉ ⵓⵣⵔⵉⴼ ⴷ ⵉⴳⵎⵎⵉ ⵏ ⵓⵎⵏⵏⵓⵖ ⵎⴳⴰⵍ ⵜⴰⵔⴷⴰ ⵏ ⵓⴷⵔⵉ ⴷ ⵓⵎⵡⵡⵍ ⵏ ⵓⴱⵔⵙⵉⵡⴷ. ⵉⵔⵏⴰ ⵓⵙⴰⴳⵎ ⵉⵙ ⴷⴰ ⵜⴻⵜⵜⴻⵜⵜⵉ ⵜⴰⵍⵍⵓⵏⵜ ⴰ ⵖⴼ ⴽⵉⴳⴰⵏ ⵏ ⵉⵙⵏⵜⴰⵍ ⵉⴷⴷⴰⵍⵏ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵎⵙⵙⵓⴷⵙⵏ ⴷ ⵡⴰⵏⵣⴰⵜⵏ ⴷ ⵉⵎⵏⵣⴰⵢⵏ ⵉⵏⵎⵎⴰⵍⵏ ⴷ ⵉⵙⴱⴷⴰⴷⵏ ⵉⴳⵔⴰⵖⵍⴰⵏⵏ ⴷ ⵉⵣⴷⴰⵢⵏ ⵓⴱⵖⵉⵔⵏ.

ⴽⵓⴼⵉⴷ-19 : 116 ⵏ ⵢⵉⵖ ⴰⵎⴰⵢⵏⵓ ⴷ ⵡⵓⴳⴳⴰⵔ ⵏ 6 ⵎⵍⵢⵓⵏ ⵏ ⵜⴳⵣⵣⴰⵢⵜ ⵉⵎⴷⴰⵏ (ⵍⵉⵣⴰⵏⵙⴱⵉⵔⴰⵢⵓⵏ ⵉⴽⵓ)

ⵜⴱⵔⵔⵃ ⵜⵎⴰⵡⴰⵙⵜ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⵉⴹⵍⵍⵉ ⴰⴽⵕⴰⵙ, ⵙ ⵓⵣⵎⵎⴻⵎ ⵏ 116 ⵏ ⵢⵉⵖ ⴰⵎⴰⵢⵏⵓ ⵙ ⴽⵓⴼⵉⴷ-19 (ⵎⴳⴰⵍ ⴰⵙⴳⵏⴼⵓ ⵏ 74 ⵏ ⵢⴰⵏ, ⵉⵎⵉⵍ ⵜⴻⵜⵜⵢⴰⵣⵎⵎⴰⵎ ⵉⵛⵜ ⵏ ⵜⵎⴰⵛⴽⵓⵜ ⵏ ⵜⵎⵜⵜⴰⵏⵜ, ⴳ 24 ⵏ ⵜⵙⵔⴰⴳⵜ ⵉⵣⵔⵉⵏ. ⵜⵙⴱⵏⵏⴷ ⵜⵎⴰⵡⴰⵙⵜ, ⴳ ⵜⵥⵕⵉⴳⵜ ⵏ ⵡⴰⵙⵙ ⵏ ⵜⵎⴳⵔⴰ ⵏ ⴽⵓⴼⵉⴷ-19 (6 ⵎⵍⵢⵓⵏ ⴷ 350 ⵏ ⵢⵉⴼⴹ ⵏ ⵢⴰⵏ ⴰⵢⴷ ⵉⵡⵡⵜⵏ ⵜⴰⵙⵙⴳⵏⵉⵜ ⵜⵉⵙⵙ ⴽⵕⴰⴹⵜ ⵏ ⵓⵙⴰⴼⴰⵔ ⵎⴳⴰⵍ ⴰⴼⵉⵔⵓⵙ, ⵉⵎⵉⵍ ⵢⴰⵊⴳⵓⵍ ⵓⵎⴹⴰⵏ ⵏ ⵡⵉⵍⵍⵉ ⵉⵡⵡⵜⵏ ⵜⴰⵙⵙⴳⵏⵉⵜ ⵜⵉⵙⵙ ⵙⵏⴰⵜ ⵙ 23 ⵎⵍⵢⵓⵏ ⴷ 300 ⵏ ⵢⵉⴼⴹ ⴷ 837 ⵏ ⵢⴰⵏ, ⵎⴳⴰⵍ 24 ⵎⵍⵢⵓⵏ ⴷ 820 ⵏ ⵢⵉⴼⴹ ⴷ 609 ⵏ ⵢⴰⵏ ⴳⴰⵏ ⵜⴰⵎⵣⵡⴰⵔⵓⵜ.

ⵍⵎⵖⵔⵉⴱ ⵉⵙⵙⵓⴷⵓ ⴳ ⵓⵙⴷⵓⵙ ⵏ ⵓⴷⵖⵔ ⵏⵏⵙ ⴳ ⵓⴱⴰⵔⴰⵣ ⴰⴳⵔⴰⵖⵍⴰⵏ (ⵍⵉⴱⵉⵔⴰⵙⵢⵓⵏ)

ⵉⵙⵙⵍⴽⵏ ⵡⴰⵏⵙⴰ ⴰⵍⵉⴽⵟⵕⵓⵏⵉ ⴰⵟⴰⵍⵢⴰⵏⵉ “ⵉⵏⵙⴰⵢⴷ ⵓⴼⵔ” ⵉⵙ ⵉⵙⵙⵓⴷⴰ ⵍⵎⵖⵔⵉⴱ ⴳ ⵓⵙⴷⵓⵙ ⵏ ⵓⴷⵖⴰⵔ ⵏⵏⵙ ⴳ ⵓⴱⴰⵔⴰⵣ ⴰⴳⵔⴰⵖⵍⴰⵏ, ⵙ ⵉⵎⵓⵔⵙⵏ ⵉⴷⵉⴱⵍⵓⵙⴰⵏ ⵉⵎⵎⵣⴷⴰⵢⵏ ⴷ ⵉⵅⴰⵜⴰⵔⵏ ⵉ ⵉⴳⴳⴰ. ⴷⴼⴼⵉⵔ ⵏ ⴰⵙⴼⴰⵡ ⵏ ⵢⵉⴳⴳⵉⵜⵏ ⵉⴷⵉⴱⵍⵓⵎⴰⵙⵉⵢⵏ ⵉⵎⴰⵥⴹⴰⵢⵏ ⵍⵍⵉ ⵉⵜⵜⵓⴳⵏ ⵜⵉⴳⵉⵔⴰ ⴰ ⵖⵓⵔ ⵜⴳⵍⴷⵉⵜ, ⵙ ⵍⴰⵡⴰⵏ ⴰⴽⴽⵯ ⴳ ⵓⵢⵍⵍⵉ ⵉⵇⵇⵏⵏ ⵙ ⵓⵙⴷⴰⵡ ⵏ ⵙⵙⵃⵕⴰ ⵜⴰⵎⵔⵉⴱⵉⵢⵜ, ⵉⵙⴼⴰⵡ ⵓⵖⵎⵉⵙ ⴰⵍⵉⴽⵟⵕⵓⵏⵉⵢ ⴰⵟⴰⵍⵢⴰⵏⵉⵢ ⵉⵙ “ ⵓⵔ ⵜⴳⵉ ⵙⵙⵃⵕⴰ ⵜⴰⵎⵖⵔⵉⴱⵉⵢ ⵖⴰⵙ ⵜⴰⴼⵓⵍⵜ ⵏ ⵡⴰⴽⴰⵍ ⵏ ⵜⴳⵍⴷⵉⵜ, ⵎⴰⵛⴰ ⵜⴳⴰ ⴰⵡⴷ ⵜⴰⴼⵓⵍⵜ ⴳ ⵓⵎⵣⵔⵓⵢ ⵏⵏⵙ ⴷ ⵜⴷⵍⵙⴰ ⵏⵏⵙ ⵜⴰⵏⴰⵎⵓⵔⵜ”. ⵙ ⵓⴳⵕⴷ ⵏ “ⵉⵏⵙⴰⵢⴷ ⵓⴼⵔ”, ⴳ ⵜⴰⵎⴰ ⵏ ⵜⵙⵎⵓⵏⵉ ⵜⴰⵎⴰⵡⵙⴰⵙⵜ ⵜⴰⵎⴳⴳⴰⵔⵓⵜ ⵏ ⵓⵎⵙⴰⵙⴰ ⴰⵎⴰⴹⵍⴰⵏ ⵎⴳⴰⵍ ⵏ “ⴷⴰⵄⵉⵛ” ⴳ ⵎⵔⵔⴰⴽⵛ, ⵜⵓⴳⵜ ⵏ ⵜⵎⵉⵣⴰⵔ ⵖⴼ ⵡⴰⵏⵏⴰⵍ ⵏⵏⵙⵏⵜ ⵉ ⵉⵙⵎⵎⵜⵔ ⴰⵎⵖⵔⵉⴱⵉⵢ ⵏ ⵓⵏⴱⴰⴹ ⴰⵙⵉⵎⴰⵏ ⴳ ⵙⵙⵃⵕⴰ.

ⴰⵎⵓⵍⵍⵓ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ ⵉⴱⵔⵔⵯ ⵙ ⵓⵙⵏⵜⵉ ⵏ ⵓⵙⵎⵓⵜⵜⴳ ⵉ ⵓⴳⵔⴰⵡ ⴰⵏⴰⵎⵓⵔ ⵡⵉⵙⵙ ⵢⴰⵏ ⴷ ⵎⵔⴰⵏ (ⵍⴱⴰⵢⴰⵏ)

ⵉⵙⵙⴽⵔ ⵓⵙⵉⵔⴰ ⴰⵙⵔⵜⴰⵏ ⵏ ⵓⵎⵓⵍⵍⵉ ⴰⴳⵔⴰⵡ ⵏⵏⵙ ⴰⵏⵙⵓⵜⵍ ⴰⵙⵍⵉⴷ ⴰⵙⵙⵏⴰⵟ ⵏ ⵓⵙⵉⵏⴰⵙ ⵉ ⵓⵎⵙⴳⴷⴰⵍ ⵏ ⵜⵖⴰⵡⵙⵉⵡⵉⵏ ⵜⵉⵏⴰⵎⵓⵔⵉⵏ ⴷ ⵓⵙⵏⵜⵉ ⵏ ⵜⵣⵉⴳⴳⵣⵜ ⵏ ⵓⵙⵎⵓⵜⵜⴳ ⵉⵓⴳⵔⴰⵡ ⴰⵏⴰⵎⵓⵔ ⵡⵉⵙⵙ ⵢⴰⵏ ⴷ ⵎⵔⴰⵡ ⵏ ⵓⵎⵓⵍⵍⵉ. ⵉⵙⵎⴰⵢⵏⵓ ⵓⵎⵓⵍⵍⵉ ⵏ ⵓⴷⵍⵉⵙ ⴰⵖⵓⵔⵉ ⵏⵏⵙ ⵉ ⵜⵏⴱⴰⴹⵜ ⴰⴷ ⵜⵙⴱⴷⴷ ⵎⴰⵕⵕⴰ ⵜⵉⵎⴳⴳⴰ ⵏ ⵓⵃⵔⵔⵣ ⵓⵔ ⵉⴳⵉ ⴰⵣⵓⵛⵛⵍ, ⴰⵎⵎ ⵜⵎⵔⵉⵙⵜ ⵙ ⵓⵊⴰⵡⴰⵣ ⵏ ⵓⴳⵣⵣⴰⵢ ⴷ ⵜⵍⵙⵉ ⵏ ⵜⵅⵎⵉⵎⵜ, ⴰⵢⵏⵏⴰ ⵉⵙⵓⵍ ⵡⴰⴷⴷⴰⴷ ⴰⴷⵓⵙⴰⵏ ⴷⴰ ⵢⴰⴽⴽⴰ ⵎⴰⵢⴰⵏⵏ, ⵙ ⵓⵡⵜⵜⴰⵙ ⵏ ⵜⵉⴽⴽⵉ ⵏ ⵓⴷⵃⴰⵢ ⵉⴷⵓⵙⵏ ⵉ ⵓⵎⵓⵙⵙⵓ ⵏ ⵜⵉⵍⴰⵍ ⵜⵉⴷⵎⵙⴰⵏⵉⵏ ⵙ ⵎⴰⵕⵕⴰ ⴰⵏⴰⵡⵏ ⵏⵏⵙ. ⵉⵎⴽⵉⵏⵏⴰ ⵉⵙⵙⵓⵜⵔ ⵓⵙⵉⵔⴰ ⴰⵙⵔⵜⴰⵏ ⴳⵜⵙⵎⵎⴰⵍⵜ, ⵜⴰⵏⴱⴰⴹⵜ ⴰⴷ ⵜⵎⵔⴰⵔⴰ ⴰⵡⴰⵍ ⵖⴼ ⵢⵉⵊⴳⵉⵍ ⵏ ⵡⴰⵜⵉⴳⴳⵏ ⵏ ⵉⵙⴽⵎⵓⴹⵏ ⴷ ⵡⴰⵍⴰⵙ ⵏ ⵓⵙⵡⵓⵔⵉ ⵏ ⵜⵎⵣⵉⵣⴷⴳⵜ “ⵙⴰⵎⵉⵔ”.

ⴰⵕⵥⵥⵓⵎ ⵏ ⵍⴱⴰⵏⴽ ⴰⵎⵢⵏⵓ ⵏ ⵉⵊⵉⵏⵏ ⵉⴹⴼⴰⵕⵏ ⵉ ⵡⴰⵎⵎⴰⵙ ⵉⵔⵣⵣⵓⵜⵏ ⵏ ⵜⴽⵔⵣⴰ ⴳ ⵜⵎⵏⴰⴹⵉⵏ ⵉⵣⵡⴰⵏ (ⵎⴰⵔⵓⴽ ⵍⵓⵊⵓⵔ)

ⵉⵏⵏⵓⵕⵣⵎ ⵉⴹⵍⵍⵉ ⴰⴽⵕⴰⵙ ⴳ ⵕⵕⴱⴰⵟ, ⵍⴱⴰⵏⴽ ⴰⵎⴰⵢⵏⵓ ⵏ ⵉⵊⵉⵏⵏ ⵉⴹⴼⴰⵕⵏ ⵉ ⵡⴰⵎⵎⴰⵙ ⴰⴳⵔⴰⵖⵍⴰⵏ ⵏ ⵉⵔⵣⵣⵓⵜⵏ ⵜ ⵜⴽⵔⵣⴰ ⴳ ⵜⵎⵏⴰⴹⵉⵏ ⵉⵣⵡⴰⵏ (ⵉⴽⴰⵔⴷⴰ) ⴳ ⵓⵙⴼⵓⴳⵍⵓ ⵍⵍⵉ ⵉⵙⵏⴰⵅⴼ ⵎⵓⵃⵎⵎⴰⴷ ⵚⵚⴹⴹⵉⵇⵉ ⴰⵎⴰⵡⵙⴰⵙ ⵏ ⵜⴽⵔⵣⴰ ⴷ ⵜⴳⵎⵔⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ. ⵉⵜⵜⵓⴳⴰ ⵍⴱⴰⵏⴽ ⵏ ⵉⵊⵉⵏⵏ, ⵍⵍⵉ ⵉⴽⵛⵎⵏ ⴳ ⵓⵙⴰⵜⵉ ⵏ ⵜⵣⵎⵎⴰⵔ ⵜⵉⵏⴰⵎⵓⵔⵉⵏ ⵏ ⵓⵎⵍⴰⵡⴰⵢ ⵏ ⵉⵏⵥⴰⵕⵏ ⵏ ⵜⵏⴼⵔⵓⵜ ⵏ ⵡⵓⵛⵛⵉ ⴷ ⵉⵙⴷⵉⴷⴷⵉⵢⵏ ⵉⵥⵍⵉⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ, ⴳ ⵓⵡⵜⵜⴰⵙ ⵏ ⵓⵙⵎⵓⵏ ⵏ ⵉⵙⵓⴳⴰⵎ ⵏ ⵉⵊⵉⵏⵏ ⴷ ⵓⴼⵔⴰⴳ ⵏⵏⵙⵏ ⴷ ⵓⵙⴱⵓⵖⵍⵓ ⵏⵏⵙⵏ ⵉ ⵓⴼⵔⴰⴳ ⵏ ⵜⵎⵢⴰⵏⴰⵡⵜ ⵜⴰⴱⵢⵓⵍⵓⵊⵉⵜ ⵜⴰⴽⵔⵣⴰⵏⵜ ⴳ ⵉⴽⴰⵍⵏ ⵉⵣⵡⴰⵏ.

ⵜⴰⵙⴷⴰⵡⵉⵜ ⵏ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ .. ⴰⵕⵥⵥⵓⵎ ⴰⵎⴰⴷⴷⵓⴷ ⵏ ⵜⵣⵉⴳⴳⵣⵜ ⵏ ⵉⵎⵙⴷⴰⴳⵏ-ⴰⵎⵙⵙⵏⵜⴰⵢ

ⵜⴱⵔⵔⵃ ⵜⵙⴷⴰⵡⵉⵜ ⵏ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ ⴳ ⵕⵕⴱⴰⵟ ⵙ ⵓⵕⵥⵥⵓⵎ ⴰⵎⴰⴷⴷⵓⴷ ⵏ ⵜⵣⵉⴳⴳⵣⵜ ⵏ ⵓⵎⵙⴳⴰⴷ ⴰⵎⵙⵙⵏⵜⴰⵢ ⴳ ⵓⵙⴰⴽⴰ ⵏ ⵓⵎⵙⴷⴰⴳ ⴳ ⵜⵉⵏⵎⵍ ⵜⴰⵏⴰⵎⵓⵔⵜ ⵏ ⵜⵙⵏⵙⵍⴽⵉⵎⵜ ⴷ ⵓⵙⴼⵙⴰⵢ ⵏ ⵓⵏⴰⴳⵔⴰⵡ ⴳ ⵓⵡⵜⵜⴰⵙ ⵏ ⵓⵙⵎⵓⵜⵜⴳ ⵏ ⵉⵏⵙⵙⵉⵅⴼⵏ ⵉⵎⵙⵏⵓⵍⴼⵓⵜⵏ ⴷ ⵉⵎⵙⵙⵏⵜⴰⵢⵏ. ⵜⴱⴷⵔ ⵜⵙⴷⴰⵡⵉⵜ ⴳ ⵓⵙⵉⵡⴹ ⴰⵏⵖⵎⴰⵙ ⵉⵙ ⵉⵕⵥⵎ ⵓⵏⵙⵙⵉⵅⴼ ⵏⵏⵙ ⵖⴰⵛⵉ ⵎⵓⵃⵎⵎⴰⴷ ⵜⴰⵣⵉⴳⴳⵣⵜ ⵜⴰⵙⴷⴰⵡⴰⵏⵜ ⵜⴰⵎⴰⵢⵏⵓⵜ ⵉⴳⴰⵏ ⵜⵉⵔⵎⵉⵜ ⵜⴰⵎⵣⵡⴰⵔⵓⵜ ⵏ ⵓⵙⵏⵓⵍⴼⵓ ⴳ ⵍⵎⵖⵔⵉⴱ ⵙ ⵓⵣⵎⵣⵣⵓ ⵏ ⵓⵎⵙⴰⴳⴰⵔ ⵉⵙⵏⵎⴰⵍⴰ ⵜⵉⴳⵉⵔⴰ ⴰ ⵉ ⵜⵏⴰⴼⵓⵜ ⵏ ⵉⵎⵃⴹⴰⵕⵏ ⵉⵎⵙⴷⴰⴳⵏ (ⴰⵙⴳⴳⵯⴰⵙ ⴰⵎⵣⵡⴰⵔⵓ) ⵙ ⵜⵎⴷⵔⴰⵡⵜ ⵏ ⵉⵎⴷⵔⴰⵡⵏ ⵉⵎⵔⵙⵍⴰⵏⵏ ⴷ ⵉⵏⴰⵎⵓⵏ ⵉⴷⵎⵙⴰⵏⵏ ⴳ ⵍⵎⵖⵔⵉⴱ.

ⴰⵀⵉⴹⵕⵓⵊⵉⵏ ⴰⵣⴳⵣⴰⵡ .. ⵓⵏⴼⵓⵙ ⴰⵎⴰⵢⵏⵓ ⵏ ⵜⵎⴳⵓⵔⵉ ⵜⴰⵎⵖⵔⵉⴱⵉⵢⵜ (ⵍⵓⴱⵉⵏⵢⵓⵏ)

ⵉⴳⴰ ⵓⵙⵢⴰⴼⵓ ⵏ ⵓⵀⵉⴹⵕⵓⵊⵉⵏ ⴰⵣⴳⵣⴰⵡ ⴳ ⵍⵎⵖⵔⵉⴱ ⵙⴳ ⵉⵙⵖⵏⵓⵜⵏ ⵉⵙⵜⵔⴰⵜⵉⵊⵉⵏ ⵉⵙⵜⴰⵡⵀⵎⵎⴰⵏ ⵏ ⵜⵥⴹⴰⵕⵜ. ⵉ ⵜⴳⵍⴷⵉⵜ ; ⵉⴳⴰ ⵉⵎⵉⵙⵙ ⵏ ⵓⴼⵔⴰⴳ ⵉ ⵜⵡⵏⵏⴰⴹⵜ ⴰⴽⵏ ⵡⵓⵏⴼⵓⵙ ⴰⵎⴰⵢⵏⵓ ⵏ ⵓⴼⴰⵔⵙ ⴰⵎⴳⵓⵔⴰⵏ. ⵢⵓⵙⴰ ⴷ ⵓⵀⵉⴹⵕⵓⵊⵉⵏ ⴰⵡⴷⵉ ⵜⵓⴳⵜ ⵏ ⵉⵇⵔⴰⵏⵏ ⵏ ⵜⵎⴳⵓⵔⵉ ⵜⴰⵏⴰⵎⵓⵔⵜ, ⵙⴳ ⵓⵙⵉⵔⴰ ⴰⵛⵔⵉⴼ ⵏ ⵓⴼⵓⵚⴼⴰⵟ, ⵉⵎⵉⵍ ⴰⴷ ⵉⵙⵙⴷⵔⵉⵙ ⵙ ⵜⴰⵍⵖⴰ ⵜⴰⴽⵙⵡⴰⵜ ⴳ ⵜⵏⵓⴷⴰⴼ ⵏⵏⵙ ⵏ ⴰⵎⵓⵏⵢⴰⴽ. ⵎⴰⵛⴰ ⵉ ⵍⵎⵖⵔⵉⴱ, ⵓⵔ ⵉⴳⵉ ⵓⵡⵜⵜⴰⵙ ⵖⴰⵙ ⴰⴼⴰⵔⵙ ⵉ ⵜⵎⴳⵓⵔⵉ ⵜⴰⴷⵖⵔⴰⵏⵜ, ⵎⴰⵛⴰ ⴰⵡⵜⵜⴰⵙ ⴰⴷ ⵢⵓⵖⵓⵍ ⴰⵙⴰⴳⵎ ⴰⵎⴰⴹⵍⴰⵏ. ⵙ ⵡⴰⵡⴰⴹ ⵏ ⵓⵙⴳⴳⵯⴰⵙ ⵏ2030, ⵙⵙⵎⵜⵔⵏⵜ ⵉⵙⵓⴳⵔⵏ ⵉⵙ ⵉⵍⵍⴰ ⵡⴰⵙⵙⴰⵔ ⵏ ⵡⴰⵜⵜⴰⵢ ⵏ 90 ⵎⵍⵢⴰⵕ ⴷⵔⵀⵎ ⵃⵎⴰ ⴰⴷ ⵉⴳ ⵍⵎⵖⵔⵉⴱ ⴰⵎⴳⴳⴰⵢ ⴰⴷⵙⵍⴰⵏ ⴳ ⵓⵙⵓⴼⴹⵏ ⵓⵀⵉⴹⵕⵓⵊⵉⵏ.

ⴰⵙⵎⵀⵍ ⵏ ⵜⴼⵔⵉⵙⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵣⵉⵖⵜ .. ⴰⵙⴳⵎⴹ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⴳⵔ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵔ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ (ⵍⵓⴱⵉⵏⵢⵓⵏ)

ⵜⴻⵜⵜⵓⵙⴳⵎⴹ ⴰⵙⵍⵉⴷ ⴰⵙⵉⵏⴰⵙ ⴳ ⵕⵕⴱⴰⵟ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⴳⵔ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵔ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⵓⵎⴰ ⵉⴳⵔⴰ ⵏ ⵡⴰⵏⵏⴰⵍ ⴰⵜⵉⵇⵏⵉ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵓⵙⵎⵓⵜⵜⴳ ⴰⵙⵓⵍⴰⵏ ⵏ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⴷ ⵓⵙⵡⵀⵏ ⵏ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ. ⵜⵡⴰⵜⵙ ⵜⵎⵢⴰⵇⵇⴰⵏⵜ ⴰ ⵍⵍⵉ ⵉⵙⵙⴳⵎⴹ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵔ ⵏⵉⵄⵎ ⵎⵢⴰⵔⴰ, ⴷ ⵓⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵃⵎⴰⴷ ⴱⵓⴽⵓⵙ, ⴰⵙⵔⵓⵙ ⵏ ⵓⵙⴰⵜⵉ ⴰⵎⴰⵜⴰⵢ ⵏ ⵓⵎⵢⴰⵡⴰⵙ ⴳⵔ ⵙⵏⴰⵜ ⵜⵎⵔⵙⴰⵍ ⵃⵎⴰ ⴰⴷ ⵢⵉⵍⵉ ⵓⵙⵎⵀⵍ ⴰⵖⴰⵡⴰⵙ ⵏ ⵜⵡⵓⵔ ⵏ ⵓⵙⵇⵇⵉⵎ ⵉⵥⵍⵉⵏ ⵙ ⵜⵎⴰⵎⴽⵉⵏ ⴷ ⵜⴼⵔⴽⵉⵡⵉⵏ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵡⵓⵔⵉⵡⵉⵏ ⵏ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵔ ⴳ ⵉⵎⴰⵙⵙⵏ ⵏⵏⵙ, ⵓⵍⴰ ⴰⴷⵔⴰ ⵏ ⵓⵙⵎⵀⵍ ⵏ ⵜⴼⵔⵉⵙⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵣⵉⵖⵜ ⴷ ⵓⵙⵡⵀⵏ ⵏ ⵓⵙⵎⵔⵙ ⵏⵏⵙ ⴳ ⵓⵙⵇⵇⵉⵎ ⴷ ⵡⵓⴽⵓⵙ ⵏ ⵜⵏⵎⵎⴰⵔⵉⵏ ⵜⵉⵜⵉⵇⵏⵉⵢⵉⵏ ⵙⵔⵙ ⵉⵥⵍⵉⵏ.

ⴰⵍⴱⴰⵃⵔⴰⵢⵏ ⵜⵙⴰⵡⴰⵍ ⵖⴼ ⵓⵙⵙⵉⵜⴳ ⵏⵏⵙ ⵉ ⵜⵣⵎⵎⴰⵔ ⵉⵜⵜⴳⴳ ⵓⴳⵍⵍⵉⵙ ⴳ ⵓⴼⵔⴰⴳ ⵉ ⵜⵎⴰⴳⵉⵜ ⵏ ⵍⵇⵓⴷⵙ(ⵍⴱⴰⵢⴰⵏ)

ⵜⵙⵎⴰⵢⵏⵓ ⵜⴳⵍⴷⵉⵜ ⵏ ⵍⴱⵃⵔⴰⵢⵏ ⴰⵙⴷⴷⵉⴷ ⵏ ⵜⵣⵎⵎⴰⵔ ⵏ ⵍⵎⵖⵔⵉⴱ, ⴷⴷⴰⵡ ⵏ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴳ ⵓⵎⵣⴰⵖ ⵖⴼ ⵜⵎⵏⵜⵉⵍⵜ ⵜⴰⴼⴰⵍⴰⵚⵟⵉⵏⵉⵜ ⴷ ⵓⴼⵔⴰⴳ ⵉ ⵜⵎⴰⴳⵉⵜ ⵏ ⵍⵇⵓⴷⵙ ⴰⵛⵛⵔⵉⴼ. ⵉⵙⴰⵡⵍ ⵓⵏⵙⵙⵉⵅⴼ ⵏ ⵢⵉⴳⵔ ⵏ ⵜⵖⴰⵡⵉⵡⵉⵏ ⵜⵉⵄⵔⴰⴱⵉⵏ ⴳ ⵜⵎⴰⵡⴰⵙⵜ ⵏ ⴱⵕⵕⴰ ⵜⴰⴱⵃⵔⵉⵏⵉⵜ, ⵎⴰⵙⵙ ⴰⵃⵎⴰⴷ ⵎⵓⵃⵎⵎⴰⴷ ⵟⵕⵉⴼⵉ, ⴳ ⵜⴳⵓⵔⵉ ⴰⴰⵙⵍⵉⴷ ⴰⵙⵉⵏⴰⵏ ⴳ ⵓⵎⵙⴰⴳⴰⵔ ⵏ ⵜⵡⵉⵣⵉ ⴰⴽⴷ ⵓⴳⴷⵓⴷ ⴰⴼⴰⵍⴰⵚⵟⵉⵏⵉ ⵖⴼ ⵓⵙⵙⵉⵜⴳ ⵏ ⵜⵎⴰⵣⵉⵔⵜ ⵏⵏⵙ ⵉ ⵜⵎⵍⴰⵍⵜ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ ⵙ ⵜⵏⵙⵙⵉⵅⴼⵜ ⵏ ⴱⴰⴱ ⵏ ⵡⴰⴷⴷⵓⵔ ⵎⵓⵃⵎⵎⴰⴷ ⴰⴳⵍⵍⵉⴷ, ⴳ ⵓⴼⵔⴰⴳ ⵉ ⵜⵎⴰⴳⵉⵜ ⵜⴰⵄⵔⴰⴱⵜ ⵜⵉⵏⵙⵍⵎⵜ ⴷ ⵜⵎⴰⵙⵉⵃⵉⵜ ⵏ ⵍⵇⵓⴷⵙ, ⴷ ⵓⴹⵎⴰⵏ ⵏ ⵜⵍⴻⵍⵍⵉ ⵏ ⵜⵎⵙⴽⵉⵔⵜ ⵏ ⵉⵙⴳⴷⵏ ⵉ ⵎⴰⵕⵕⴰ ⴳ ⵙⵙⵍⴰⵎⵜ ⴷ ⵓⴼⵔⴰ.

ⴰⵙⵎⴰⵜⴰ ⵏ ⵡⴰⴷⴷⴰⵍ ⴰⴷⵓⵙⴰⵏ ⵓⵛⵛⵉⵍ ⵙ ⵜⵉⴳⵉⵔⴰ ⵏ 2022 ⴰⵢ ⴷ ⵉⴳⴰⵏ ⵜⴰⵏⵇⵇⵉⴹⵜ ⴰⴽⴽⵯ ⵉⵍⴰⵏ ⴰⵜⵉⴳ ⵏ ⵜⵙⴰⵡⴰⵔⵜ ⵏ ⵓⴼⵔⴰⴳ ⴰⵏⴰⵎⵉⵓⵏ

ⵉⵙⵙⵍⴽⵏ ⵓⵎⴰⵡⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵙⵜⵍⵜ ⴼⴰⵡⵣⵉ ⵍⵇⵊⵄ ⴳ ⵓⵙⵇⵇⵉⵎ ⵏ ⵉⵎⴰⵔⵉ, ⵉⵙ ⵉⴳⴰ ⵓⵙⵎⴰⵜⴰ ⵏ ⵡⴰⴷⴷⴰⵍ ⴰⴷⵓⵙⴰⵏ ⵓⵛⵛⵉⵍ ⵙ ⵜⵉⴳⵉⵔⴰ ⵏ ⵓⵙⴳⴳⵯⴰⵙ ⵏ 2022, ⴳⵔ ⵜⵏⵇⵇⴰⴹ ⴰⴽⴽⵯ ⵉⵙⵜⴰⵡⵀⵎⵎⴰⵏ ⵏ ⵜⵙⴰⵡⴰⵔⵜ ⵏ ⵓⴼⵔⴰⴳ ⴰⵏⴰⵎⵓⵏ ⵉⵎⵉⵍ ⵔⴰⴷ ⵉⴽⴼ ⵉ 22ⵎⵍⵢⵓⵏ ⵏ ⵓⵎⵙⴰⵃⴰ ⵉⵎⵔⵏⴰⵡⵏ ⴰⴷ ⵚⴰⵃⴰⵏ ⵙⴳ ⵜⵏⴼⵔⵓⵜ ⵜⵓⵛⵛⵉⵍⵜ ⵖⴼ ⵡⴰⵟⵟⴰⵏ ⵍⵍⵉ ⵉⴷⴷⴰⵍⵏ ⴰⵙⵎⴽⵍ ⴷ ⵉⵙⴰⴼⴰⵔⵏ ⴷ ⵓⵙⵓⵊⵊⵉ. ⵉⵏⵏⴰ ⵍⵇⵊⵄ ⴳ ⵜⵎⵔⴰⵔⵓⵜ ⵏⵏⵙ ⵖⴼ ⵓⵙⵇⵙⵉ ⴰⵎⵉⵡⴰⵏ ⵖⴼ “ⴰⵙⵉⵥⵕⴼ ⵏ ⵜⵙⴰⵡⴰⵔⵜ ⵏ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ” ⵉⵙ ⵓⵎⴰⵏⵜ ⵜⵙⵏⴰⵎⵎⴰⵙⵉⵏ ⴰ ⴰⵡⴷ ⴰⵙⵎⴰⵜⴰ ⵏⵓⵎⵢⴰⵔⴰⵣ ⵏ ⵜⴰⵡⵊⵉⵡⵉⵏ ⴳ ⵉⵙⴳⴳⵯⴰⵙⵏ ⵏ 2023 ⴷ 2024, ⵍⵍⵉ ⴳ ⵔⴰⴷ ⵉⵚⴰⵃⴰ ⵡⴰⵜⵜⴰⵢⵏ ⵏ ⵙⴰ ⵏ ⵉⵎⵍⵢⵓⵏⵏ ⵏ ⵉⵡⴰⵣⵣⴰⵏⵏ ⵉⵍⵍⴰⵏ ⴳ ⵓⵡⵜⴰⵢ ⵏ ⵓⵙⵙⵍⵎⴷ, ⵓⵍⴰ ⴰⵙⵅⵉⵜⵔ ⵏ ⵜⵙⵉⵍⴰ ⵏ ⵓⵍⵜⴰⵖ ⴳ ⵉⵏⴰⴳⵔⴰⵡⵏ ⵏ ⵜⴰⵏⴰⴼⵜ ⴷ ⵓⵙⵎⴰⵜⴰ ⵏ ⵓⵎⵢⴰⵔⴰⵣ ⵖⴼ ⵜⵊⵍⵉ ⵏ ⵜⵡⵓⵔⵉ .ⴳ ⵓⵙⴳⴳⵯⴰⵙ ⵏ 2025

ⵜⵉⵎⵢⵓⵔⵉⵏ ⵏ ⵜⴷⵍⵙⴰ ⵜⴰⵄⵔⴰⴱⵜ ⴷ ⵜⵎⵖⵔⵉⴱⵉⵢⵜ ⵙⵓⵍⵏⵜ ⴷⴷⵔⵏⵜ ⴷ ⵟⵟⴰⵍⵢⴰⵏ

ⵉⵙⵙⵍⴽⵏ ⵓⵎⵙⵇⴰⴷ ⵏ ⵟⵟⴰⵍⵢⴰⵏ ⴳ ⵍⵎⵖⵔⵉⴱ ⵉⵙ ⵙⵓⵍⵏⵜ ⵜⵎⵢⵓⵔⵉⵏ ⵏ ⵜⴷⵍⵙⴰ ⵜⴰⵄⵔⴰⴱⵜ ⴷ ⵜⵎⵖⵔⵉⴱⵉⵢⵜ ⴷⴷⵔⵏⵜ ⴳ ⵟⵟⴰⵍⵢⴰⵏ ; ⵙ ⵍⴰⵡⴰⵏ ⴰⴽⴽⵯ ⴳ ⵉⴼⴼⵓⵙ ⵏ ⵜⵎⴰⵣⵉⵔⵜ. ⵉⵏⵏⴰ ⴳ ⵓⵙⴰⵜⴰⵍ ⴰ ” ⴷⴰ ⵏⵜⵜⴳⴳⴰ ⴰⵎⵢⴰⵡⴰⵙ ⴰⴽⵙⵡⴰⵜ ⴰⴷ ⵏⵙⵎⴰⵢⵏⵓ ⴰⵢⴷⴰ ⵏ ⵡⴰⵔⵔⴰⵜⵏ ⵉⵎⵖⵔⴱⵉⵢⵏ ⴷ ⵓⴼⵔⴰⴳ ⵏⵏⵙⵏ ⴷ ⵓⵙⵅⵉⵜⵔ ⵏ ⵡⴰⵎⵎⴰⵙ ⴰⴽⴽⵯ ⴰⵎⵇⵔⴰⵏ ⵏ ⵜⵣⵔⴰⵡⵉⵏ ⵏ ⵓⵎⵣⵔⵓⵢ ⴷ ⵜⴷⵍⵙⵉⵡⵉⵏ ⵏ ⵢⵉⵙⵍⴰⵎ ⴳ ⴱⴰⵍⵉⵔⵎⵓ : ⵜⴰⵙⴷⵍⵉⵙⵜ ⵊⵓⵔⵊⵢⵓ ⵍⴰⴱⵉⵔⴰ. ⴷ ⵡⴰⵎⵏ ⵉⵏⵏⴰ ⵓⵎⵙⵇⴰⴷ, ⵉⵙⵏⴰⵎⴽ ⵓⵎⵢⴰⵡⴰⵙ ⴰⴷⵍⵙⴰⵏ ⴰⵙⵖⵏⵓ ⵏ ⵜⵖⴰⵔⴰⵙⵜ ⵏ ⵓⵙⵓⴷⴼ ⴳ ⵜⴰⴳⵯⵎⴰⵏⵉⵜ ⵏ ⵜⵙⴳⴰ ⵏ ⵢⵉⵍⴻⵍ ⴰⴳⵔⴰⴽⴰⵍ.

ⴼⴰⵍⴰⵚⵟⵉⵏ ⵜⵔⴰ ⴰⴷ ⵜⵚⴰⵃⴰ ⵙⴳ ⵜⵉⵔⵎⵉⵜ ⵜⴰⵎⵖⵔⴱⵉⵜ ⵏ ⵢⵉⴳⵔ ⵏ ⵜⵏⴽⵔⴰ ⵙ ⵜⵡⵓⵔⵉ (ⵍⵓⵎⴰⵜⵜⴰⵏ)

ⵉⵙⵙⵍⴽⵏ ⵓⵎⴰⵡⵙⴰⵙ ⵏ ⵜⵡⵓⵔⵉ ⵏ ⴼⴰⵍⴰⵚⵟⵉⵏ, ⵏⴰⵚⵕⵉ ⴰⴱⵓⵊⵉⵛ, ⴰⵙⵍⵉⴷ ⴰⵙⵉⵏⴰ, ⵉⵙ ⵜⵔⴰ ⴼⴰⵍⴰⵚⵟⵉⵏ ⴰⴷ ⵜⵚⴰⵃⴰ ⵙⴳ ⵜⵉⵔⵎⵉⵜ ⵜⴰⵎⵖⵔⴱⵉⵜ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵜⵡⵓⵔⵉ. ⵉⵙⵙⵍⴽⵏ ⴰⴱⵓⵊⵉⵛ ⴳ ⵜⵙⴳⵓⵔⵉ ⵏⵏⵙ ⴷⴼⴼⵉⵔ ⵏ ⵉⵔⵣⵣⵓⵜⵏ ⵍⵍⵉ ⵉⴳⴰ ⴰⴽⴷ ⵓⵎⴰⵡⵙⴰⵙ ⵏ ⵜⴷⴰⵎⵙⴰ ⴷ ⵜⵎⵙⵙⵏⵜⴰⵜ ⵜⴰⵎⵥⵥⵢⴰⵏⵜ ⴷ ⵜⵡⵓⵔⵉ ⴷ ⵜⵙⵓⴳⴰⵔ, ⵢⵓⵏⵙ ⵙⵙⴽⴽⵓⵔⵉ, ⴳ ⵜⴰⵎⴰ ⵏ ⵜⵙⵎⵓⵏⵉ ⵜⴰⵎⴰⵡⵙⴰⵙⵜ ⵜⵉⵙⵙ ⵙⵎⵎⵓⵙⵜ ⵏ ⵓⴳⵔⴰⴽⴰⵍ, ⵖⴼ ⵓⵙⵡⵓⵔⵉ ⴷ ⵜⵡⵓⵔⵉ, ⵉⵙ ⵙⵏⴰⵎⵎⵙⵏ ⵉⵔⵣⵣⵓⵜⵏ ⴰ ⵖⴼ ⵉⴱⵔⴷⴰⵏ ⵏ ⵓⵚⴰⵃⴰ ⵉ ⴼⴰⵍⴰⵚⵟⵉⵏ ⵙⴳ ⵜⵉⵔⵎⵉⵜ ⵜⴰⵎⵖⵔⴱⵉⵜ ⵜⴰⵎⵣⵡⴰⵔⵜ ⴳ ⵢⵉⴳⵔ ⵏ ⵓⵎⵏⵏⵓⵖ ⵎⴳⴰⵍ ⵜⵏⵓⵟⵟⴰⴼ ⵜⵓⵣⴷⵉⵔⵉⵏ ⵏ ⵓⴱⴰⵢⵢⵓⵕ ⴽⵓⴼⵉⴷ-19 ⴷ ⵜⴰⵔⵡⵓⵔⵉ.

ⵍⴼⴰⵜⵉⴽⴰⵏ : ⴰⵙⴱⵏⵏⴷ ⵏ ⵜⵎⵣⵡⴰⵔⵜ ⵏ ⴱⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⴳ ⵓⵙⴷⵓⵙ ⵏ ⵍⴰⵎⴰⵏ ⴷ ⵓⵎⵙⴰⵔⵓⴼ (ⵔⵉⵙⴰⵍⴰⵜ ⵍⵓⵎⵎⴰ)

ⵙⴱⵏⵏⴷⵏ ⵉⵎⴷⵔⴰⵡⵏ ⴳ ⵜⵉⵏⴰⵡⵜ ⵍⵍⵉ ⵉⵜⵜⵓⴳⴰⵏ ⴰⵢⵏⴰⵙ ⴳ ⵜⵙⴷⴰⵡⵉⵜ ⵜⴰⴱⴰⴱⴰⵡⵉⵜ ⴳ ⵍⴼⴰⵜⵉⴽⴰⵏ ⵜⴰⵎⵣⵡⴰⵔⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴳ ⵓⵙⴷⵓⴷ ⵏ ⵍⴰⵎⴰⵏ ⴷ ⵓⵎⵙⵓⵔⵓⴼ ⵙ ⵜⵉⵀⴰⵡⵜ ⵏ ⵓⵎⵛⵛⵉⵡⵔ ⴱⴰⴱ ⵏ ⵡⴰⴷⴷⵓⵔ ⵓⵏⴷⵔⵉ ⴰⵥⵓⵍⴰⵢ. ⵜⵙⴷⴷⵉⴷ ⵜⵎⵙⵇⴰⴷⵜ ⵏ ⵍⵎⵖⵔⵉⴱ ⴳ ⵍⴼⴰⵜⵉⴽⴰⵏ ⵔⴰⵊⴰⴻ ⵏⴰⵊⵉ ⵎⴽⴽⴰⵡⵉ, ⴳ ⵜⴳⵓⵔⵉ ⵏ ⵓⵕⵥⵥⵓ ⵏ ⵜⵉⵏⴰⵡⵜ ⵜⵙⵏⵎⴰⵍⴰ ⵙ ⵓⵙⵓⵍⴼ ⵏ ⵓⴽⵜⵜⴰⵢ ⵙ ⵜⵉⵔⵣⴰⴼⵏ ⵉⵎⵣⴰⵔⴰⵢⵏ ⵏ ⵉⴳⵍⵍⵉⵏ ⵏ ⵓⴳⵍⵍⵉⴷ ⵃⴰⵙⴰⵏ ⵡⵉⵙⵙ ⵙⵉⵏ ⴷ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵉ ⵍⴼⴰⵜⵉⴽⴰⵏ, ⵉⵙ ⵉⵙⵙⵏⵜⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵙⴳ ⵎⴰ ⴷ ⵢⵓⵍⵉ ⵙ ⴰⴼⵍⵍⴰ ⵏ ⵓⴷⴰⴱⵓ ⵉⵙⴳⴳⴷⵏ ⵏ  ⵉ ⵓⵙⴼⴰⵡ ⴷ ⵓⵙⵎⵢⵉⵡⵏ ⵏ ⵉⵙⴱⴷⴰⴷⵏ ⵏ ⵉⵙⴳⴷⵏ ⴷ ⵓⵙⴷⵓⵙ ⵏ ⵓⵎⵙⵓⵔⵓⴼ ⴷ  ⵓⵍⴷⵓⴷⵉ ⴷ ⵍⵉⵙⵍⴰⵎ ⴰⵏⴰⵎⵎⴰⵙ. ⵜⵙⴷⴷⵉⴷ ⵜⴷⵉⴱⵍⵓⵎⴰⵙⵉⵜ ⵜⴰⵎⵖⵔⴱⵉⵜ ⴷⵉⵖ ⵉⵙ ⵉⵙⵙⵍⴽⵏ ⴱⴰⴱⴰ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⴽⵉⴳⴰⵏ ⵏ ⵉⵣⵎⵣⵣⵓⵜⵏ ⵜⵉⵔⴰⵜ ⵏⵏⵙ ⴰⴷ ⵉⵙⵡⵓⵔⵉ ⴳ ⵜⵙⴳⴰ ⵏ ⵍⴱⴰⴱⴰ, ⵖⴼ ⵓⵣⵓⵣⵣⵔ ⵏ ⵜⵏⵉⴷⵉⵜⵉⵏ ⵉ ⵓⵙⴳⴷ ⴷ ⵜ ⵏ ⵢⵉⵎⴰⵏ ⵜⵉⵎⵅⵎⴰⵅⵉⵏ ⵍⵍⵉ ⵉⵛⵛⴰⵔⵏ ⵉ ⵜⵉⴼⴼⵓⴳⵏⴰ.

ⴰⵙⵇⵇⵉⵎ ⵏ ⵉⵎⵛⵛⵉⵡⴰⵕ .. ⵓⴽⵓⵙ ⵏ ⵜⴳⵎⴰⵎⵜ ⵉⵜⵜⴳⴰⵏⵏⴰ ⵉⴱⵕⵍⴰⵎⴰⵏⵉⵢⵏ ⵉⵜⵜⴱⴱⵉⵏ (ⵔⵉⵙⴰⵍⴰⵜ ⵍⵓⵎⵎⴰ)

ⵉⴽⵛⵎ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵜⴰⴼⵔⴽⵜ ⵏ ⵡⵓⴱⵓⵢ ⴰⴽⴷ ⵉⵙⵎⵎⵜⵔⵏ ⵏ ⵉⵙⵏⴼⵍⵏ ⵖⴼ ⵓⵙⵍⴳⵏ ⵏⵏⵙ ⴰⴳⵯⵏⵙⴰⵏ, ⵍⵍⵉ ⵉⵙⵙⵏⴽⴷ ⵓⴽⴰⴱⴰⵕ ⴷ ⵔⵔⵓⴱⴱⴰ ⵜⵉⴱⵕⵍⴰⵎⴰⵏⵉⵏ, ⴳ ⵜⴼⵔⴽⵜ ⵉⵍⵍⴰⵏ ⴳⵔ ⵜⵙⵓⵜⴰⵍ. ⴷ ⵡⴰⵎⵏ ⵉⵍⵍⴰⵏ ⴳ ⵓⵙⵖⵏⵓ ⵏ ⵓⵙⵍⴳⵏ ⴰⴳⵯⵏⵙⴰⵏ, ⵍⵍⵉ ⵜⵥⵕⴰ “ⵔⵉⵙⴰⵍⴰⵜ ⵍⵓⵎⵎⴰ” ⵙⵙⵎⵜⵔⵏ ⵉⴽⴰⴱⴰⵕⵏ ⵙⴳ ⵜⵓⵣⵍⵜ ⴷ ⵜⵓⴳⴳⵜ ⴰⵙⵎⵢⴰⴳ ⵏ ⵜⵓⵎⴰⵢⵉⵏ ⵏ ‘ⵉⵎⵏⵏⵉ1″ ⵉⵜⵜⵡⴰⵍⴰⵙⵏ ⴳ ⵓⵙⵍⴳⵏ ⴰⵎⵙⵙⵓⴷⵙ ⵓⵟⵟⵓⵏ 28.11 ⵉⵥⵍⵉⵏ ⵙ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵖⵉⴽⵍⵍⵉ ⵉⵏⴼⵍ ⵉⵎⴷ, ⵍⵍⵉ ⵉⵜⵜⵉⵏⵉⵏ ⵉⵙ ⴷⴰ ” ⵉⵜⵜⵢⵉⴽⴽⵉⵙ ⵙⴳ ⵜⴼⵔⵉⵙⵜ ⵏ ⵓⴳⵎⴰⵎ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵜⵜⴰ ⵓⵎⵛⵛⵉⵡⵕ ⵉⴱⴱⵉⵏ ⴰⵙⴳⴳⵯⴰⵙ ⴰⵣⵣⵔⴰⴼ ⵉⵎⴷⴰⵏ ⵜⵉⵀⴰⵡⵜ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴱⵍⴰ ⵜⴰⵎⵏⵜⵉⵍⵜ ⵉⵜⵜⵢⴰⵇⴱⴰⵍⵏ”. ⴳ ⵓⵙⴰⵜⴰⵍ ⴰ, ⵉⵙⵙⵓⵜⵔ ⵓⴽⴰⴱⴰⵕ ⵏ ⵍⵉⵙⵜⵉⵇⵍⴰⵍ ⴷ ⵓⴽⴰⴱⴰⵕ ⵏ ⵜⴰⵎⴰⵓⵏⵜ ⵜⴰⵎⴰⵜⴰⵢⵜ ⵏ ⵉⵎⵙⵡⵓⵔⵉⵜⵏ ⴳ ⵍⵎⵖⵔⵉⴱ ⴷ ⵓⴽⴰⴱⴰⵕ ⵏ ⵜⴰⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵙⵙⵏⵜⴰⵢ ⵏ ⵍⵎⵖⵔⵉⴱ ; ⴳ ⵉⵙⵏⴼⵍⵏ ⵉⵎⵣⴰⵔⴰⵢⵏ ⵓⴽⵓⵙ ⵏ ⵜⴼⵔⵉⵙⵜ ⵜⴰⴱⵕⵍⴰⵎⴰⵏⵉⵜ ⵉ ⵉⵎⵛⵛⵉⵡⴰⵕ ⵍⵍⵉ ⵉⵜⵜⴱⴱⵉⵏ ⴰⵙⵇⵇⵉⵎ ⴰⵙⴳⴳⵯⴰⵙ ⴰⵣⵣⵔⴰⴼ ⴱⵍⴰ ⵜⴰⵎⵏⵜⵉⵍⵜ ⵉⵜⵜⵢⴰⵇⴱⴰⵍⵏ.

ⴳⴰⵎⴱⵢⴰ ⵜⵙⵎⴰⵢⵏⵓ  ⴰⵏⵏⴰⵍ ⵏⵏⵙ ⵉ ⴳⵣⵉⵏ ⵉ ⵙⵙⵃⵕⴰ ⵜⴰⵎⵖⵔⴱⵉⵜ

ⵉⵙⵎⴰⵢⵏⵓ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵏ ⴳⴰⵎⴱⵢⴰ, ⵎⴰⵎⴰⴹⵓ ⵜⴰⵏⴳⴰⵔⴰ ; ⴰⵙⵍⵉⴷ ⴰⵙⵙⵏⴰⵟⵟ ⴼ ⵕⵕⴱⴰⵟ, ⴰⵏⵏⴰⵍ ⵏ ⵜⵎⴰⵣⵉⵔⵜ ⵏⵏⵙ ⵉ ⵙⵙⵃⵕⴰ ⵜⴰⵎⵖⵔⴱⵉⵜ. ⵉⵙⵙⵍⴽⵏ ⵜⴰⵏⴳⴰⵔⴰ, ⴳ ⵜⵉⵏⴰⵡⵜ ⵜⴰⵏⵖⵎⴰⵙⵜ ⵉⴹⴼⴰⵕⵏ ⵉⵔⵣⵣⵓⵜⵏ ⵏⵏⵙ ⴰⴽⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⵏⴰⵚⵕ ⴱⵓⵕⵉⵟⴰ, ” ⵇⴰ ⴷ ⴰⵔⵣⴰⴼ ⵉⵏⵓ ⴰⵎⴰⴷⴷⵓⴷ ⴰⵎⵣⵡⴰⵔⵓ ⵉ ⵍⵎⵖⵔⵉⴱ ⴷⴼⴼⵉⵔ ⵏ ⵓⵙⵉⵍⵖ ⵏ ⵜⵏⴱⴰⴹⵜ ⵜⴰⵎⴰⵢⵏⵓⵜ ⴳ ⴳⴰⵎⴱⵢⴰ, ⵜⴳⴰ ⵜⵉⴷⵜ ⵉⵙⴱⵏⵏⴰⴷⵏ ⴰⵔ ⵉⵙⴼⴰⵡ ⵉⵃⵎⵢⴰⵙⵙⴰⵜⵏ ⵉⵖⵓⴷⴰⵏ ⴳⵔ ⵜⵎⵉⵣⴰⵔ ⵏⵏⵖ, ⴰⵔ ⵜⵜⵙⴷⴷⴰⵔⵖ ⴰⴷ ⵙⵎⴰⵢⵏⵓⵖ ⴰⵙⴷⴷⵉⴷ ⵙ ⵜⴰⵍⵖⴰ ⵜⴰⵙⴼⴼⵏⴰⵢⵜ ⵉⴼⴰⵡⵏ ⴰⵏⵏⴰⵍ ⵏ ⵜⵎⴰⵣⵉⵔⵜ ⵉⵏⵓ ⵉ ⵙⵙⵃⵕⴰ ⵜⴰⵎⵖⵔⴱⵉⵜ”. ⵉⵙⵎⴰⵢⵏⵓ ⵓⵏⵙⵙⵉⵅⴼ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴳⴰⵎⴱⵉⵜ ⴰⵡⴷ ⴰⵏⵏⴰⵍ ⵏ ⵜⵎⴰⵣⵉⵔⵜ ⵏⵏⵙ ⵏ ⵓⵖⴰⵡⴰⵙ ⵏ ⵓⵏⴱⴰⴹ ⴰⵙⵉⵎⴰⵏ ⵍⵍⵉ ⵉⵙⵎⵎⵜⵔ ⵍⵎⵖⵔⵉⴱ, ⵉⵙⵙⴽⵜⵉ ⵉⵙ ⵜⴳⴰ ⴳⴰⵎⴱⵓⴰ ⵜⴰⵎⴰⵣⵉⵔⵜ ⵜⴰⵎⵣⵡⴰⵔⵓⵜ ⵍⵍⵉ ⵉⵕⵥⵎⴷⵏ ⵜⴰⵙⵇⵓⵏⵙⵓⵜ ⴳ ⵜⵎⴷⵉⵏⵜ ⵏ ⴷⴷⴰⵅⵍⴰ, ⵍⵍⵉ ⵉⴳⴰⵏ ⵜⴰⵙⴳⴰ ⵉⴹⴼⴰⵕⵏ ⵉ ⵡⴰⴽⴰⵍ ⴰⵏⴰⵎⵓⵔ ⵏ ⵍⵎⵖⵔⵉⴱ.

ⵍⴽⵓⵡⴰⵢⵜ ⵜⵙⵎⴰⵢⵏⵓ ⴰⵙⴷⴷⵉⴷ ⵏ ⵡⴰⵏⵏⴰⵍ ⵉ ⵜⴰⵎⵓⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ

ⵉⵙⵎⴰⵢⵏⵓ ⵓⵎⴰⵏⴽ ⵍ ⵍⴽⵓⵡⴰⵢⵜ ⴰⵏⵏⴰⵍ ⵏⵏⵙ ⵉ ⵜⴰⵎⵓⵏⵜ ⵜⴰⵏⴰⴽⴰⵍⵜ ⵏ ⵍⵎⵖⵔⵉⴱ, ⴷ ⵜⵏⴰⵍⵉⵜ ⵏⵏⵙ ⵉ ⵓⵏⴱⴰⴹ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵖⴼ ⵎⴰⵕⵕⴰ ⵉⴽⴰⵍⵏ ⵏⵏⵙ ? ⵉⵙⵙⵍⴽⵏ ⴱⴰⴱ ⵏ ⵡⴰⴷⴷⵓⵔ ⵛⵛⵉⵅ ⵎⵉⵛⵄⴰⵍ ⵍⴰⵃⵎⴰⴷ ⵍⵊⴰⴱⵉⵔ ⵚⵚⴰⴱⴰⵃ, ⴱⴰⴱ ⵏ ⴰⵡⴰⴷⴷⵓⵔ ⴰⴳⵍⴷⵓⵏ ⴰⵎⴰⵔⴰ ⵏ ⵓⴳⵍⴷⵓⵏ ⵏ ⵓⵡⴰⵏⴽ ⵏ ⵍⴽⵓⵡⴰⵢⵜ, ⴰⵙⵍⵉⴷ ⴰⵙⵙⴰⵏⵟ ; ⴽⵓⴷⵏⵏⴰ ⵜ ⵄⵙⵏⵓⴱⴱⴳ ⵄⵍⵉ ⴱⵏⵄⵉⵙⴰ, ⵍⵍⵉ ⴰⵙ ⵉⵙⵙ, ⴽⴷⵏ ⵜⵉⵡⵔⵉⵇⵉⵏ ⵏ ⵓⵙⵎⵎⴰ ⵏⵏⵙ ⴷ ⴰⵎⵙⵇⴰⴷ ⵏⵏⵉⴳ ⵜⵎⵢⵓⵔⵜ ⴷ   ⵍⵎⵓⴼⵡⵡⵉⴹ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴳ ⵓⵡⴰⵏⴽ ⵍ ⵍⴽⵓⵡⴰⵢⵜ, ⴰⴷⴷⴰⴷ ⵏ ⵜⵎⴰⵣⵉⵔⵜ ⵏⵏⵙ ⵉⵏⵏⴰⵍⵏ ⴰⵔ ⵉⵙⵙⴱⵖⴰⵙ ⵜⴰⵎⵓⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵙⵏⵜⴰⵢⵜ ⵏ ⵓⵏⴱⴰⴹ ⴰⵙⵉⵎⴰⵏ ⴳ ⵓⵙⴰⵜⵉ ⵏ ⵜⵉⵏⵏⵓⴱⴹⴰ ⵜⴰⵎⵖⵔⴱⵉⵜ. ⵉⵎⴽⵉⵏⵏⴰ ⵉⵙⵙⵓⵜⵔ ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⵢⵓⴳⴰⵏ ⴳⵔ ⵜⵎⵉⵣⴰⵔ ⵙ ⵍⴰⵡⴰⵏ ⴰⴽⴽⵯ ⴳ ⵢⵉⴳⵔⴰⵏ ⵏ ⵓⵙⵙⴰⵔⵓ ⵏ ⵉⵙⵏⴼⵍⵏ ⵏ ⵜⵙⴱⴱⴰⴱⵜ.

4ⵎⵍⵢⵓⵏ ⵏ ⵓⵎⵖⵔⵉⴱⵉ ⵚⴰⵃⴰⵏ ⵙⴳ ⵓⵎⵏⵏⵓⵖ ⵎⴳⴰⵍ ⵜⴰⵇⴱⴱⴰⵏⵉⵜ ⴳ ⵜⵎⵣⴳⴰⴷⵉⵡⵉⵏ (ⵍⵉⵜⵜⵉⵃⴰⴷ ⵍⵉⵛⵜⵉⵔⴰⴽⵉ ⵉⵏⵏⴰ ⵓⵎⴰⵡⵙⴰⵙ ⵏ ⵜⵙⴱⴷⴰⴷⵉⵏ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰ, ⴰⵃⵎⴰⴷ ⵜⵜⵡⴼⵉⵣⵇ, ⴰⵙⵍⵉⴷ ⴰⵙⵉⵏⴰⵙ, ⵉⵙ ⵉⵍⴽⵎ ⵓⵎⴹⴰⵏ ⴰⵖⵣⵓⵔⴰⵏ ⵏ ⵉⵎⵚⴰⵃⴰⵜⵏ ⵉⵜⵜⵓⵡⵎⵎⴻⵎⵏ ⴳ ⵓⵖⴰⵡⴰⵙ ⵏ ⵓⵚⴼⴰⴹ ⵏ ⵜⵇⴱⴱⴰⵏⵉⵜ ⴳ ⵜⵎⵣⴳⴰⴷⵉⵡⵉⵏ ⵙⴳ ⵓⵙⴳⴳⵯⴰⵙ ⵏ 2000 ⴰⵔ 2022 ⵓⴳⴳⴰⵔ ⵏ 4.206.668 ⵏ ⵓⵎⵚⴰⵃⴰ; ⵉⵙⵙⵎⵜⵔ  ⵉⵙ ⴳⴰⵏⵜ 70% ⵜⵉⵎⵖⴰⵔⵉⵏ. ⵉⵏⵏⴰ ⵜⵜⵡⴼⵉⵇ ⴳ ⵜⵎⵔⴰⵔⵓⵜ ⵏⵏⵙ ⵖⴼ ⵓⵙⵇⵙⵉ ⴰⵎⵉⵡⴰⵏ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵖⴼ “ⵓⵙⵎⴰⵜⴰ ⵏ ⵓⵙⴼⴰⴹ ⵏ ⵜⵇⴱⴱⴰⵏⵉⵜ ⴳ ⵓⵎⴰⴹⴰⵍ ⴰⴼⴰⵔⴰⵏ” ⵉⵙ ⵢⵉⵡⴹ ⵓⵎⴹⴰⵏ ⵏ ⵉⵎⵚⴰⵃⴰⵜⵏ ⵏ ⵓⵖⴰⵡⴰⵙ ⴰ ⴳ ⵓⵎⴰⴹⴰⵍ ⴰⴼⴰⵔⴰⵏ ⵙⴳ ⵎⴰ ⵉⵍⵍⴰ 1.737.786 ⵉⵜⵜⴳⴳⴰⵏ ⴰⵙⵖⵍ ⵏ 41,29 ⴳ ⵜⵉⴳⵎⵉⴹⵉ.

ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⵏ ⵚⵍⵢⵓⵏ : ⵉⵎⵢⴰⵙⵙⴰⵜⵏ ⴰⴽⴷ ⵍⵎⵖⵔⵉⴱ ” ⴷ ⵜⵉⴷⵙⵍⴰⵏⵉⵏ ⴷ ⵜⵙⵜⵔⴰⵜⵉⵊⵉⵢⵉⵏ ⴽⵉⴳⴰⵏ” (ⵍⵉⵜⵜⵉⵃⴰⴷ ⵍⵉⵛⵜⵉⵔⴰⴽⵉ)

ⵉⵙⵙⵍⴽⵏ ⵓⵎⴰⵡⵙⴰⵙ ⴰⵚⴱⵍⵢⵓⵏⵉ ⴼⵉⵔⵏⴰⵏⴷⵓ ⴳⵔⴰⵏⴷⵉ ⵎⴰⵔⵍⴰⵙⴽⴰ ⴰⵙⵍⵉⴷ; ⵉⵙ ⵅⴰⵜⵔⵏⵜ ⵉⵎⵢⴰⵙⵙⴰⵜⵏ ⵍⵍⵉ ⵉⵙⵎⴰⵏⵏ ⵚⴱⵍⵢⵓⵏ ⴷ ⵍⵎⵖⵔⵉⴱ ⴳⵏ ⵉⵙⵜⵔⴰⵜⵉⵊⵉⵢⵏ ⴽⵉⴳⴰⵏ”. ⵉⵏⵏⴰ ⴳⵔⴰⵏⴷⵉ ⵎⴰⵔⵍⴰⵙⴽⴰ, ⵍⵍⵉ ⴷ ⵉⴳⴰⵏ ⴰⵏⴱⴳⵉ ⴳ ⵓⵙⴰⵢⵙ ⵍⵍⵉ ⵜⵣⵓⵣⵣⵓⵔ ⵜⴱⴰⴷⵉⵜ “ⴰⵏⵜⵉⵏⴰ 3″ ” ⵉⵙ ⴳⴰⵏ ⵉⵎⵢⴰⵙⵙⴰⵜⵏ ⵍⵍⵉ ⵉⵙⵎⴰⵏⵏ ⵍⵎⵖⵔⵉⴱ ⵙ ⵚⴱⵍⵢⵓⵏ ⵉⵙⵜⵔⴰⵜⵉⵊⵢⵏ ⵙⵜⴰⵡⵀⵎⵎⴰⵏ ⴽⵉⴳⴰⵏ”. ⵉⵔⵏⵓ ⵓⵎⴰⵡⵙⴰⵙ ⴰⵚⴱⵍⵢⵓⵏⵉ ” ⵏⴽⵯⵏⵉ ⵏⴳⴰ ⴰⵊⵊⴰⵕⵏ ⵜⵙⵎⴰⵏ ⴰⵖ ⵜⵎⵢⵉⵙⴰⵜ ⵏ ⵜⴰⵢⵎⴰⵜ ⵉⴳⵣⵉⵏ. ⵏⴼⵔⴳ, ⴷ ⵏⵙⵓⵍ ⴰⴷ ⵏⴼⵔⴳ ⵖⴼ ⵉⵎⵢⴰⵙⵙⴰⵜⵏ ⵏⵏⵖ, ⴳ ⵓⵢⵏⵏⴰ ⴳ ⵜⵍⵍⴰ ⵜⵏⴰⴼⵓⵜ ⵉ ⵡⴰⵎⵓⵏⵏ ⵏⵏⵖ”, ⵉⵙⵙⵓⵜⴳ ⵜⴰⴷⵉⵏⴰⵎⵉⵜ ⵍⵍⵉ ⵉⵍⵍⴰⵏ ⴳⵔ ⵜⵎⵉⵣⴰⵔ ⵙ ⵖⴼ ⵜⴽⴰⵕⴹⴰ ⵏ ⵓⴱⵔⵉⴷ ⵜⴰⵎⴰⵢⵏⵓⵜ ⵉⵜⵜⵖⵣⵏⵏ ⵙⴳ ⵓⵔⵣⴰⴼ ⵍⵍⵉ ⵉⴳⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵏ ⵚⴱⵍⵢⵓⵏ ⵙⴰⵏⵛⵉⵣ ⵙ ⵍⵎⴱⵔⵉⴱ ⴳ ⵉⴱⵔⵉⵔ ⵉⵣⵔⵉⵏ.

ⴱⵏⵄⵍⵉⵍⵓ ⵉⴰⵇⵇⴰⵔ ⵉ ⵓⵎⴰⴽⴷ ⵏ ⵜⵣⵔⴼⵜ ⵜⴰⵎⵓⵟⵟⵓⵏⵜ ⴳ ⵡⴰⴷⴰⴼ, ⵜⵡⵓⵔⵉⵡⵉⵏ ⵜⵉⵎⵙⵙⵓⴳⴰⵔ (ⴱⴰⵢⴰⵍ ⵍⵢⴰⵡⵎ)

ⵉⵖⵔⴰ ⵓⵎⴰⵣⴰⵏ ⵏ ⵜⴳⵍⴷⵉⵜ ⵎⵓⵃⵎⵎⴰⴷ ⴱⵏⵍⵄⵍⵓ, ⴰⵙⵍⵉⴷ ⴰⵙⵙⴰⵏⵟ ⴰⵙⵉⵏⴰⵏ ⴳ ⵎⵔⵔⴰⴽⵛ, ⵉⵎⴰⵣⴰⵏⵏ ⴷ ⵍⴰⵎⴱⵓⴷⵉⵙⵎⴰⵏ; ⴰⵎⴰⴽⴷ ⵏ ⵜⵣⵔⴼⵜ ⵜⴰⵎⵓⵟⵟⵓⵏⵜ ⴳ ⵡⴰⴷⴰⴼ ⵏ ⵜⴳⵔⵓⵎⵎⴰⵡⵉⵏ  ⵉⴽⵓⴽⴹⵏ ⴷ ⵎⴷⴷⵏ ⵉⵍⵍⴰⵏ ⴳ  ⵡⴰⴷⴷⴰⴷ ⵉⵛⵇⴰⵏ ⵙ ⵜⵡⵓⵔⵉⵡⵉⵏ ⵜⵉⵎⵙⵙⵓⴳⴰⵔ, ⴳ ⵓⵎⴰⵍⵓ ⵏ ⵓⵙⵏⴼⵍ ⴰⵎⵓⵟⵟⵓⵏ ⵉⵜⵜⴹⵎⴰⵏⵏ ⵉⵙⴽⵉⵍ  ⴳ ⵜⵏⵓⴼⴰ. ⵉⴱⴷⵔ ⵓⵙⵉⵡⴹ ⵏ ⵜⵎⵔⵙⵍⵜ ⵏ ⵓⵎⴰⵣⴰⵏ ⵏ ⵜⴳⵍⴷⵉⵜ ⵉⵙ ⵉⴳⴰ ⴱⵏⵄⵍⵉⵍⵓ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⴰⵎⴱⵓⴷⵉⵙⵎⴰⵏ ⴷ ⵉⵎⴰⵣⴰⵏⵏ ⵉⴼⵔⴰⵏⴽⵓⴼⵓⵏⵉⵢⵏ, ⵉⵙⴷⴷⵉⵏ, ⴳ ⵜⵏⵙⵙⵉⵛⴼⵜ ⵏⵏⵙ ⵉ ⵜⵖⵉⵎⵉⵜ ⵏ ⵓⵏⵏⵓⵕⵎ ⵏ ⵓⴳⵔⴰⵡ ⴰⴳⵔⴰⵖⵍⴰⵏ ⵡⵉⵙⵙ ⵢⴰⵏ ⴷ ⵎⵔⴰⵡ ⵏ ⵜⵎⵙⵎⵓⵏⵜ, ⵖⴼ ⵓⵣⵓⵛⵛⵍ ⵏ ⵓⵙⵏⵏⴳⵣⵎ ⵙ ⵜⵎⵢⴰⴷⴰⵙⵜ ⵏ ⵜⵉⵏⵏⵓⵎⵔⴰ ; ⴳ ⵎⴰⵕⵕⴰ ⵜⵉⵙⵏⵜⴰⵢ ⴷ ⵜⵙⵔⵜⵉⵜⵉⵏ ⴷ ⵜⵙⵜⵔⴰⵜⵉⵊⵉⵏ ⵉⵥⵍⵉⵏ ⵏ ⵓⵙⵏⵜⵍ; ⴷ ⵓⵏⵀⵍⵍⴰ ⵉⵍⴰⵇⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵉⵎⵙⵙⵓⴳⵓⵔⵏ ⵏ ⵉⵎⵙⵏⴰⴼⵓⵜⵏ ⴳ ⵓⵙⴰⵜⵉ ⵏ ⵓⴳⵎⵎⵉⵔ ⴷ ⵢⵉⴽⵙⵉⵍ ⴷ ⵜⵣⵔⴼⵜ ⵜⴰⵎⵓⵟⵟⵓⵏⵜ.

ⴷⴰ ⵉⵜⵜⴳⴰⵏⵏⴰ ⵜⵜⵡⴼⵉⵇ ⴰⵙⵉⴷⴷ ⴰⵣⴳⵣⴰⵡ ⵙⴳ ⵜⵙⴳⴳⵯⵉⵏ ⵏ ⵙⵙⴰⵄⵓⴷⵢⴰ ⵉ ⵓⵍⵖⵓ ⵏ ⵡⴰⵜⵉⴳ ⵏ ⵍⵃⵉⴷⵊ

ⵉⵙⵙⵍⴽⵏ ⵓⵎⴰⵡⵙⴰⵙ ⵏ ⵜⵙⴱⴷⴰⴷⵉⵏ ⵏ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ, ⴰⵃⵎⴰⴷ ⵜⵜⴰⵡⴼⵉⵇ, ⵉⵙ ⴷⴰ ⵜⵜⵎⵚⴰⵎⴰⴹ ⵜⵎⴰⵡⴰⵙⵜ ⴰⵀⴰ ⴽⵓⵢⴰⵙⵙ ⴰⴽⴷ ⵜⵙⴳⴳⵯⵉⵏ ⵉⵥⵍⵉⵏ ⴳ ⵜⴳⵍⴷⵉⵜ ⵜⴰⵄⵔⴰⴱⵜ ⵜⴰⵙⴰⵄⵓⴷⵉⵜ ⴳ ⵓⵢⵏⵏⴰ ⵉⵥⵍⵉⵏ ⵙ ⵜⴷⴰⵍⴰ ⵏ ⵜⵡⵓⵔⵉⵡⵉⵏ ⵜⵉⴷⵙⵍⴰⵏⵉⵏ ⵜⵉⵎⵔⵏⵓⵜⵉⵏ ⴳ ⵡⴰⵜⵉⴳ ⵏⵏⵙⵏⵜ. ⵉⵙⴼⴰⵡ ⴰⵃⵎⴰⴷ ⵜⵜⴰⵡⴼⵉⵇ ⴳ ⵜⵎⵔⴰⵔⵓⵜ ⵏⵏⵙ ⵖⴼ ⵓⵙⵇⵙⵉ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵉⵙ ⵜⵎⵎⵓⴷⴷⴰ ⵜⵙⵇⵇⵉⵎⵜ ⵏ ⵜⵎⴰⵡⴰⵙⵜ ⵙ ⵜⴰⴷⴷⵔⵡⵉⵏ ⵜⵉⴼⵓⵥⴰⵕ, ⵉⵎⵉⵍ ⵜⴳⴰ ⵜⴰⵙⵎⵓⵏⵉⵡⵉⵏ ⵉⴳⴳⵓⴷⵉⵏ ⴰⴽⴷ ⵜⵙⴳⴳⵯⵉⵏ ⵜⵉⵙⴰⵄⵓⴷⵉⵢⵉⵏ ⵜⵉⵏⴽⵛⴰⵎ ⴳ ⵓⵙⵏⵎⴰⵍⴰ ⵏ ⵍⵃⵉⴷⵊ ⴰⴷ ⵙⵉⵡⵍⵏ ⵖⴼ ⵉⵎⴰⵢⵏⵓⵜⵏ ⵏ ⵢⵉⵎⵉⵔ ⵜⴰⴼ ⴰⴷ ⵜⵙⴳⵎⴹ ⵜⵉⵎⵢⴰⵇⵇⴰⵏⵉⵏ ⵜⵉⵎⵏⵣⴰⵢⵉⵏ ⵉ ⵓⵙⴼⵍⵙ ⵏ ⵓⵇⴷⵓⵖ ⴷ ⵓⵙⵃⴷⵓⴷⵉ ⵏ ⵡⵓⵛⵛⵉ ⵉ ⵉⵎⵃⴷⵊⴰⵏ ⴳ ⵎⴽⴽⴰ ⴷ ⵍⵎⴰⴷⵉⵏⴰ ⵍⵎⵓⵏⵡⵡⴰⵔⴰ, ⵎⴰⵛⴰ ⵓⵔ ⵜⵓⴼⵉ ⴰⴷ ⵜⵙⴰⴳⴳⵯ ⴰⵜⵉⴳⴳⵏ ⵏ ⵜⵡⵓⵔⵉⵡⵉⵏ ⵜⵉⴷⵙⵍⴰⵏⵉⵏ ⴷ ⵜⵡⵓⵔⵉⵡⵉⵏ ⵜⵉⵎⵔⵏⴰ ⴰⵛⴽⵓ ⵓⵔ ⵜⵏ ⵜⵙⵔⵉⵙ ⵜⵎⴰⵡⴰⵙⵜ ⵏ ⵍⵃⵉⴷⵊ.”

ⵜⴰⵎⵀⵍⵜ ⵏ ⵓⵙⵜⴰⵢ ⴷ ⵓⵙⵉⴷⴼ ⵏ ⵉⵎⵙⵔⴷⴰⵙⵏ ⵜⴻⵜⵜⵓⴳⵓ ⴳ ⵡⴰⴷⴷⴰⴷ ⵉⵖⵓⴷⴰⵏ ⴳ ⴱⵏⵏⴳⵔⵉⵔ (ⵙⵙⵃⵕⴰ ⵜⴰⵎⵖⵔⴱⵉⵜ)

ⵜⴻⵜⵜⵓⴳⵓ ⵜⵎⵀⵍⵜ ⵏ ⵓⵙⵜⴰⵢ ⴷ ⵓⵙⵉⴷⴼ ⵏ ⵉⵙⵔⴷⴰⵙⵏ ⵉ ⵜⵡⵓⵔⵉ ⵜⴰⵙⵔⴷⴰⵙⵜ ⵏ ⵓⵙⴳⴳⵯⴰⵙ ⵏ 2022, ⴳ ⵡⴰⴷⴷⴰⴷ ⵉⵖⵓⴷⴰⵏ ⴳ ⵓⵙⵡⵉⵔ ⵏ ⵡⴰⵎⵎⴰⴷ ⵡⵉⵙⵙ ⴽⵕⴰⴹ ⵉ ⵓⵙⵎⵓⵜⵜⴳ ⵏ ⵉⵙⵔⴷⴰⵙⵏ ⴳ ⵜⵙⵉⵍⴰ ⵏ ⴱⵏⵏⴳⵔⵉⵔ ⵜⴰⵙⵔⴷⴰⵙⵜ (ⵜⴰⵙⴳⴰ ⵏ ⵔⵔⵃⴰⵎⵏⴰ). ⵙⴳ ⵙⵎⵎⵓⵙⵜ ⵏ ⵜⵉⴼⴰⵡⵜ ⵏ ⵡⴰⵙⵙ ⵏ ⵓⵢⵏⴰⵙ ⵉⵣⵔⵉⵏ, ⵙⵙⵏⵜⴰⵏ ⵉⵎⵏⴽⴰⴷⵏ ⵉⵎⵣⵡⵓⵔⴰ, ⴷ ⵉⴷⴷⴰⵏ ⵙⴳ ⵜⵙⴳⴳⵯⵉⵏ ⵏ ⵔⵔⵃⴰⵎⵏⴰ ⴷ ⵇⵍⵄⴰⵜ ⵙⵙⵔⴰⵖⵏⴰ ⴷ ⵍⵢⵓⵙⵓⴼⵉⵢⴰ ⴷ ⵓⵙⴼⵉ, ⴷⴰ ⴷ ⵜⵜⴼⴼⵉⵏ ⵖⴼ ⵓⴽⵛⵛⵓⵎ ⵏ ⵜⵙⵉⵍⴰ ⵏ ⴱⵏⵏⴳⵔⵉⵔ ⵜⴰⵙⵔⴷⴰⵙⵜ, ⴳ ⵉⵙⵏⵎⴰⴷⴷⵓⵜⵏ ⵏ ⵡⴰⵙⵙⴰⵢ ⴰⴳⴷⵓⴷⴰⵏ. ⴷⴼⴼⵉⵔ ⵏ ⵓⵙⵏⴰⵍⴰⵡ ⵏ ⵜⵖⵓⵔⵉⵡⵉⵏ ⴷ ⵜⵎⴰⴳⵉⵜ ⵏ ⴽⵓ ⴰⵎⵏⴽⴰⴷ, ⴷ ⵜⵉⴹⴰⴼ ⵏ ⵜⴼⵔⵉⵙⵉⵏ ⵜⵓⴷⵎⴰⵡⴰⵏⵉⵏ ⴰⴳⵏⵙⵓ ⵏ ⵜⴰⵅⴰⵎⵜ ⵉⵜⵜⵓⵖⵥⴰⵏ ⴳ ⵓⵙⴰⵢⵙ, ⴷⴰ ⴽⵛⵛⵎⵏ ⵉⵎⵏⴽⴰⴷⵏ ⵏ ⵡⴰⵎⵎⴰⵙ ⵏ ⵓⵙⵎⵓⵜⵜⴳ ⴰⴷ ⵙⵏⵜⵉⵏ ⵜⴰⵎⵀⵍⵜ ⵏ ⵓⵙⵏⴰⵍⴰⵡ ⴳ ⵜⵣⵎⵔⵜ ⵜⴰⴼⴳⴳⴰⵏⵜ, ⴷⴰⵜ ⵏ ⴰⴷ ⴰⵙⵏ ⵜⵙⵙⴼⵍⵉⴷ ⵜⵙⵇⵇⵉⵎⵜ ⵉⵥⵍⵉⵏ ⵃⵎⴰ ⴰⴷ ⵜⵙⵙⵏ ⵉⵙ ⵖⵉⵢⵏ ⴰⴷ ⴳⵏ ⵜⴰⵡⵓⵔⵉ ⵜⴰⵙⵔⴷⴰⵙⵜ.

ⵉⵎⵖⵔⴱⵉⵢⵏ ⴳⴰⵏ ⵉⵎⵣⵡⵓⵔⴰ ⵏⵏⴰ ⵉⵣⵎⵎⴻⵎⵏ ⴳ ⵜⵍⴳⴰⵎⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⵏ ⵚⴱⵍⵢⵓⵏ (ⵍⵄⴰⵍⴰⵎ)

ⵙⵙⵓⴼⵖⵏ ⴷ ⵜⵏⵎⵎⴰⵍⵉⵏ ⵏ ⵜⵎⴰⵡⴰⵙⵜ ⵏ ⵓⵙⵉⴷⴼ ⵏ ⵓⵙⴼⵍⵙ ⴰⵏⴰⵎⵓⵏ ⴷ ⵓⵣⵡⴰⴳ ⵏ ⵚⴱⵍⵢⵓⵏ, ⵉⴹⵍⵍⵉ ⴰⴽⵕⴰⵙ, ⵉⵙ ⴷ ⵓⴳⴳⴰⵔ ⵏ 300 ⵏ ⵢⵉⴼⴹ ⵏ ⵓⵎⵖⵔⵉⴱⵉⵢ ⴰⵢ ⴷ ⵉⵣⵎⵎⴻⵎⵏ ⴳ ⵓⵙⵍⴼⵙ ⴰⵏⴰⵎⵓⵏ ⵏ ⵚⴱⵍⵢⵓⵏ ⴰⵔ ⵜⵉⴳⵉⵔⴰ ⵏ ⵉⴱⵔⵉⵔ ⵉⵣⵔⵉⵏ. ⵙ ⵎⴰⵏ ⴰⵢⴰ, ⴳⴰⵏ ⵉⵎⵖⵔⴱⵉⵢⵏ ⵉⵎⵣⵡⵓⵔⴰ ⵏ ⵉⵎⵙⵡⵓⵔⵉⵜⵏ ⵉⵎⵣⵣⴰⵏ ⵙⴳ ⴱⵕⵕⴰ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⵜⵜⴱⵣⴰⵔⵏⵉⵏ ⴳ ⵜⵏⴼⵔⵓⵜ ⵜⴰⵏⴰⵎⵓⵏⵜ ⵏ ⵚⴱⵍⵢⵓⵏ ⵙ ⵓⵎⴹⴰⵏ ⵏ 300 ⵏ ⵢⵉⴼⴹ ⴷ 329 ⵏ ⵓⵎⵍⵜⴰⵖ, ⴹⵓⵕⵏ ⵜⵏ ⵉⵛⵉⵏⵡⵉⵢⵏ (108 ⵏ ⵢⵉⴼⴹ ⴷ 795), ⴷ ⵉⴼⵉⵏⵉⵣⵡⵉⵍⵉⵢⵏ (108 ⵏ ⵢⵉⴼⴹ ⴷ 765). ⴳⵉⵏ ⵉⵕⵓⵎⴰⵏⵉⵢⵏ ⵉⵎⵣⵡⵓⵔⴰ ⴳ ⵉⵎⵣⵣⴰⵏ (340 ⵏ ⵢⵉⴼⴹ ⴷ 641, ⴰⴳⵔⵏ ⵉⵎⵖⵔⴱⵉⵢⵏ (300 ⵏ ⵢⵉⴼⴹ ⴷ 329) ⴷ ⵉⵟⴰⵍⵢⴰⵏⵉⵢⵏ (150 ⵏ ⵢⵉⴼⴹ ⴷ678).

ⵜⵉⴼⵏⵉⵇⵉⵏ ⵏ ⵜⴰⵏⴰⴼⵜ. ⵜⴰⵖⵏⵏⴰⵏⵜ ⵏ ⵓⵙⵖⵓⴷⵓ (ⵍⴰⵃⴷⴰⵜ ⵏ ⵍⵎⵖⵔⵉⴱⵉⵢⴰ)

ⵢⵓⴳⵉ ⵓⵙⵓⵔⴰ ⴰⵎⴰⵣⵣⴳⴰⵔ ⵏ ⵜⵎⴰⴷⴷⴰⵙⵜ ⵜⴰⴷⵉⵎⵓⵇⵔⴰⵟⵉⵜ ⵏ ⵜⵡⵓⵔⵉ  ⵉⵙⴳⴳⴷⵏ “ⵉⵎⵔⵇⵇⵄⵏ” ⵏ ⵜⴼⵏⵉⵡⵉⵏ ⵏ ⵜⴰⵏⴰⴼⵜ ⴷ ⵜⵡⵙⵓⴷⵔⵜ ⵜⵉⵎⴷⵏⴰⵏ ⴷ ⵉⴼⵙⵙⴰⵢⵏ ⵏ ⵓⵣⵔⴰⵜ ⴷ ⵢⵓⴷⴼⵏ ⴷ ⵜⵎⵙⵏⵖⵉⵍⵉⵏ ⵏ ⵓⵙⴳⴳⴷ ⵏ ⵜⴰⵔⴰⵣⵎⵔⵜ ⵏ ⵓⵙⵉⵜⵜⵉ ⵏ ⵡⴰⴳⴳⵯⴰ ⵏⵏⵙ ⵖⴼ ⵉⵎⵙⵖⴰⵏⵏ ⴷ ⵉⵎⵙⵡⵓⵔⵉⵜⵏ. ⵉⵎⴽⵉⵏⵏⴰ ⵉⵙⵎⵉⴳⵍ ⵜⴰⵏⴱⴰⴹⵜ ⴰⴷ ⴷⵉⵖ ⵜⴷⴷⵓ ⵖⵔ ⵉⴼⵙⵙⴰⵢⵏ ⵉⵡⵀⵏⵏ. ⵉⵣⵎⵎⴻⵎ ⵓⵙⵉⵡⴹ ⵏ ⵜⵎⴰⴷⴷⴰⵙⵜ ⵉⴱⴰ ⵏ ⵜⵉⵔⴰⵜ ⵜⴰⵙⵔⵜⴰⵏⵜ ⴳ ⵡⴰⵣⵣⵔⴰⵢ ⵉⵖⵓⴱⴰⵏ ⵏ ⵓⵏⴳⵔⴰⵡ ⵏ ⵜⴰⵏⴰⴼⵜ ⴷ ⵡⴰⴼⴼⴰⵍ ⵏ ⵜⴷⵢⴰⴷⴰⵙⵉⵏ ⵉⴼⵛⵍⵏ ⴳ ⵓⵏⴰⴳⵔⴰⵡ ⵏ ⵜⵡⵙⵓⴷⵔⵜ ⵏ ⵜⴰⵏⴰⴼⵜ ; ⵉⵎⵉⵍ ⵉⵖⵔⴰ ⵙ ⵓⵙⴳⴳⴷ ⴰⵥⴹⵡⴰⵏ ⴰⵖⵣⵓⵔⴰⵏ ⵏ ⵓⵏⴰⴳⵔⴰⵡ ⵏ ⵜⴰⵏⴰⴼⵜ ⴳ ⵍⵎⵖⵔⵉⴱ, ⵃⵎⴰ ⴰⴷ ⵜⵜⵓⵙⵡⵓⵜⵜⵓⵏ ⵉⵏⴷⵍⴰⴼ ⵏ ⵢⵉⵙⴽⵉⵍⵏ ⴷ ⵓⵙⴷⵓⵙ ⵏ ⵜⵙⵓⵍⴰⵏⵜ ⵜⴰⵥⵕⴼⴰⵏⵜ ⵙⴳ ⵉⵙⴼⵔⵉⵖⵏ ⴷ ⵉⵥⵍⴰⵢⵏ ⴷ ⵔⵔⵉⵄ ⴷ ⵜⴼⵏⵉⵇⵉⵏ ⵜⵉⵏⴳⴰⵍⵉⵏ ⴷ ⵓⵙⴳⵓⴼⵙ ⴷ ⵢⵉⴱⴰ ⵏ ⵉⵎⴰⵙⵙⵏ ⵏ ⵓⵙⵡⵓⴷⴷⵓ ⵏ ⵉⵎⵉⵣⵉⵜⵏ.

ⵉⵎⵓⵔⴰ ⵉⵎⵖⵔⴱⵉⵢⵏ ⴷⴰ ⵙⵇⵙⴰⵏ ⵉⴽⵏⵉⵡⵏ ⵏⵏⵙⵏ ⵏ ⵓⵕⵓⴱⴱⴰ ⵖⴼ ⵜⵕⵥⵉⵡⵉⵏ ⵏ ⵉⵣⵔⴼⴰⵏ ⵏ ⴼⵓⴳⴰⵏ ⴳ ⵜⵎⵔⵙⵉⵡⵉⵏ ⵏ ⵜⵉⵏⴷⵓⴼ (ⵍⴰⵃⴷⴰⵜ ⵏ ⵍⵎⵖⵔⵉⴱⵉⵢⴰ)

ⵙⵇⵙⴰⵏ ⵉⵎⴰⵔⴰ ⵉⴱⵕⵍⴰⵎⴰⵏⵏ ⵉⵎⵖⵔⴱⵉⵢⵏ, ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⵍⵎⵖⵔⵉⴱ-ⵜⴰⵎⵓⵏⵜ ⵏ ⵓⵕⵓⴱⴱⴰ, ⴰⵙⵍⵉⴷ ⴰⵙⵙⴰⵏⵟ ⵉⴽⵏⵉⵡⵏ ⵏⵏⵙⵏ ⵏ ⵓⵕⵓⴱⴱⴰ ⵖⴼ ⵜⵕⵥⵉⵡⵉⵏ ⵉⵜⵜⵉⵍⵉⵏ” ⴷ “ⵡⴰⴷⴷⴰⴷ ⵉⵅⵛⵏⵏ” ⵏ ⵉⵣⵔⴼⴰⵏⵏ ⵏ ⵓⴼⴳⴰⵏ ⴳ ⵜⵎⵔⵙⵉⵡⵉⵏ ⵏ ⵜⵉⵏⴷⵓⴼ, ⵉⴼⴼⵓⵇ ⵓⴳⵎⵉⴹ ⵏ ⴷⵣⴰⵢⵔ, ⵉⵎⵉⵍ, ⵙⴳ ⵜⵎⵔⴰⵡⵉⵏ, ⵏ ⵉⵙⴳⴳⵯⴰⵙⵏ ⴰⵢⴰ ; ⵉⴼⵙ ⵏ “ⵉⵎⵣⵡⴰⴳⵏ”. ⵉⵙⴱⵏⵏⴷ ⵍⵃⵙⵏ ⵃⴷⴷⴰⴷ, ⴰⵏⵙⵙⵉⵅⴼ ⵉⵙⵙⴰⵔⵏ ⵉ ⵜⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵛⵛⴰⵔⵏ ⴳⵔ ⵍⵎⵖⵔⵉⴱ ⴷ ⵓⵕⵓⴱⴱⴰ ⵉⵎⵓⵏⵏ, ⴳ ⵜⴱⵔⴰⵜ ⵉⵜⵜⵢⴰⵡⴰⵏⵏ ⵉ ⵉⵎⵓⵔⴰ ⵏ ⵓⵕⵓⴱⴱⴰ, ⵉⵙ ‘ ⵉⵖ ⵉⵙⵏⵏⴳⵣⵎ ⵡⴰⴷⴷⴰ ⴰ ⵏⴽⵯⵏⵉ ⵉⵎⴰⵔⴰ ⵉⵎⵖⵔⴱⵉⵢⵏ, ⵉⵎⵉⵍ ⵢⴰⵏ ⵓⵎⵓⵔ ⴰⵅⴰⵜⴰⵔ ⵏ ⵉⵎⵣⴷⴰⵖ ⵉⵜⵜⵢⴰⵡⴰⵥⵏ ⴳ ⵜⵎⵔⵙⵉⵡⵉⵏ ⵏ ⵜⵉⵏⴷⵓⴼ ⴳⴰⵏ ⵉⵚⵃⵔⴰⵡⵉⵢⵏ ⵉⵎⵖⵔⴱⵉⵢⵏ”. ⵉⵙⴼⴰⵡ, ⴳ ⵓⵙⴰⵜⴰⵍ ⴰ, ⵉⵙ ⴷⴰ ⵜⵙⵉⵟⵟⵉⵏ ⴷⵣⴰⵢⵔ ⵉⵚⵃⵕⴰⵡⵉⵢⵏ ⵉⵎⵖⵔⴱⵉⵢⵏ (ⴷ ⵡⵉⵢⵢⴰⴹ ⴷ ⵉⴷⴷⴰⵏ ⵙⴳ ⵜⵙⴳⴰ ⵏ ⵙⵙⴰⵃⵉⵍ) ⵖⴼ ⵡⴰⴽⴰⵍ ⴰⴷⵣⴰⵢⵔⵉ ⴷ ⵉⵎⵣⵡⴰⴳ”, ⴰⵔ ⵜⵏ ⵉⵙⵙⵉⵟⵟⵉⵏ ⵍⵎⵖⵔⵉⴱ ⴷ ⵉⵎⵣⴷⴰⵖ ⵉⵜⵜⵢⴰⵎⴰⵥⵏ ⵙ ⵉⵖⵏⴰⵏ ⴳ ⵜⵎⵔⵙⵉⵡⵉⵏ ⵏ ⵜⵉⵏⴷⵓⴼ.

ⵎⴰⴱ 19 ⵎⴰⵢⵢⵓ 2022