ⴰⵙⴰⴷⵖ ⴰⴷⵎⵙⴰⵏ ⵏ ⵉⵄⵔⵔⵉⵎⵏ ⵙⴳ ⵜⵎⵣⵡⵓⵔⴰ ⵏ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵓⵙⴱⵓⵖⵍⵓ ⴰⵏⴼⴳⴰⵏ ( ⴰⵊⵓⵔⴷⵡⵉ ⵍⵓⵎⴰⵔⵓⴽ)

ⵉⵙⵙⵏⵜⵎ ⵍⵡⴰⵍⵉ ⴰⵎⵣⴷⴰⵢ ⵏ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵓⵙⴱⵓⵍⵓ ⴰⵏⴼⴳⴰⵏ, ⵎⵓⵃⵎⵎⴰⴷ ⴷⵔⴷⵓⵔⵉ, ⵉⵙ ⵜⵡⴰⵜⵙ ⵜⵙⵏⵜⴰⵢⵜ ⵍⵍⵉ ⵎⵉ ⵉⵕⵥⵎ ⴱⴰⴱ ⵏ ⵡⵓⴷⴷⵓⵔ ⴷⴰⵜ 18 ⵏ ⵓⵙⴳⴳⵯⴰⵙ ⴳ ⵜⴼⵔⴽⵜ ⵏⵏⵙ ⵜⵉⵙⵙ ⴽⵕⴰⴹⵜ “ 11 ⵏ ⵜⴳⵔⵓⵎⵎⴰ ⵜⴰⵏⴰⵎⵓⵏⵜ”. ⵉⵎⴽⵉⵏⵏⴰ ⵉⵏⵏⴰ ⴷⵔⴷⵓⵔⵉ, ⴰⵎⴰⵢⵏⵓ ⴳ ⵜⴼⵔⴽⵜ ⴰ ⵉⴳⴰ ⵜ ⵓⵙⵏⵏⵣⴳⵎ ⵙ “ ⵓⴷⴳⴰⵔ ⴰⵏⴼⴳⴰⵏ”. ⵉⵍⵍⴰ ⴰⵡⴷ ⵓⵙⵏⴰⵍ ⵏ ⵉⵡⴷⴰⵏ ⵉⴽⵔⴼⵙⵏ, ⵙ ⵓⵎⴰⵜⴰ ⴳ ⵡⴰⵎⵎⴰⵙ ⴰⴼⴰⵔⴰⵏ. ⵜⵡⴰⵜⵙ ⵜⴼⵔⴽⵜ ⴰ ⴰⵡⴷ ⴰⵙⵖⵓⴷⵓ ⵏ ⵓⵙⴰⴷⴼ ⵏ ⵉⵄⵔⵔⵉⵎⵏ ⴳⵔ ⵜⴳⵔⵓⵎⵎⴰ ⵜⵉⵏⴰⵎⵓⵏⵉⵏ ⵉⵜⵜⵓⵡⴰⵜⵙⵏ ⵙ 11. ⵉⵏⵏⴰ ⵍⵡⴰⵍⵉ ⴰⵎⵣⴷⴰⵢ ⴰⵏⴰⵎⵓⵔ ⵏ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵓⵙⴱⵓⵖⵍⵓ ⴰⵏⴼⴳⴰⵏ ⵉⵙ ⴱⴰⵀⵔⴰ ⵉⵖⵓⴷⴰ ⵓⵙⵙⵉⵜⴳ ⵏ ⵜⴼⵔⴽⵜ ⴰ ⴽⵉⴳⴰⵏ ⵙ 18600 ⵏ ⵓⵏⵖⵏⵓ ⴷ 6000ⵏ ⵜⴰⵢⴰⵏⵜ ⵜⴰⵙⴳⵎⴰⵏⵜ ⴷ 10 ⵎⵍⵢⵓⵏ ⴷⵔⵀⵎ ⵏ ⵓⵏⴱⴰⴹ ⵉ ⵉⴷ ⵍⵡⴰⵍⵉ ⴷ ⵉⵏⴱⴱⴰⴹⵏ.

ⴰⴼⴰⵔⵙ ⴰⵙⵉⵎⴰⵏ ⵏ ⵜⵣⵎⴰⵔⵜ ⵏ ⵜⵔⵉⵙⵉⵏⵜⵉ: ⴰⵙⴰⵜⵉ ⴰⵎⴰⵢⵏⵓ ⵉⵙⵙⴱⵖⴰⵙⵏ (ⵍⵉⴽⵓⵏⵓⵎⵉⵙⵜ)

ⵉⵜⵜⵓⵙⵏⴽⴷ, ⵜⵉⴳⵉⵔⴰ ⴰ, ⵓⵙⵖⵏⵓ ⵏ ⵓⵙⵍⴳⵏ ⵉⵥⵍⵉⵏ ⵏ ⵓⴼⴰⵔⵙ ⴰⵙⵉⵎⴰⵏ ⵏ ⵜⵣⵎⴰⵔⵜ ⵏ ⵜⵔⵉⵙⵉⵏⵜⵉ ⴷⴰⵜ ⵏ ⵜⵙⵇⵇⵉⵎⵜ ⵏ ⵜⵉⵚⴽⴰⵡⵉⵏ ⵜⵉⴷⵙⵍⴰⵏⵉⵏ ⵏ ⵜⵣⵎⴰⵔⵜ ⴷ ⵡⴰⵍⴷⵓⵏⵏ ⴷ ⵜⵡⵏⵏⴰⴹⵜ ⴳ ⵓⵙⵇⵇⵉⵎ ⵏ ⵉⵎⴰⵔⴰⵏ. ⵖⵓⵔ ⵜⵎⴰⵡⵙⴰⵙⵜ ⵏ ⵓⵎⵎⴰⵜⵜⵉ ⴰⵏⵣⵎⴰⵔ ⴷ ⵓⵙⴱⵓⵍⵖⵓ ⴰⵙⵓⵍⴰⵏ, ⵍⴰⵢⵍⴰ ⴱⵏⵄⵍⵉ, ⵉⴳⴰ ⵓⴹⵕⵉⵚ ⴰ ⴰⵙⴰⵜⵉ ⴰⵎⴰⵢⵏⵓ ⵉⵙⵙⴱⵖⴰⵙⵏ ⴷ ⵓⵣⵎⵣⵣⵓ ⵢⴰⴽⴽⴰⵏ ⵏ ⵢⵉⴳⵔ ⵓⵙⵍⵉⴳ ⵏ ⵓⵙⵙⴰⵔⵓ ⴳ ⵢⵉⴳⵔ ⵏ ⵜⵣⵎⴰⵔⵜ ⵏ ⵜⵔⵉⵙⵉⵏⵜⵉ. ⵔⴰⴷ ⵢⴰⵡⵙ ⵓⵙⵖⵏⵓ, ⵉⵎⴽⵉⵏⵏⴰ ⵜⵔⵏⴰ ⵜⵎⴰⵡⵙⴰⵙⵜ, ⴳ ⵓⵙⵖⵏⵓ ⵏ ⵉⵙⵓⵍⴼⵏ ⵏ ⵜⵡⵓⵔⵉ ⵉⵎⴰⵢⵏⵓⵜⵏ ⴳ ⵢⵉⴳⵔ ⵏ ⵓⵙⵖⵉⵡⵙ ⵏ ⵓⵣⵣⴳⵉⵔ ⴷ ⵓⵙⵢⴰⴼⵓ ⵏ ⵉⵙⵔⴰⵏ ⵏ ⵓⴼⴰⵔⵙ ⴰⵙⵉⵎⴰⵏ ⵏ ⵜⵔⵉⵙⵉⵏⵜⵉ ⵖⵓⵔ ⵜⵎⵙⵙⵏⵜⴰⵢ ⵍⵍⵉ ⵉⵜⵜⵓⴳⴰⵏ ⵉ ⵙⵓⴽⴽⵉⵏ ⴰ. ⴰⵡⵜⵜⴰⵙ ⵉⴳⴰ ⵜ ⴰⵙⴱⵓⵖⵍⵓ ⵏ ⵜⴷⴰⵎⵙⴰ ⵜⴰⵏⴰⵎⵓⵔⵜ ⵜⴰⵣⴳⵣⴰⵡⵜ ⵎⵉ ⵉⴷⵔⵓⵙ ⵓⴽⴰⵔⴱⵓⵏ.

ⵉⵎⵙⵡⵓⴷⴷⵓⵜⵏ ⵏ ⵉⵙⵉⵔⵎⵏ ⵏ ⵜⵓⵚⴽⴰ ⴷ ⵜⵡⵓⵔⵉⵡⵉⵏ ⵜⵉⴳⴷⵓⴷⴰⵏⵉⵏ ⵓⵔ ⵎⵎⵉⵔⵏ ⵙ ⵓⵎⵔⵙⵓⵎ ⵉⵥⵍⵉⵏ ⵙ ⵜⵏⵎⴰⵇⵇⴰⵙⵉⵏ ⵜⵉⴳⴷⵓⴷⴰⵏⵉⵏ (ⵍⵉⴽⵓⵏⵓⵎⵉⵙⵜ)

ⵓⵔ ⵎⵎⵉⵔⵏ ⵉⵎⵙⵡⵓⴷⴷⵓⵜⵏ ⵏ ⵜⵓⵚⴽⴰ ⴷ ⵜⵡⵓⵔⵉⵡⵉⵏ ⵜⵉⴳⴷⵓⴷⴰⵏⵉⵏ ⵙ ⵜⵓⵏⵖⵉⵍⵜ ⵜⴰⵎⵉⵔⴰⵏⵜ ⵏ ⵓⵙⵖⵏⵓ ⵉⵥⵍⵉⵏ ⵙ ⵜⵏⵎⴰⵇⵇⴰⵙⵉⵏ ⵜⵉⴳⴷⵓⴷⴰⵏⵉⵏ. ⴳ ⵓⵙⴰⵜⴰⵍ ⴰ, ⵜⵙⵙⴽⵏ ⵜⵎⵙⵎⵓⵏⵜ ⵏⵏⵙⵏ (LABTP) ⵉⵙⴷⴷⵉⵜⵏ ⵏ ⵉⵙⵏⵉⵖⵉⵙⵏ ⵍⵉ ⵜⴼⴽⴰ ⵜⵉⴳⵉⵔⴰ ⴰ ⵉ ⵜⵎⴰⵡⵙⴰⵙⵜ ⵏ ⵓⵎⴰⵡⴰ ⴷ ⵡⴰⵎⴰⵏ ⴷ ⵓⵙⴱⴰⵢⵏⵓ ⴰⴳⴷⵓⴷⴰⵏ ⵏ ⵜⴳⵍⴷⵉⵜ ⴷ ⵓⵙⴰⵜⵉ ⵏ “ ⵓⵙⵖⵓⴷⵓ ⵏ ⵓⵏⵣⵡⵉ ⵏ ⵜⵡⵓⵔⵉⵡⵉⵏ ⴷ ⵓⵕⵥⵥⵓⵎ ⵖⴼ ⵉⵎⴷⵔⴰⵡⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ”. ⵏⵏⵉⴳ ⵓⵙⵢⵉⵙⵙⵏ ⵓⵏⵚⵉⴱ ⵙ ⵜⴰⵣⵣⵓⵍⵜ ⵏ ⵓⵙⵉⵔⵎ ⵏ ⵜⵓⵚⴽⴰ ⴳ ⵓⵙⵖⵏⵓ ⵏ ⵓⵎⵔⵙⵓⵎ, ⵜⵍⴷⵉ ⵜⵎⵙⵎⵓⵏⵜ, ⵜⵖⴰⵡⵙⵉⵡⵉⵏ ⵢⴰⴹⵏ, ⵜⴰⵖⴹⴼⵜ ⵏ ⵜⵏⴱⴰⴹⵉⵏ ⵙ ⵜⵉⴷⵜ ⵏⵡⵉⵙ ⴷ ⵉⵙⵏⴼⵍⵏ ⵉⵇⵇⴰⵏ ⴷ ⴰⴷ ⵟⵟⴰⵚⵏⵜ ⴰⵡⴷ ⵉⴹⵕⵉⵚⵏ ⵉⵎⵙⵙⵓⴷⵙⵏ ⵉⵇⵇⵏⵏ ⵙ ⵓⵎⵔⵙⵓⵎ ⵏ ⵜⵉⴽⴽⵉ ⵏ ⵜⵏⵎⴰⵇⵇⴰⵙⵉⵏ ⵜⵉⴳⴷⵓⴷⴰⵏⵉⵏ, ⵙ ⵍⴰⵡⴰⵏ ⴰⴽⴽⵯ ⴰⵍⵓⴳⵏ ⵏ ⵜⴼⴰⴷⵉⵡⵉⵏ ⵜⵉⵎⵙⵙⵓⴳⴰⵔ ⵜⵉⴳⴷⵓⴷⴰⵏⵉⵏ ⵜⵉⵙⵍⵉⴳⵉⵏ ⵏ ⵜⵏⵎⴰⵇⵇⴰⵙⵉⵏ ⵉⵥⵍⵉⵏ ⵙ ⵜⵡⵓⵔⵉⵡⵉⵏ ⵏ ⵜⵣⵔⴰⵡⵉⵏ ⴷ ⵜⵓⴱⴷⴷⴰ ⵖⴼ ⵜⵡⵓⵔⵉⵡⵉⵏ.

ⴼⴰⵙ ⵎⴽⵏⴰⵙ ⵍⴱⴰⵏⴽⴰ ⵏ ⵉⵙⵖⵏⵓⵜⵏ: 160 ⵎⵍⵢⵓⵏ ⴷⵔⵀⵎ ⵉ ⵓⵙⴷⵓⵙ ⵏ ⵡⴰⴱⴰⴹ ⴰⵎⴳⵓⵔⴰⵏ ⵏ ⵜⵙⴳⴰ ( ⵍⵉⵣⴰⵏⵙⴱⵉⵔⴰⵙⵢⵓⵏ ⵉⴽⵓ)

ⵉⵙⵙⴳⵎⴹ ⵓⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ ⵔⵓⵢⵢⴰⴹ ⵎⵥⵡⴰⵕ, ⴳ ⴼⴰⵙ ⴰⴽⴷ ⵉⵎⵙⴽⴰⵔⵏ ⵏ ⵜⵎⴳⵓⵔⵉ ⵉⴷⵖⵔⴰⵏⵏ ⵎⵔⴰⵡ ⵏ ⵜⵎⵢⴰⵇⵇⴰⵏⵉⵏ ⵏ ⵓⵙⵙⴰⵔⵓ ⵔⴰⴷ ⵜⵜⵓⵣⵣⴳⵔⵏⵜ ⴳ ⵜⵎⵏⴰⴹⵜ ⵏ ⴼⴰⵙ ⵎⴽⵏⴰⵙ. ⵙ ⵓⵊⵊⵓⵊⴷ ⵏ 160 ⵎⵍⵢⵓⵏ ⴷⵔⵀⵎ, ⵔⴰⴷ ⵉⵖⵏⵓ ⵓⵎⴳⴳⴰⵔⵓ ⴰ ⴰⵜⵜⴰⵢⵏ ⵏ 520 ⵏ ⵜⵡⵓⵔⵉⵜⵓⵙⵔⵉⴷⵉⵏ. ⵉⵖⵔⴰ ⵓⵎⴰⵡⵙⴰⵙ, ⴳ ⵓⵙⴳⵎⴹ, ⴰⵢⵜ ⵜⵎⵙⵙⵏⴰⵜⴰⵢⵉⵏ ⵉⵎⵙⴰⵃⴰⵜⵏ ⵏ  ⵓⵎⵡⵡⵍ ⴰⴷ ⵙⵏⵓⵍⴼⵓⵏ ⵙⴳⵉⴷⵉⵏ ⴳ ⵉⵙⵖⵏⵓⵜⵏ ⵙ ⵓⵙⴷⵓⵙ ⵏ ⵓⵥⵟⵟⴰ ⵏ ⵜⵎⵙⵙⵓⵔⵉⵏ ⵜⵉⵎⵥⵥⴰⵏⵉⵏ ⴳ ⵜⵙⴳⴰ ⴳ ⵡⴰⴱⴰⴹ ⴰⵎⴳⵓⵔⴰⵏ ⵏ ⵜⴳⵍⴷⵉⵜ.

ⴰⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵣⵏ ⴰⵙⵖⵏⵓ ⵏ ⵓⵎⵔⵙⵓⵎ ⵉ!ⵣⵍⵉⵏ ⵙ ⵜⵎⴰⵎⴽⵉⵏ ⵏ ⵜⵉⴳⴳⵉ ⵖⴼ ⵓⵎⵙⴰⵙⴰ ⵏ ⵜⵓⵏⵖⵉⵍⵉⵏ ⵏ ⵜⵏⵜⴰⵎⵉⵏ ⵉ ⵉⵙⴰⵍⴰⵏ ⵏⵏⵙⵏⵜ ( ⵍⵉⵣⴰⵏⵙⴱⵉⵔⴰⵙⵢⵓⵏ ⵉⴽⵓ)

ⵉⵙⵖⵣⵏ ⵓⵙⵇⵇⵉⵎ ⵏ ⵜⵏⴱⴰⴹⵜ, ⵍⵍⵉ ⵉⵍⵍⴰⵏ ⵉⴹⵏⵏⴰⵟ ⵏ ⵓⴽⵡⴰⵙ, ⴰⵙⵖⵏⵓ ⵏ ⵓⵎⵔⵙⵓⵎ ⵓⵟⵟⵓⵏ 2.22.48 ⵉⵥⵍⵉⵏ ⵙ ⵓⵙⵡⵓⵜⵜⵓ ⵏ ⵜⵎⴰⵎⴽⵉⵏ ⵏ ⵜⵉⴳⴳⵉ ⵖⴼ ⵓⵎⵙⴰⵙⴰ ⵏ ⵜⵓⵏⵖⵉⵍⵉⵏ ⵏ ⵜⵏⵜⴰⵎⵉⵏ ⵉ ⵉⵙⴰⵍⴰⵏ ⵏⵏⵙⵏ. ⵉⵏⵏⴰ ⵓⵎⴰⵡⵙⴰⵙ ⴰⵎⴰⵍⴰⵍ ⵖⵓⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⴽⵍⵍⴼⵏ ⵙ ⵉⵎⵢⴰⵙⵙⴰⵜⵏ ⴰⴽⴷ ⵓⴱⵔⵍⴰⵎⴰⵏ, ⴰⵎⵙⵙⵉⵡⵍ ⵙ ⵢⵉⵙⵎ ⵏ ⵜⵏⴱⴰⴹⵜ ⵎⵚⵟⴰⴼⴰ ⴱⴰⵢⵜⵜⴰⵙ, ⴷ ⵜⵉⵏⴰⵡⵜ ⵜⴰⵏⵖⵎⴰⵙⵜ ⴷⴼⴼⵉⵔ ⵜⴰⵙⵎⵓⵏⵉ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ, ⵉⵙ ⴷ ⵉⴷⴷⴰ ⵓⵙⵖⵏⵓ ⵏ ⵓⵎⵔⵙⵓⵎ ⴰ ⵍⵍⵉ ⵉⵙⵙⵏⴽⴷ ⵎⴰⵙⵙ ⵎⵓⵃⵎⵎⴰⴷ ⵃⵊⵡⵉ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵏⴱⴰⴹⵜ,  ⴳ ⵓⴷⵖⴰⵔ ⵏ ⵓⵎⴰⵡⵙⴰⵙ ⵏ ⵓⴳⵏⵙⵓ, ⴰⴷ ⵢⵓⵎⵓ ⴳ ⵓⵙⴷⵓⵙ ⵏ ⵓⵙⴷⴷⵉ ⵏ ⵓⵙⵜⵔⴰⵔ ⵏ ⵜⵎⵙⵙⵓⴳⵓⵔⵜ ⵜⴰⴳⴷⵓⴷⴰⵏⵜ ⴷ ⵓⵙⴼⵔⴰⵔ ⵏ ⵜⵖⴰⵔⴰⵙⵉⵏ ⴷ ⵉⵙⵎⵓⴹⵏ ⵏⵏⵙⵏⵜ, ⵙ ⵜⵉⴳⴳⵉ ⵏ ⵜⵖⴰⵔⴰⵙⵉⵏ ⵏ ⵓⵙⵡⵓⴷⴷⵓ ⴰⴽⵎⴰⵎ ⴳ ⵢⵉⴳⵔ ⵏ ⵓⵎⵙⴰⵙⴰ ⵏ ⵜⵓⵏⵖⵉⵍⵉⵏ ⵏ ⵜⵏⵜⴰⵎⵉⵏ ⵉ ⵉⵙⴰⵍⴰⵏⵏ ⵏⵏⵙⵏⵜ, ⵙ ⵜⵔⵏⵉ ⵏ ⵜⵓⵎⵙⵉⵙⵜ ⵏ ⵜⵏⴰⴼⵓⵜ ⴰ ⴰⴽⴷ ⵡⴰⵍⴰⵢⵏ ⵏ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ ⴷ ⵓⵙⵜⵔⴰⵔ ⵏ ⵢⵉⴳⵔⵏ ⵏⵏⵙ ⴷ ⵓⵙⵖⵓⴷⵓ ⵏ ⵜⵏⵓⴼⴰ ⵏⵏⵙ, ⵙ ⵓⵢⴰ ⴰⴷ ⵔⴱⵄⵏ ⴰⴽⵓⴷ ⴷ ⵜⵖⴰⵔⴰ ⴷ ⵜⵉⵕⵡⵉ.

ⴰⵙⵙⵔⵡⵍ, ⵙⵍⵉⵄⵜ ⵉⵥⵡⵡⵕⵏ, ⴰⴷⵔⵉⵎ ⴰⵏⵣⵎⴰⵔ : ⵜⴰⵏⴰⵟⵟⵓⴼⵜ ⵉⵜⵜⵢⴰⵎⴰⵥⵏ ⴳ ⵓⵙⴳⴳⵯⴰⵙ 2021 ( ⵓⵊⵓⵔⴷⵡⵉ ⵍⵓⵎⴰⵔⵓⴽ)

ⵜⵏⵏⴰ ⵜⵎⵙⵙⵓⴳⵓⵔⵜ ⵏ ⵜⴷⵉⵡⴰⵏⵜ, ⴳ ⵓⵏⵇⵇⵉⵙ ⵖⴼ ⵜⵉⵍⴰⵍⵜ ⵏ ⵓⵙⴳⴳⵯⴰⵙ ⵏ 2021, ⵉⵙ ⵟⵟⴼⵏⵜ ⵜⵏⵓⴼⴰ ⵏⵏⵙ ⵉⵎⵊⵔⵉⵢⵏ ⵏ ⵙⵍⵉⵄⵜ ⵙⵙⵔⵡⵍⵏ ( ⴰⴽⵜⵜⴰⵏ, ⵜⵉⵎⵍⵙⴰ, ⵉⴱⵓⵔⴽⵙⵏ ⵏ ⵜⵓⵏⵏⵓⵏⵜ, ⵉⴰⵜⵜⵉⵡⵏ, ⵉⵎⴰⵙⵙⵏ ⵉⵍⵉⴽⵟⵔⵓⵏⵉⵢⵏ, ⵉⴼⴰⵔⵙⵏ ⵏ ⵡⵓⵛⵛⵉ, ⵜⴰⵢⴰⵏⵉⵏ ⵏ ⵢⵉⵔⵉⵎ ⵏ ⴽⵓⴼⵉⴷ 19 … ⴰⵔⴳ)  ⵙ ⵡⴰⵜⵉⴳ ⵏ 152 ⵎⵍⵢⵓⵏ ⴷⵔⵀⵎ, ⵎⴳⴰⵍ 242 ⵎⵍⵢⵓⵏ ⵏ ⴷⵔⵀⵎ ⴳ ⵓⵙⴳⴳⵯⴰⵙ ⵏ 2020. ⴳ ⵓⵢⵏⵏⴰ ⵉⵥⵍⵉⵏ ⵙ ⵓⵎⵏⵏⵓⵖ ⵎⴳⴰⵍ ⵙⵍⵉⵄⵜ ⵜⴰⵎⵥⵡⵡⵕⵜ, ⵟⵟⴼⵏⵜ ⵜⵏⵓⴼⴰ ⵏ ⵜⴷⵉⵡⴰⵏⵜ  740.120 ⵏ ⵙⵍⵉⵄⵜ ⵉⵥⵡⵡⵕⵏ ⴳ ⵓⵙⴳⴳⵯⴰⵙ ⵏ 2021 ⵙ ⵡⴰⵜⵉⴳ ⵉⵍⴽⵎⵏ 26.75 ⵎⵍⵢⵓⵏ ⴷⵔⵀⵎ. ⵉⵎⴽⵉⵏⵏⴰ ⵜⵜⵓⵙⵎⴽⵍ 619 ⵏ ⵜⵓⵜⵜⵔⴰ ⵖⴼ ⵓⵙⴱⴷⴷ ⵏ ⵓⵣⵣⵏⵣ ⵉⵍⴻⵍⵍⵉ ⵏ ⵙⵍⵉⵄⵜ ⵍⵍⵉ ⵢⵓⵔⴷⴰⵏ ⵉⵙ ⵥⵡⵡⵕⵏⵜ, ⵜⵜⵓⵣⵣⴳⵔⵏ 97 ⵏ ⵜⵎⴳⴳⵉⵜ ⵏ ⵡⴰⴳⴰⵍ. ⵉⵎⴽⵉⵏⵏⴰ ⵜⵟⵟⴼ ⴰⵜⵉⴳⵏ ⵏ ⵓⴷⵔⵉⵎ ⴰⵏⵣⵎⴰⵔ ⴳ ⵜⵎⵙⴽⵉⵔⵉⵏ ⵏ ⵜⵉⴹⴰⴼ ⵏ ⵉⵏⵎⵓⴷⴷⴰ, ⵉⵜⵜⵢⴰⵎⵥ 58 ⵎⵍⵢⵓⵏ ⴷⵔⵀⵎ ⵎⴳⴰⵍ 40.6 ⵎⵍⵢⵓⵏ ⴷⵔⵀⵎ ⴳ ⵓⵙⴳⴳⵯⴰⵙ 2020.

ⴰⴷⴰⴼ ⵙ ⵡⵓⵎⵍⵉ ⵖⴼ ⵓⵣⵡⴰⴳ . . ⵜⵄⵏⵚⵕ ⴱⵓⵄⵢⵢⴰⵛ ⴳ ⵏⵢⵓⵢⵓⵔⴽ ⵜⵉⵍⴰⵍ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ( ⴰⵍⴱⴰⵢⴰⵏ)

ⵜⵙⴼⴰⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎⵉⵏⴰ ⴱⵓⵄⵢⵢⴰⵛ, ⴰⵙⵍⵉⴷ ⴰⵙⵙⴰⵏⵟ ⵏ ⵓⴽⵕⴰⵙ ⴳ ⵏⵢⵓⵢⵓⵔⴽ, ⵜⵉⵎⵍⴰⵍⵉⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵜⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵡⴰⴷⴰⴼ ⵖⵔ ⴰⵏⵖⵎⵉⵙ ⵉⵥⵍⵉⵏ ⵙ ⴰⵣⵡⴰⴳ. ⵜⵏⵏⴰ ⴱⵓⵄⵢⵢⴰⵛ, ⴳ ⵜⴷⴰⴱⵓⵜ ⵜⴰⵎⵜⴻⵜⵜⴰⵢⵜ ⵍⵍⵉ ⵉⵍⵍⴰⵏ ⴳ ⵓⵙⴰⵜⵉ ⵏ ⵓⴳⵔⴰⵡ ⴰⵎⵣⵡⴰⵔⵓ ⵉⵜⵜⵓⴳⴰⵏ ⵖⴼ ⵓⵣⵔⴰⵡ ⵏ ⵜⴰⵣⵣⵉⴳⵣⵜ ⵉⵍⵍⴰⵏ ⴳ ⵓⵣⵣⴳⵉⵔ ⵏ ⵜⵏⵜⴰⵎⵜ ⵜⴰⵎⴰⴹⵍⴰⵏⵜ ⵉ ⵓⵣⵡⴰⴳ ⵏ ⵍⵎⴰⵏ ⵉⵙⵙⵓⴷⵙⵏ ⵉⵜⵜⵢⴰⵙⵙⵏ ⵙ ⵢⵉⵙⵎ ⵏ ⵜⵏⵜⴰⵎⵜ ⵏ ⵎⵔⵔⴰⴽⵛ, “ ⵜⴰⵖⵓⵍ ⵜⵎⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵎⵎⵔⵏⴰ, ⵜⴰⵖⵓⵍ ⵜⴳⴰ ⴰⵙⴰⴳⵎ ⴷ ⵓⵎⵙⴰⵜⵜⵉ ⵏ ⵉⵏⵖⵎⵉⵙⵏ ⵙ ⵓⵥⵍⴰⵢ ⴳ ⵓⵎⵢⴰⵡⴰⴹ ⵓⵙⵔⵉⴷ ⴰⴽⴷ ⵉⵎⵎⵡⴰⴳⵏ ⴷ ⵡⴰⵎⵓⵏ ⵓⵖⵔⵉⵎ.”

ⴱⴰⴱⴰ ⴰⴼⵓⵥⴰⵕ ⴼⵔⴰⵏⵙⵉⵙ : ⵜⴰⵏⴱⴰⴹⵜ ⵜⵉⵏⵥⵉⵥⵜ ⴷ ⵜⵥⵉⵍⵍⴰ ⵏ ⵓⴳⵍⵍⵉⴷ ⵍⴰⵏⵜ ⵖⵓⵏⵔⵖ ⴰⵜⵉⴳ ⴰⵎⵇⵔⴰⵏ ( ⵎⴰⵔⵓⴽ ⵍⵓⵊⵓⵔ)

ⵉⵃⵇⵇⴰ ⵓⴼⵓⵥⴰⵕ ⴱⴰⴱⴰ ⴼⵔⴰⵏⵙⵉⵙ, ⴰⵙⵉⵍⴷ ⴰⵙⵙⵏⴰⵜ ⵏ ⵓⴽⵕⴰⵙ, ⴷⴷⴰⴳ ⵉⵙⵏⵓⴱⴱⴳ ⴰⵎⵛⵛⵉⵡⵕ ⵏ ⴱⴰⴱⴰ ⵏ ⵡⴰⴷⴷⵓⵔ, ⴰⵏⴷⵔⵉ ⴰⵥⵓⵍⴰⵢ, ⵍⵍⵉ ⴷ ⵉⴷⴷⴰⵏ ⴰⴷ ⵉⵣⵣⵓⵍ ⵖⴼ ⵓⵎⵇⵔⴰⵏ ⵏ ⵉⵎⴰⵙⵉⵃⵉⵢⵏ ⴰⴼⵓⵥⴰⵕ ⴱⵓⵟⵕⵓⵙ ⴳ ⵓⴱⴰⵔⴰⵣ ⵏ ⵍⴱⴰⵜⵉⴽⴰⵏ, “ ⵜⴰⵏⴱⴰⴹⵜ ⵜⵓⵏⵥⵉⵥⵜ ⴷ ⵜⵥⵉⵍⵍⴰ ⵏ ⵓⴳⵍⴷⵓⵏ ⵏ ⵉⵏⴼⵍⴰⵙⵏ, ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⵍⴰⵏⵜ ⵖⵓⵔⵏ ⴰⵜⵉⴳ ⴰⵅⴰⵜⴰⵔ”. ⵉⵙⵙⵍⴽⵎ ⵏⵏ ⵓⵥⵓⵍⴰⵢ ⵍⵍⵉ ⵉⵎⴰⵏⵏ ⴷ ⵔⴰⵊⴰⴻ ⵏⴰⵊⵉ ⵎⴽⴽⴰⵡⵉ, ⵜⴰⵎⵙⵇⴰⴷⵜ ⵏ ⵍⵎⵖⵔⵉⴱ ⵖⵓⵔ ⵍⴱⴰⵜⵉⴽⴰⵏ, ⴷ ⵓⵙⵍⵎⴰⴷ ⵄⴱⴹⵍⵍⴰ ⵓⵣⵉⵜⴰⵏ, ⴰⵏⵙⵙⵉⵅⴼ ⵏ ⵡⴰⵎⵎⴰⵙ ⵏ ⵉⵔⵣⵣⵓⵜⵏ ⴷ ⵜⵣⵔⴰⵡⵉⵏ ⵖⴼ ⵓⵙⵍⴳⵏ ⵏ ⵡⵓⴷⴰⵢⵏ ⴳ ⵜⴰⴷⴷⴰⵔⵜ ⵏ ⵜⵎⴽⵜⵉⵜ, ⵉ ⴱⴰⴱⴰ ⴰⴼⵓⵥⴰⵔ, ⵉⵣⵣⵓⵍⵏ ⵏ ⵜⴰⵢⵎⴰⵜ ⴷ ⵜⴰⵢⵔⵉ ⵉⵖⴱⴰⵏ ⵏ ⴱⴰⴱⴰ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⵉⵙⵙⴽⵜⵉ ⵙ ⵓⴷⵔⵉⵣ ⴰⵎⵣⴰⵔⴰⵢⵏ ⵓⵔⵣⴰⴼ  ⵏ ⴱⴰⴱⴰ ⴼⵔⴰⵏⵙⵉⵙ ⵙ ⵍⵎⴰⵖⵔⵉⴱ ⴳ ⵎⴰⵕⵚ 2019.

ⵜⵓⵚⴽⴰⵡⵉⵏ : ⴰⵖⵓⵍⵏ ⵡⴰⵜⵉⴳⴳⵏ ⵖⴼ ⴷⴼⴼⵔ ⵙ ⵓⵙⵖⵍ ⵏ 4.9 % ⴳ ⵜⴽⴽⵓⵥⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ 2022 (ⵎⴰⵔⵓⴽ ⵍⵓⵊⵓⵔ)

ⵉⵏⵏⴰ ⵓⴱⴰⵏⴽ ⵏ ⵍⵎⵖⵔⵉⴱ ⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵜⵙⵃⴹⴰⵡⵜ ⵜⴰⴼⵔⴽⴰⵏⵜ ⴷ ⵓⵙⵖⵍ ⴰⴼⵔⴽⴰⵏ ⴷ ⵜⴽⴰⵕⵜⵉⴳⵔⴰⴼⵜ, ⵉⵙ ⵜⴰⵖⵓⵍ ⵜⵎⴰⵜⴰⵔⵜ ⵏ ⵡⴰⵜⵉⴳⴳⵏ ⵏ ⵉⵙⴰⵍⴰⵏ ⵉⴼⵔⴽⴰⵏⵏⵏⴳ ⵜⴽⴽⵓⵥⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ 2022 ⵙ ⵓⵙⵖⵍ ⵏ 4.9% ⵖⴼ ⵓⴷⴰⵙⵉⵍ ⴰⵙⴳⵯⵙⴰⵏ. ⵉⵙⴼⴰⵡ ⵓⴱⴰⵏⴽ ⵏ ⵍⵎⵖⵔⵉⴱ ⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵜⵙⵃⴹⴰⵡⵜ ⵜⴰⴼⵔⴽⴰⵏⵜ ⴷ ⵓⵙⵖⵍ ⴰⴼⵔⴽⴰⵏ ⴷ ⵜⴽⴰⵕⵜⵉⴳⵔⴰⴼⵜ, ⴳ ⵜⵎⵙⵙⴽⵜⵉⵜ ⵖⴼ ⵜⵏⵉⵍⴰⵡⵉⵏ ⵜⵉⵎⴰⵜⴰⵢⵉⵏ ⵏ ⵓⴳⴷⵣ ⵏ ⵜⵓⵚⴽⴰⵡⵉⵏ ⴳ ⵜⴽⴽⵓⵥⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ 2022, ⵉⵙ ⴷⴰ ⵉⵙⵙⴽⴰⵏ ⵡⵓⵖⵓⵍ ⴰ ⵖⴼ=ⵔ ⴷⴼⴼⵔ ⵏ ⵡⴰⵜⵉⴳⴳⵏ ⵓⴳⵓⵣ ⵙ ⵓⵙⵖⵍ ⵏ 5.8% ⵉ ⵓⵣⴷⵓⵖ, ⴷ 2.9% ⵉ ⵉⴽⴰⵍⵏ ⴷ 8.6% ⵉ ⵡⴰⵢⴷⴰⵜⵏ ⵏ ⵓⵙⵎⵔⵙ ⴰⵣⵣⵓⵍⴰⵏ.

ⵜⴰⵏⴱⴰⴹⵜ ⵜⴰⵣⵔⴼⴰⵏⵜ ⵜⵙⴷⵓⵙ ⴰⵙⵎⵓⵜⵜⴳ ⴷⴰⵜ ⵏ ⵓⵙⵖⵣⵏ ⵖⴼ ⵓⵙⵍⴳⵏ ⴰⵏⴱⴽⴰⴹ ⴰⵎⴰⵢⵏⵓ (ⵍⵓⴱⵉⵏⵢⵓⵏ)

ⴷⴰ ⵜⴻⵜⵜⵏⴼⴰⵍ ⵜⵣⵔⴼⵜ ⵜⴰⵎⵖⵔⴱⵓⵢⵜ ⴱⴷⴷⴰ ⴰⴽⴷ ⵜⵎⵔⵏⵉⵡⵜ ⵏ ⵡⴰⵎⵓⵏ, ⵙ ⵍⴰⵡⴰⵏ ⴰⴽⴽⵯ ⴳ ⵜⵖⴰⵔⴰⵙⵜ ⵏⵏⵙ ⵏ ⵓⵣⵣⴳⵉⵔ ⵏ ⵓⵙⵍⴳⵏ. ⵜⵄⵡⵡⵍ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵣⵔⴼⴰⵏⵜ ⵖⴼ ⵓⵙⵎⵓⵜⵜⴳ ⵏ ⵓⴳⵎⴰⵎ ⴰⵣⵔⴼⴰⵏⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴰⵢⵢⵓⵔⵏ ⵉⵖⵣⵣⵉⴼⵏ ⴰⴷ ⵜⵜⵓⴳⴰⵏⵜ ⵜⵙⵓⵜⴰⵍ ⵏ ⵓⵙⵎⵓⵜⵜⴳ, ⴳ ⵜⴰⵎⵓ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⵍⵍⵉ ⵉⵜⵜⵓⵙⵏⵎⴰⵍⴰⵏ ⴳ 18 ⵎⴰⵕⵚ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵏ ⵜⴳⵎⵉ ⵏ ⵜⵣⵎⵎⴰⵔ ⵏ ⵉⵏⵣⵣⵓⵔⴼⴰ. ⵉⵣⴷⵉ ⵓⵢⴰ ⵙ ⵓⵙⵎⵓⵜⵜⴳ ⵏ ⵉⵏⵣⵣⵓⵔⴼ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⵏ ⵉⵏⵣⵣⵓⵔⴼⴰ ⵏ ⵓⵏⴱⴰⴹ ⴰⴷ ⵎⵓⵏⵏ ⴷ ⵓⵎⴰⵢⵏⵓⵜⵏ ⵏ ⵜⵓⴳⵔⵉⵡⵜ ⵜⴰⵏⴱⴽⴰⴹⵜ ⵍⵍⵉ ⴷ ⵉⵇⵇⵏ ⴰⴷ ⵜⵎⵙⵉⵙⵉ ⴰⴽⴷ ⵡⵓⵔⵉⵡ ⴰⵣⵔⴼⴰⵏ ⴷ ⵉⵙⴱⴷⴰⴷⵏ ⵉⵎⴰⴹⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵜⴰⴽⵔⵣⴰ : ⴰⵕⵥⵥⵓⵎ ⵏ ⵓⴱⴰⵏⴽ ⴰⵎⴰⵢⵏⵓ ⵏ ⵉⵊⵉⵏⵏ ( ⵍⵓⴱⵉⵏⵢⵓⵏ)

ⵉⵜⵜⵢⴰⵕⵥⴰⵎ, ⴰⵙⵍⵉⴷ ⴰⵙⵙⵏⴰⵟ ⴰⴽⵕⴰⵙ ⴳ ⵕⵕⴱⴰⵟ, ⵓⴱⴰⵏⴽ ⴰⵎⴰⵢⵏⵓ ⵏ ⵉⵊⵉⵏⵏ ⵉⴹⴼⴰⵕⵏ ⵉ ⵡⴰⵎⵎⴰⵙ ⴰⴳⵔⴰⵖⵍⴰⵏ ⵏ ⵉⵔⵣⵣⵓⵜⵏ ⵏ ⵡⵓⵥⴰⵏ ⴳ ⵜⵎⵏⴰⴹⵉⵏ ⵉⵣⵡⴰⵏ ( ⵉⴽⴰⵔⴷⴰ), ⴳ ⵜⴼⵓⴳⵍⴰ ⵍⵍⵉ ⵉⵙⵏⴰⵅⴼ ⵎⵓⵃⵎⵎⴰⴷ ⵚⴹⴹⵉⵇⵉ ⴰⵎⴰⵡⵙⴰⵙ ⵏ ⵜⴽⵔⵣⴰ ⴷ ⵜⴳⵎⵔⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ. ⵉⵜⵜⵓⴳⴰ ⵓⴱⴰⵏⴽ ⵏ ⵉⵊⵉⵏⵏ, ⵍⵍⵉ ⵢⴰⵎⵓⵏ ⴳ ⵓⵙⴰⵜⵉ ⵏ ⵜⵣⵎⵎⴰⵔ ⵜⵉⵏⴰⵎⵓⵔⵉⵏ ⵏ ⵓⴼⵔⴰⴳ ⵖⴼ ⵉⵙⵓⴳⴰⵎ ⵏ ⵓⵎⵏⵏⵓⵖ ⵎⴳⴰⵍ ⵉⵏⴰⵥⴰⵕⵏ ⵏ ⵜⵏⴼⵔⵓⵜ ⵏ ⵡⵓⵛⵛⵉ ⴷ ⵉⵙⴷⵉⴷⴷⵉⵢⵏ ⵉⵥⵍⵉⵏ ⵙ ⵉⵙⵏⴼⵍⵏ ⵏ ⵓⵏⵣⵡⴰⵢ, ⵙ ⵓⵡⵜⵜⴰⵙ ⵏ ⵓⵙⵎⵓⵏ ⵏ ⵓⵙⵓⴳⴰⵎ ⵏ ⵉⵊⵉⵏⵏ ⵉⴷⴷⵔⵏ ⴷ ⵓⴼⵔⴰⴳ ⵏⵏⵙⵏ ⴷ ⵓⵙⴱⵓⵖⵍⵓ ⵏⵏⵙⵏ ⵃⵎⴰ ⴰⴷ ⵏⴼⵔⴳ ⵉ ⵜⵎⵢⴰⵏⴰⵡⵜ ⵜⴰⴱⵢⵓⵍⵓⵊⵉⵜ ⵏ ⵡⵓⵥⴰⵏ ⴳ ⵉⴽⴰⵍⵏ ⵉⵣⵡⴰⵏ. ⵉⵏⵏⴰ ⵎⴰⵙⵙ ⵚⴰⴹⵉⵇⵉ, ⴳ ⵡⴰⵡⴰⵍ ⵏⵏⵙ ⴳ ⵜⴼⵓⴳⵍⴰ ⵏ ⵓⵕⵥⵥⵓⵎ ⵍⵍⵉ ⴳ ⵉⵍⵍⴰ ⵓⵏⵎⵀⴰⵍ ⴰⵎⴰⵜⴰⵢ ⵏ ⵍⵉⴽⴰⵔⴷⴰ ⵎⴰⵙⵙ ⵄⵍⵉ ⴰⴱⵓⵙⴱⵄ, “ⴳⴰⵏ ⵉⵙⵓⴳⴰⵎ ⵏ ⵉⵊⵉⵏⵏ ⴰⵢⴷⴰ ⵉⵍⴰⵏ ⴰⵜⵉⴳ ⵎⵇⵇⵓⵔⵏ, ⵉⴼⵓⴽⴽ ⴰⴷ ⴰⵙⵏ ⵏⴼⵔⴳ.”

ⵜⵉⴳⴳⵉ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⴳ ⵓⵙⴰⵜⵉ ⵏ ⵜⵎⵢⴰⵇⵇⴰⵏⵜ ⵏ ⵓⵎⵓⵙⵙⵓ ⴳⵔ ⵍⵎⵖⵔⵉⴱ ⴷ ⴱⵕⵟⵇⵇⵉⵣ (ⵍⴱⴰⵢⴰⵏ)

ⵉⵎⵙⴰⵙⴰ ⵓⵎⴰⵡⵙⴰⵙ ⵏ ⵓⵙⵉⴷⴼ ⴰⴷⵎⵙⴰⵏ ⴷ ⵜⵎⵙⵙⵏⵜⵉⵜ ⵜⴰⵎⵥⵥⵢⴰⵏⵜ ⴷ ⵜⵡⵓⵔⵉ ⴷ ⵜⵙⵓⴳⴰⵔ, ⵢⵓⵏⵙ ⵙⵙⴽⴽⵓⵔⵉ, ⴷ ⵓⵎⴰⵔⴰ ⵏ ⵓⵡⴰⵏⴽ ⴰⴱⵔⵟⵇⵇⵉⵣ ⵏ ⵜⵡⵓⵔⵉ, ⵎⵉⴳⵉⵍ ⴼⵓⵏⵜⵉⵙ, ⴰⵙⵍⵉⴷ ⴰⵙⵙⵏⴰⵟ ⵏ ⵓⴽⵕⴰⵙ ⴳ ⵎⵔⵔⴰⴽⵛ, ⵖⴼ ⵓⵙⵔⵓⵙ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⴳ ⵓⵙⴰⵜⵉ ⵏ ⵜⵎⵢⴰⵇⵇⴰⵏⵜ ⵏ ⵓⵎⵓⵙⵙⵓ ⵉⵜⵜⵓⵚⴳⵎⴹⵏ ⴳ 12 ⵉⵏⵏⴰⵢⵔ 2022 ⴳⵔ ⵍⵎⵖⵔⵉⴱ ⴷ ⴱⵔⵟⵇⵇⵉⵣ. ⵎⵙⴰⵙⴰⵏ ⵙⵉⵏ ⵉⵎⴰⵙⴰⵢⵏ ⵓⵏⵉⴱⴹⵏ ⴳ ⵓⵙⵉⵡⴹ ⵉⵙⵙⴰⵔⵏ ⵍⵍⵉ ⴷ ⵉⴼⴼⵖⵏ ⴰⵡⴰⵔⵏⵉ ⵉⵎⵙⵉⵡⵉⵍⵏ ⵏⵏⵙⵏ ⴳ ⵜⴰⵎⴰ ⵏ ⵜⵙⵎⵓⵏⵉ ⵜⴰⵎⴰⵡⵙⴰⵙⵜ ⵜⵉⵙⵙ ⵙⵎⵎⵓⵙ ⵏ ⵜⴰⵎⵓⵏⵜ ⵉ ⵓⴳⵔⴰⴽⴰⵍ ⵖⴼ ⵓⵙⵡⵓⵔⵉ ⴷ ⵜⵡⵓⵔⵉ, ⵖⴼ ⵓⵙⵔⵓⵙ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵎⵉ ⴳⴳⵓⵜⵏ ⵢⵉⴳⵔⴰⵏ, ⵍⵍⵉ ⵔⴰⴷ ⵉⵎⵓⵏⵏ ⵙ ⵓⵙⵙⵓⴷⵙ ⴰⵔⴷ ⵜⴻⵜⵜⵓⵙⵖⵣⵏⵜⵎⵢⴰⵇⵇⴰⵏⵜ ⵏ ⵓⵎⵓⵙⵙⵓ. ⵔⴰⴷ ⵜⵓⵎⴰ ⵜⵔⴰⴱⴱⵓⵜ ⴰ ⵉⴳⵎⴰⵎⵏ ⵙⴳ ⵉⴱⵔⵙⵉⵔⴰ ⵏ ⵜⵏⴱⴰⴹⵜ ⵍⵍⵉ ⵥⴰⵕⵙ ⵉⵣⴷⵉⵏ, ⴰⵙⵉⵏⴰⴳ ⴰⴱⵔⵟⵇⵇⵉⵣ ⵏ ⵓⵙⵡⵓⵔⵉ ⴷ ⵓⵙⵍⵖⵎⴰⵢ ⴰⵣⵣⵓⵍⴰⵏ ⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵙⵉⴷ ⵏ ⵜⵡⵓⵔⵉ ⴷ ⵜⵙⵓⴳⴰⵔ.

ⴰⵙⵉⵔⴰ ⴰⵏⴰⵎⵓⵔ ⴰⵎⵖⵔⴱⵉ ⵏ ⵜⵎⴰⵍⵍⴰⵢⵜ ⵉⵜⵜⴳⴳ ⴰⵙⵓⵙⵙⵏ ⵉ ⵜⵏⵉⵍⴰ ⵏ ⵜⴳⵍⴷⵉⵜ ⴳ ⵍⵓⵏⴷⵓⵏ ( ⴰⵍⵢⴰⵡⵎ ⵍⵎⴰⵖⵔⵉⴱⵉ)

ⵉⵎⵙⴰⴳⴰⵔ ⴷⵉⵖ ⵓⵙⵉⵔⴰ ⴰⵏⴰⵎⵓⵔ ⴰⵎⵖⵔⴱⵉ ⵏ ⵜⵎⴰⵍⵍⴰⵢⵜ ⴰⵙⵍⵉⴷ ⴰⵙⵙⴰⵏⵟ ⴳ ⵍⵓⵏⴷⵓⵏ, ⴰⴽⴷ ⵙⵉⵏ ⵉⵎⴳⴳⴰⵢⵏ ⵉⴱⵕⵉⵟⴰⵏⵉⵢⵏ ⴳ ⵢⵉⴳⵔ ⵏ ⵓⵎⵓⴷⴷⵓ, ⴳ ⵓⵙⴰⵜⵉ ⵏ ⵜⴼⵔⴽⵜ ⵜⵉⵙⵙ ⵙⵏⴰⵜ ⵏ ⵜⵙⵓⵜⵍⵜ “ ⵍⴰⵢⵜ ⵜⵓⵔ”, ⵍⵍⵉ ⵉⵡⴰⵜⵙⵏ ⴰⴹⴼⴰⵕ ⵏ ⵜⵙⴱⴱⴰⴱⵜ ⵏ ⵓⵎⵣⵉⵣⵣⵍ ⵏⵏⵙ ⵏ ⵓⵎⵢⴰⵡⴰⴹ ⴰⵎⴰⵢⵏⵓ ‘ ⵍⵎⵖⵔⵉⴱ, ⴰⴽⴰⵍ ⵏ ⵉⵙⴰⴷⴷⵏ”. ⴷ ⵎⵏⵉⴷ ⵏ ⴽⵔⴰ ⵏ ⵉⵏⴱⴳⴰⵡⵏ ⵉⵥⵍⵉⵏ, ⵉⵙⵙⵏⴽⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⵙⵉⵔⴰ ⴰⵏⴰⵎⵓⵔ ⴰⵎⵖⵔⴱⵉ ⵏ ⵜⵎⴰⵍⵍⴰⵢⵜ, ⵄⴰⵖⵉⵍ ⵍⴼⴰⵇⵉⵔ, ⵉⵣⵔⵉⵔⵉⴳⵏ ⵉⵅⴰⵜⴰⵔⵏ ⵏ ⵓⵎⵣⵉⵣⵣⵍ ⵏ ⵓⵙⵓⵙⵙⵏ ⴰⵎⴰⵢⵏⵓ ⵏ ⵜⴳⵍⴷⵉⵜ, ⵉⵎⴽⵉⵏⵏⴰ ⵉⵙⴰⵡⵍ ⵙ ⵜⵎⴰⵎⴽⵜ ⵏ ⵡⴰⵍⴰⵙ ⵙ ⵓⵙⴷⵖⵔ ⵏ ⵜⵎⴰⵜⴰⵔⵜ ⵏ ⵍⵎⵖⵔⵉⴱ. ⵥⵕⴰⵏ ⵉⵎⵙⵙⵓⴷⵙⵏ ⵏ ⵜⵏⵢⵓⴷⴷⵓⵜⵉⵏ ⵏ ⵜⵎⴰⵍⵍⴰⵢⵜ ⴷ ⵉⵎⴳⴳⴰⵢⵏ ⴳ ⵢⵉⴳⵔ ⴷ ⵉⴳⵏⵙⴰⵙ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⵜⴰⵡⵓⵔⵉ ⵉⵜⵜⵓⴳⴰⵏ ⵙⵖⵓⵔ ⵓⵙⵉⵔⴰ ⴰⵏⴰⵎⵓⵔ ⴰⵎⵖⵔⴱⵉ ⵏ ⵜⵎⴰⵍⵍⴰⵢⵜ ⴳ ⴽⵕⴰⴹ ⵉⵙⴳⴳⵯⴰⵙⵏ ⵉⵣⵔⵉⵏ, ⵓⵍⴰ ⵜⵉⵥⵉⴹⴰⵕ ⵏ ⵜⴳⵍⴷⵉⵜ ⴷ ⵓⴷⵖⴰⵔ ⵏⵏⵙ ⵉⴷⵓⵙⵏ ⴳ ⵓⴳⴰⴷⴰⵣ ⴰⵎⴰⴹⵍⴰⵏ.

ⴰⵙⴰⴳⵔⴰⵡ “ ⵍⴼⵓⴱⵔⵉⵍ” ⵉⴼⴽⴰ ⵉ ⵓⴳⵍⵍⵉⴷ “ ⵜⴰⵙⵎⵖⵓⵔⵜ ⵉⵙⴽⵉⴱⵓⵍⴰⵙ ⵏ ⵓⴼⵔⴰ” ‘ ⵍⵓⵎⴰⵜⵜⴰⵏ)

ⵉⴼⴽⴰ ⵓⵙⴰⴳⵔⴰⵡ ⵏ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵓⵎⴷⴰ ⵏ ⴽⴰⵔⴰⵢⵉⴱ ⴷ ⵎⵉⴽⵙⵉⴽⴽⵓ (ⴼⵓⴱⵔⵉⵍ),ⴰⵙⵙⴰⵏⴹ ⵏ ⵓⴽⵡⴰⵙ, “ ⵜⴰⵙⵎⵖⵓⵔⵜ ⵉⵙⴽⵉⴱⵓⵍⴰⵙ ⵏ ⵍⴰⵎⴰⵏ” ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⵍⵍⵉ ⵉⴳⴰⵏ ⵜⴰⵎⵖⵓⵔⵜ ⴰⴽⴽⵯ ⵢⴰⵜⵜⵓⵢⵏ ⵍⵍⵉ ⵢⴰⴽⴽⴰ ⵓⴳⵔⴰⵡ ⴰ. ⵜⴻⵜⵜⴼⵉⴽⴰ ⵜⵙⵎⵖⵓⵔⵜ ⴰ ⵉ ⵓⴳⵍⵍⵉⴷ ⵙ ⵜⵖⵜⴰⵙⵜ ⵍⵍⵉ ⵉⵜⵜⵓⵙⵖⵣⵏⵏ ⴳ ⵕⵕⴱⴰⵟ, ⴳ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⵓⵙⵍⵉⴷⵜ ⵜⵉⵙⵙ 26 ⵏ ⵓⵙⴰⴳⵔⴰⵡ ⵍⵍⵉ ⵎⵉ ⵉⵙⵏⵓⴱⴱⴳ ⵓⴱⵕⵍⴰⵎⴰⵏ ⴰⵎⵖⵔⴱⵉ ⵜⵉⵡⵓⵔⵉⵡⵉⵏ ⵏⵏⵙ ⴳⵔ 19 ⴷ21 ⵎⴰⵢⵢⵓ ⵡⴰⵏⵉⵜⴰ. ⵉⵎⴽⵉⵏⵏⴰ ⵜⵙⴱⴰⵢⵏ ⵜⵖⵜⴰⵙⵜ ⵏ “ ⴼⵓⴱⵔⵉⵍ” ⵍⵍⵉ ⴳ ⵉⴳⴰ ⵓⴱⵕⵍⴰⵎⴰⵏ ⴰⵎⵖⵔⴱⵉ ⴰⴳⵎⴰⵎ ⴰⵎⵙⵏⵉⵖⵙ ⵙⴳ ⵓⵙⴳⴳⵯⴰⵙ ⵏ 2014, ⵉⵙ ⵉⴳⴰ “ ⵓⵙⵙⵎⵖⵔ ⴰ ⴷ ⵓⵙⵅⵉⵔⵜ ⵉ ⵜⵉⵏⵥⴻⵥⵜ ⵏ ⵜⵄⵥⵥⵉⵜ ⵏ ⴱⴰⴱ ⵏ ⵡⴰⵓⴷⴷⵓⵔ ⴰⴳⵍⵍⵉⴷ ⵍⵍⵉ ⵜ ⵢⵉⵡⵉⵏ ⴰⴷ ⵢⴰⵍⵍ ⵜⴰⵎⴰⵜⴰⵔⵜ ⵏ ⵜⵏⴰⴼⵓⵜ ⵜⴰⵎⴰⵜⴰⵢⵜ ⵄⵎⴰ ⴰⴷ ⵉⴽⴽⵙ ⵉⵎⵣⴰⵔⴰⵢⵏ ⴷ ⵜⵡⴰⴷⴰ ⵙ ⵓⵙⴱⴷⴷ ⵏ ⵓⴼⵔⴰ ⴳⵔ ⵉⴳⴷⵓⴷⵏ.”

ⴰⵙⵏⴽⴷ ⵏ ⵜⵥⵕⵉⴳⵜ ⵜⵉⵙⵙ ⵙⵏⴰⵜ ⵏ ⵓⴷⵍⵉⵙ “ ⵙⵙⵃⵔⴰ ⵜⴰⵎⵖⵔⴱⵉⵜ” ⵏ ⵓⵎⵢⴰⵔⵓ ⵀⵓⴱⵉⵔⵜ ⵙⴰⵢⵓⵏ ‘ ⵍⵓⵎⴰⵜⵜⴰⵏ)

ⵜⵙⵏⵎⴰⵍⴰ ⵜⵎⵙⵇⴰⴷⵜ ⵜⴰⵎⴰⵜⴰⵢⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⴱⵓⵔⴷⵓ, ⴰⵙⵍⵉⴷ ⴰⵙⵙⴰⵏⵟ ⵏ ⵓⴽⵕⴰⵙ, ⴰⵙⵏⴽⴷ ⵏ ⵜⵥⵕⵉⴳⵜ ⵜⵉⵙⵙ ⵙⵏⴰⵜ ⵏ ⵓⴷⵍⵉⵙ “ ⵙⵙⵃⵕⴰ ⵜⴰⵎⵖⵔⴱⵉⵜ” ⵏ ⵓⵎⴰⵔⴰ ⵀⵓⴱⵉⵔⵜ ⵙⴰⵢⵓⵏ, ⴰⵙⵍⵎⴰⴷ ⴰⵏⴱⵓⵔⵣ ⵏ ⵓⵣⵔⴼ ⴷ ⵓⵎⵙⵜⴰⵏ ⴳ ⵓⴳⵔⴰⵡ ⵏ ⴱⴰⵔⵉⵣ. ⵉⴱⴷⵔ ⵓⵙⵉⵡⴹ ⵏ ⵜⵎⵙⵇⴰⴷⵜ ⵏ ⵜⴳⵍⴷⵉⵜ ⴳ ⴱⵓⵔⴷⵓ, ⵉⵙ ⵜⴳⴰ ⵜⵉⵏⴰⵡⵜ ⴰ ⵍⵍⵉ ⵉⵙⵎⴰⵙⵙ ⵓⵎⵙⵇⴰⴷ ⴰⵎⴰⵜⴰⵢ ⵏ ⵍⵎⵖⵔⵉⴱ ⴳ ⵜⵎⴷⵉⵜ ⴰ, ⴰⵃⵎⴰⴷ ⵏⵓⵔⵉ ⵙⴰⵍⵉⵎⵉ, ⴰⵣⵎⵣⵣⵓ ⵉ ⴽⵉⴳⴰⵏ ⵏ ⵉⵏⵎⵖⵓⵔⵏ ⵉⵙⵔⵜⴰⵏⵏ ⴷ ⵉⴷⵖⵔⴰⵏⵏ ⵉⵜⵜⵢⴰⵙⵙⵏ ⴳ ⵜⵎⵏⴰⴹⵜ “ⵏⵓⴼⵉⵍ ⴰⴽⵜⵉⵏ”, ⴰⴷ ⵉⵙⵉⵏⵏ ⴰⵎⵎⴰⵥⵏ ⴰⴽⴽⵯ ⵉⵎⴰⵢⵏⵓⵜⵏ ⵏ ⵜⴷⵉⴱⵍⵓⵎⴰⵙⵉⵜ ⵉⵙⵜⴰⵡⵀⵎⵎⴰⵏ ⵍⵍⵉ ⵏⵏ ⵉⵍⴽⵎ ⵍⵎⵖⵔⵉⴱ, ⴷⴼⴼⵉⵔ ⵜⴰⵏⴱⴰⴹⵜ ⵜⴰⵎⴳⴳⴰⵢⵜ ⵜⵓⵏⵥⵉⵣⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴳ ⵓⴱⵔⵉⴷ ⵏ ⵓⴼⵔⵔⵓ ⴰⵎⴳⴳⴰⵔⵓ ⵉ ⵓⵎⵏⵣⴰⵖ ⵉⵜⵜⵡⴰⵙⴽⵔⵏ ⵖⴼ ⵙⵙⵄⵔⴰ ⵜⴰⵎⵖⵔⴱⵉⵜ.

ⵜⴰⵎⴰⵡⴰⵙⵜ ⵏ ⵜⴷⵓⵙⵉ ⵜⵙⴷⴷⵉⴷ ⵉⵙ ⴷ ⵉⵇⵇⵏ ⵡⴰⴷⴰⴼ ⵙ ⵡⴰⴽⴰⵍ ⴰⵏⴰⵎⵓⵔ ⴰⵙⵙⵏⴽⴷ ⵏ ⵓⵎⵣⵔⴰⵢ ⵏ ⵜⴳⵣⵣⴰⵢⵜ ⵏ ⵜⴰⵏⴰⵟⵟⵓⴼⵜ ⵏ PCR ( ⴱⴰⵢⴰⵏ ⵍⵢⴰⵡⵎ)

ⵜⵙⴷⴷⵉⴷ ⵜⵎⴰⵡⴰⵙⵜ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⴰⵙⵍⵉⴷ ⵉⴹⵏⵏⴰⵟ ⵏ ⵓⴽⵕⴰⵙ, ⵉⴷ ⵙ ⵉⵇⵇⵏ ⵡⴰⴷⴰⴼ ⵙ ⵉⴽⴰⵍⵏ ⵉⵏⴰⵎⵓⵔⵏ ⴰⵙⵙⵏⴽⴷ ⵏ ⵓⵎⵣⵔⴰⵢ ⵏ ⵜⴳⵣⵣⴰⵢⵜ ⵎⴳⴰⵍ “ ⵙⴰⵔⵙ =-ⴽⵓⴼ-2” ⴳ ⵓⵡⵇⵇⵔ ⵏ ⵓⴱⵔⵓⵜⵓⴽⵓⵍ ⵏ ⵜⴳⵣⵣⴰⵢⵜ ⴰⵏⴰⵎⵓⵔ ⵏⵖ ⵜⴰⵏⴰⵟⵟⵓⴼⵜ “PCR” ⵜⵓⵣⴷⵉⵔⵜ ⵓⵔ ⵉⵣⵔⵉⵢⵏ 72 ⵏ ⵜⵙⵔⴰⴳⵜ. ⵜⴱⴷⵔ ⵜⵎⴰⵡⴰⵙⵜ  ⴳ ⵓⵙⵉⵡⴹ ⵏⵏⵙ, ⵉⵙ ⴷ ⵜⴷⴷⴰ ⵜⵎⴳⴳⵉⵜ ⴰ ⴳ “ ⵓⵙⴰⵜⵉ ⵏ ⵓⵙⴷⵖⵉ ⴰⴼⵔⴽⴰⵏ ⵏ ⵓⴱⵔⵓⵜⵓⴽⵓⵍ ⴰⴷⵓⵙⴰⵏ ⴰⵏⴰⵎⵓⵔ ⵏ ⵉⵎⵓⴷⴷⵓⵜⵏ ⵉⴳⵔⴰⵖⵍⴰⵏⵏ, ⴳ ⵓⵙⴽⵙⵡ ⵙ ⵉⵎⴽⵉⵏⵏⴰ ⵉⵜⵜⵉⵙⵉⵏ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⴽⵓⴼⵉⴷ-19 ⴳ ⵜⵎⴰⵣⵉⵔⵜ ⵏⵏⵖ ⴷ ⵓⵎⴰⴹⴰⵍ ⵍⵍⵉ ⵢⴰⵖⵓⵍⵏ ⵙ ⵓⵎⴰⵜⴰ ⵀⴷⴷⵏⵏ, ⴷ ⵓⵙⵎⵢⵉⵡⵏ ⵏ ⵜⵎⴳⴳⴰ ⵜⵉⴷⵉⵙⴰⵏⵉⵏ ⵏ ⵉⵎⵓⴷⴷⵓⵜⵏ ⵉⴳⵔⴰⵖⵍⴰⵏⵏ ⴳ ⵜⵏⵇⵇⴰⴹ ⵎⵣⴰⵔⴰⵢⵏⵉⵏ ⵏ ⵓⵣⵔⵔⵓⵢ”. ⵉⵙⴼⴰⵡ ⵓⵙⴰⴳⵎ ⴰ ⵏⵉⵜ ⵉⵙ ⵉⵙⵏⴰⵎⴽ ⵙ ⵓⵎⵣⵔⴰⵢ ⴰⴷⵓⵙⴰⵏ ⴰⴷ ⵉⴳ ⵢⴰⵏ ⴽⵕⴰⴹⵜ ⵜⴳⵣⵣⴰⵢ ⵏⵖ ⵙⵏⴰⵜ ⵓⵔ ⵉⵣⵔⵉⵢ ⵓⵣⵎⵣ ⵏⵏⵙ ⴽⴽⵓⵥ ⵏ ⵉⵢⵢⵉⵔⵏ ⵙⵍⵉⴷ ⵜⴰⴳⵣⵣⴰⵢⵜ ⵏ ⵊⵓⵏⵙⵓⵏ ⴷ ⵊⵓⵏⵙⵓⵏ, ⵍⵍⵉ ⵎⵉ ⵜⵏⴳⴰⴷⴷⴰ ⵢⴰⵜ ⵜⴳⵣⵣⴰⵢⵜ ⵏⵏⵙ ⴷ ⵙⵏⴰⵜ ⵜⴳⵣⵣⴰⵢⵉⵏ ⵢⴰⴹⵏ.

ⵉⵎⵃⴹⴰⵕⵏ ⵉⵎⵖⵔⴱⵉⵢⵏ ⴳ ⵓⴽⵕⴰⵏⵢⴰ ⵜⵙⴰⵃⴰ ⴰⵙⵏ ⵜⴷⴰⴱⵓⵜ ⵜⴰⵎⵓⵟⵟⵓⵏⵜ ( ⴱⴰⵢⴰⵏ ⵍⵢⴰⵡⵎ)

ⵜⵏⵏⴰ ⵜⵎⴰⵡⴰⵙⵜ ⵏ ⵓⵙⵙⵍⵎⴷ ⴰⵎⴰⵜⵜⴰⵢ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⵓⵍⴼⵓ ⵉⵙ ⵜⵙⵔⵙ ⵉ ⵉⵎⵃⴹⴰⵕⵏ ⵉⵎⵖⵔⴱⵉⵢⵏ ⴷ ⵉⴷⵡⵍⵏ ⵙⴳ ⵓⴽⵕⴰⵏⵢⴰ ⵜⴰⴱⴰⴷⵓⵜ ⵜⴰⵎⵓⵟⵟⵓⵏⵜ ⵃⵎⴰ ⴰⴷ ⴰⴳⵎⵏ ⵜⵉⵏⵜⴰⵎⵉⵏ ⵉⵥⵍⵉⵏ ⵙ ⵜⵖⵓⵔⵉⵡⵉⵏ ⵏⵏⵙⵏ ⴳ ⵜⵙⴷⴰⵡⵉⵜⵉⵏ ⵏ ⵓⴽⵕⴰⵏⵢⴰ, ⵙⴳ 17 ⵎⴰⵢⵢⵓ ⴰⵔ 31 ⵎⴰⵢⵢⵓ 2022. ⵜⴱⴷⵔ ⵜⵎⴰⵡⴰⵙⵜ, ⴳ ⵓⵙⵓⵡⴹ ⵏⵏⵙ ⴰⵙⵍⵉⴷ ⴰⵙⵙⴰⵏⵟ ⵏ ⵓⴽⵕⴰⵙ, ⵉⵙ ⵖⵉⵢⵏ ⴰⴷ ⴰⴷⴼⵏ ⵙ ⵜⴱⴰⴷⵓⵜ  ⴳ ⵓⵙⵖⴰⵏ ⴰⵎⴹⴼⴰⵕ : https://etudiants-ukraine.enssup.gov.ma. ⵉⵎⴽⵉⵏⵏⴰ ⵜⵙⴷⴷⵉⴷ ⵜⵎⴰⵡⴰⵙⵜ ⵉⵎⵃⴹⴰⵕⵏ ⴰⴷ ⴼⴽⵉⵏ ⴰⵏⵣⴳⵓⵎ ⵉ ⵓⴽⵜⵜⵓⵔ ⵏ ⵜⵏⵜⴰⵎⵉⵏ ⴳ ⵜⵉⵔⴰⵎ ⵉⵜⵜⵢⴰⵏⵏⴰ, ⵜⴱⴷⵔ ⴰⵡⴷ ⵉⵙ ⵔⴰⴷ ⵜⵇⵇⵏ ⵜⴱⴰⴷⵓⵜ ⴰ ⴳ 31 ⵎⴰⵢⵢⵓ 2022 ⴳ ⵜⵙⵔⴰⴳⵜ ⵜⵉⵙⵙ ⵙⵏⴰⵜ ⴷ ⵎⵔⴰⵡ ⵏ ⵢⵉⴹ.

ⵡⴰⵀⴱⵉ: ⵜⵉⵙⵓⵜⵉⵡⵉⵏ ⵏ ⵉⵄⵔⵔⵉⵎⵏ ⵜⵉⵎⴰⵢⵏⵓⵜⵉⵏ ⵉⴽⵛⵎⵏ ⵙ ⵜⴼⴳⴳⴰ ⵜⴰⵣⵔⴼⴰⵏⵜ ⵔⴰⴷ ⵙⴷⵓⵙⵏⵜ ⵉⵙⵓⴳⴰⵏ ⵉⵏⴼⴳⴰⵏⵏ ⵏ ⵜⴰⵣⵣⵓⵍⵜ ⴰ (ⵍⵢⴰⵡⵎ ⵍⵎⵖⵔⵉⴱⵉ)

ⵉⵙⴷⴷⵉⴷ ⵓⵎⴰⵡⵙⴰⵙ ⵏ ⵜⵣⵔⴼⵜ ⵄⴱⴷⵍⵍⴰⵟⵉⴼ ⵡⴰⵀⴱⵉ, ⴰⵙⵍⵉⴷ ⴰⵙⵙⴰⵏⵟ ⵏ ⵓⴽⵕⴰⵙ ⴳ ⵕⵕⴱⴰⵟ, ⵉⵙ ⵔⴰⴷ ⵙⴷⵓⵙⵏⵜ ⵜⵙⵓⵜⵉⵡⵉⵏ ⵜⵉⵄⵔⵔⵉⵎⵉⵏ ⵉⴽⵛⵎⵏ ⵙ ⵜⴼⴳⴳⴰ ⵜⴰⵣⵔⴼⴰⵏⵜ ⵉⵙⵓⴳⴰⵎ ⵉⵏⴼⴳⴰⵏⵏ ⵏ ⵜⴰⵣⵣⵓⵍⵜ ⴰ, ⴳ ⵓⵏⵎⵓⵇⵇⴰⵔ ⵏ ⵜⵙⵓⵜ ⵜⵉⵙⵙ 45 ⵏ ⵉⵎⵙⵖⴰⵏⵏ ⵉⵣⵔⴼⴰⵏⵏ. ⵉⵙⴷⴷⵉⴷ ⵡⴰⵀⴱⵉ, ⴳ ⵡⴰⵡⴰⵍ ⵉⵏⵏⴰ ⵉ ⵜⵙⵓⵜ ⴰ ⴳ ⵓⵙⵉⵏⴰⴳ ⴰⵎⴰⵜⴰⵢ ⵏ ⵜⵏⴱⴹⴰⵢⵜ, ⵖⴼ ⵉⵙ ⴷ ⵉⵇⵇⵏ ⴰⴷ ⴽⵛⵎⵏ ⵉⵄⵔⵔⵉⵎⵏ ⴷ ⵉⵙⵓⴳⴰⵏ ⵉⵏⴼⴳⴰⵏⵏ ⵙ ⵉⴳⵔ ⵏ ⵜⵣⵔⴼⵜ, ⴷ ⵜⵉⴽⴽⵉ ⵏ ⵡⵓⴷⴷⵓⵔ ⵉ ⵓⵙⵎⵓⵜⵜⴳ ⵏⵏⵙⵏ ⴳ ⵉⵙⵡⵉⵔⵏ ⵢⴰⵜⵜⵓⵢⵏ ⵃⵎⴰ ⴰⴷ ⵉⵍⵉⵏ ⴳ ⵓⵙⵡⵉⵔ ⵏ ⵜⴳⴰⵏⵏⵉⵜ ⴷ ⵉⵏⴰⵥⴰⵕⵏ ⵏ ⵜⵣⵔⴼⵜ ⵍⵍⵉ ⴼⵕⴹⵏ ⵉⵙⵏⴼⵍⵏ ⵉⵎⵉⵔⴰⵏⵏ ⵍⵍⵉ ⵉⵙⵙⵏ ⵓⵎⴰⴹⴰⵍ. ⵉⵣⵎⵎⴻⵎ ⵓⵎⴰⵡⵙⴰⵙ ⵉⵙ ⵜⴰⵎⵓ ⵜⴰⵣⵣⵓⵍⵜ ⵏ ⵜⵣⵔⴼⵜ ⴳ ⵜⴰⵣⵣⵓⵍⵉⵏ ⵜⵉⵎⵅⵎⴰⵅⵉⵏ, ⵉⴱⴷⵔ ⵉⵙ ⴷ ⵉⴳⴰ ⵓⴼⵔⴰⴳ  ⵉ ⵉⵣⵔⴼⴰⵏ ⵏ ⵉⵏⵎⵓⵔⵉⵜⵏ ⴷ ⵜⵍⴻⵍⵍⵉⵢⵉⵏ ⵏⵏⵙⵏ ⴷ ⵓⵣⵣⴳⵉⵔ ⵏ ⵓⵣⵔⴼ ⵜⴰⵖⵍⵉⴼⵜ ⵉ ⵜⴼⴳⴳⴰ ⵜⴰⵣⵔⴼⴰⵏⵜ.

ⴰⴳⵔⴰⵡ ⵏ ⵓⴳⴰⴷⴰⵣ ⵏ ⵉⴷⴳⴰⵔⵏ ⵉⵜⵜⵏⴰⵖ ⵎⴳⴰⵍ ⵜⵓⵔⴷⴰ ⵏ ⵉⴷⵔⵉⵎⵏ ⴰⵔ ⵉⴹⴼⴼⵓⵕ ⵍⵎⵓⵄⴰⵎⴰⵍⴰⵜ ⵍⵎⵛⴱⵓⵀⴰ ( ⵔⵉⵙⴰⵍⴰⵜⵍⵓⵎⵎⴰ)

ⵉⴱⵔⵔⵃ ⵓⴳⵔⴰⵡ ⴰⵎⵖⵔⴱⵉⵢ ⵏ ⵓⴳⴰⴷⴰⵣ ⵏ ⵉⴷⴳⴰⵔⵏ, ⴰⵙⵍⴷ ⵉⴹⵍⵍⵉ, ⵉⵙ ⵉⵕⵥⵎ ⵜⴰⵣⵓⵏⵉ ⵉⵍⴰⵏ ⵉⵙⵎ “ ⴰⵎⵏⵏⵓⵖ ⵎⴳⴰⵍ ⵜⴰⵔⴷⴰ ⵏ ⵉⴷⵔⵉⵎ ⴷ ⵓⵎⵡⵡⵍ ⵏ ⵓⴱⵔⵙⵉⵡⴷ” (LBC- FT) ⴳ ⵡⴰⵏⵙⴰ ⵏⵏⵙ ⴰⵍⵉⴽⵟⵕⵓⵏⵉ. ⴷ ⵉⵎⴽⵉⵏⵏⴰ ⵉⵍⵍⴰⵏ ⴳ ⵓⵙⵉⵡⴹ ⵏ ⵓⴳⵔⴰⵡ, ⵜⵙⵙⵏⴽⴰⴷ ⵜⵙⴳⴰ ⵉⵥⵍⵉⵏ ⵙ ⵉⵎⵣⵣⵓⵍⵏ ⵏ ⵉⴳⴰⴷⴰⵣⵏ ⵏ ⵉⴷⴳⴰⵔⵏ  ⴷ ⵓⴳⴷⵓⴷ ⴰⴱⴰⵔⴰⵡ, ⴰⵙⴰⵜⵉ ⴰⵣⵔⴼⴰⵏ ⴷ ⵓⵎⵙⴽⵔⴰⵏ ⵏ ⵓⵎⵏⵏⵓⵖ ⵎⴳⴰⵍ ⵜⴰⵔⴷⴰ ⵏ ⵉⴷⵔⵉⵎⵏ ⴷ ⵓⵎⵡⵡⵍ ⵏ ⵓⴱⵔⵙⵉⵡⴷ. ⵉⵔⵏⴰ ⵓⵖⴱⴰⵍⵓ ⵉⵙ ⴷⴰ ⵜⵜⴻⵜⵜⵉ ⵜⵙⴳⴰ ⴰ ⵖⴼ ⴽⵉⴳⴰⵏ ⵏ ⵉⵙⵏⵜⴰⵍ ⵉⴷⴷⴰⵍⵏ ⵉⴹⵕⵉⵚⵏ ⵉⵣⵔⴼⴰⵏⵏ ⴷ ⵉⵎⵙⵙⵓⴷⵙⵏ ⴷ ⵡⴰⵏⵣⴰⵜⵏ ⴷ ⵉⵎⵏⵣⴰⵢⵏ ⵉⵏⵉⵍⴰⵏⵏ ⴷ ⵉⵙⴱⴷⴰⴷⵏ ⵉⵉⴳⵔⴰⵖⵍⴰⵏⵏ ⴷ ⵉⵣⴷⴰⵢⵏ ⵓⴱⵖⵉⵔⵏ.

ⵉⵙⵓⵜⵓⵔⵏ ⵉⴱⵕⵍⴰⵎⴰⵏⵏ ⴳ ⵜⵙⵇⵇⵉⵎⵜ ⵏ ⵉⴼⵜⵉⵃⴰⵚ ⵏ ⵉⵏⴷⵍⴰⴼ ⵏ ⵉⴳⴰⴷⴰⵣⵏ ⵏ ⵜⵓⴳⴳⵜ ⴳ ⵍⵎⵖⵔⵉⴱ (ⵔⵉⵙⴰⵍⴰⵜ ⵍⵓⵎⵎⴰ)

ⵜⵙⵙⵓⵔⵜ ⵜⵔⴰⴱⴱⵓⵜ ⵏ ⵜⵓⵣⵍⵜ ⴳ ⵓⵙⵇⵇⵉⵎ ⵏ ⵉⵎⴰⵔⴰⵏ, ⴰⵙⵉⵍⵖ ⵏ ⵜⵎⵙⴽⵉⵔⵜ ⵏ ⵢⵉⴷⵣ ⴰⴷ ⵜⴱⴷⴷ ⵖ ⵓⵢⵏⵏⴰ ⵎⵉ ⵏⵏⴰⵏ “ ⵉⵏⴷⵍⴰⴼ ⴷ ⵜⵎⵓⴽⵔⵉⵙⵉⵏ ⵍⵍⵉ ⴳ ⵜⵜⵉⴷⵉⵔⵏ ⵉⴳⴰⴷⴰⵣⵏ ⵏ ⵜⵓⴳⴳⵜ”. ⵉⴷⴷⴰ ⴷ ⵓⵙⵓⵜⵔ ⴳ ⵜⴱⵔⴰⵜ ⵍⵍⵉ ⵢⵓⵣⵏ ⵓⵏⵙⵙⵉⵅⴼ ⵏ ⵓⴽⴰⴱⴰⵕ ⴰⵃⴰⵔⴰⴽⵉ, ⴷⵔⵉⵙ ⵙⵏⵜⵉⵜⵉ, ⵉ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵢⵉⴳⵔⴰⵏ ⵉⵏⴰⵎⵓⵏⵏ, ⵃⴰⵎⵉⴷ ⵏⵓⵖⵓ, ⴰⴳⵎⴰⵎ ⵏ ⵓⴽⴰⴱⴰⵕ ⴰⴷⵙⵜⴰⵔ ⴰⴷⵉⵎⵇⵔⴰⵟⵉ ⴰⵏⴰⵎⵓⵏ. ⵙⴷⴷⵉⴷⵏ ⴰⵢⵜ ⵜⵙⵏⵜⴰⵢⵜ  ⵜⵉⴹⴰⴼ ⵖⴼ ⵡⴰⵙⵙⴰⵔ ⵏ ⵜⵎⵙⴽⵉⵔⵜ ⴰ, ⵙ ⵍⴰⵡⴰⵏ ⴰⴽⴽⵯ “ ⵜⴰⵎⴰⵔⴰ ⵏ ⵉⴳⴰⴷⴰⵣⵏ ⵏ ⵜⵓⴳⴳⵜ ⵙⴳ ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⴷ ⵉⵙⴷⵍⴰⴼ, ⴷⵉⴳⵙⵏ ⵙ ⵓⵥⵍⴰⵢ ⵜⴰⴷⵔⵙⵉ ⵏ ⵜⵓⵚⴽⵉⵉⵏ ⵜⵉⵏⴰⴷⴷⴰⵢⵉⵏ, ⵍⴰⵃ ⵜⵉⵏⵓⴼⴰ ⵙⵍⵉⴷ ⴽⵔⴰ ⵉⴷⵔⵓⵙⵏ, ⴰⵏⴰⵡ ⵏ ⵓⵙⵡⵓⴷⴷⵓ ⴷ ⵓⵔ ⵢⵓⵙⵉⵏ, ⴰⴷⴷⴰⵍ ⴰⴽⴰⵍⴰⵏ ⵓⵔ ⵢⴰⴽⵙⵓⵍⵏ, ⵙ ⵜⵔⵏⵉ ⵏ ⵓⴳⴳⵓⴷⵉ ⵏ ⵉⵎⴰⵣⴰⵏⵏ, ⴰⵢⵍⵍⵉ ⵉⵜⵜⴰⵡⵉⵏ ⵙ ⵡⴰⵜⵜⵉⴳⴳⵏ ⵉⵖⵍⴰⵏ.”

ⴰⴳⵏⵙⴰⵙ ⴰⵎⵖⵍⴰⵍ ⵏ ⵍⵎⵖⵔⵉⴱ ⵖⵓⵔ ⵡⴰⵎⵓⵏⵏ ⵉⵎⵓⵏⵏ ⴳ ⵏⵢⵓⵢⵓⵔⴽ ⵉⵙⴰⵡⵍ ⵖⴼ ⵜⴰⵏⵏⴰⵢⵜ ⵜⴰⵏⴼⴳⴰⵏⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⴳ ⵢⵉⴳⵔ ⵏ ⵓⵣⵡⴰⴳ ( ⵍⵉⵜⵜⵉⵃⴰⴷ ⵍⵉⵛⵜⵉⵔⴰⴽⵉ) 

ⵉⵙⴰⵡⵍ ⵓⵎⵙⵇⴰⴷ ⴰⴳⵏⵙⴰⵙ ⴰⵎⵖⵍⴰⵍ ⵏ ⵍⵎⵖⵔⵉⴱ ⵖⵓⵔ ⵡⴰⵎⵓⵏⵏ ⵉⵎⵓⵏⵏ, ⵄⵓⵎⴰⵔ ⵀⵉⵍⴰⵍ, ⴰⵙⵍⵉⴷ ⴰⵙⵙⴰⵏⵟ ⵏ ⵓⴽⵕⴰⵙ ⴳ ⵏⵢⵓⵢⵓⵔⴽ, ⵖⴼ ⵜⴰⵏⵏⴰⵢⵜ ⵜⴰ,ⴼⴳⴰⵏⵜ ⵍⵍⵉ ⴼ ⵉⴱⴷⴷⴰ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵣⵡⴰⴳ, ⴷⴷⴰⵡ ⵜⵏⴱⴰⴹⵜ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ. ⵉⵙⴷⴷⵉⴷ ⵀⵉⵍⴰⵍ, ⵍⵍⵉ ⵉⴳⴰⵏ ⵉⵉⵙⵙⵉⵅⴼⵏ ⵙ ⵜⴰⵍⵖⴰ ⵉⵙⵙⴰⵔⵏ ⵜⴰⴱⴰⴷⵓⵜ ⵜⴰⵎⵜⴻⵜⵜⴰⵢⵜ ⵍⵍⵉ ⵉⵍⵍⴰⵏ ⴳ ⵓⵙⴰⵜⵉ ⵏ ⵓⴳⵔⴰⵡ ⵏ ⵡⴰⵎⵓⵏⵏ ⵉⵎⵓⵏⵏ ⴰⵎⵣⵡⴰⵔⵓ ⵖⴼ ⵉⵣⵡⴰⴳⵏ ⵉⴳⵔⴰⵖⵍⴰⵏⵏ, ⵍⵍⵉ ⵉⵡⴰⵜⵙⵏ ⴰⵣⵔⴰⵡ ⵏ ⵡⴰⵍⴰⵢ ⵉⵍⵍⴰⵏ ⴳ ⵜⵏⵜⴰⵎⵜ ⵜⴰⵎⴰⴹⵍⴰⵏⵜ ⵉ ⵓⵣⵡⴰⴳ ⴰⵏⴼⵔⴰⵡ ⵉⵙⵙⵓⴷⵙⵏ, ⵍⵍⵉ ⵉⵜⵜⵢⴰⵙⴰⵢⵏ ⴳ ⵎⵔⵔⴰⴽⵛ ⴰⵙⴳⴳⵯⴰⵙ ⵏ 2018, “ ⵜⵉⵎⵙⴽⵉⵔⵉⵏ ⵉⵖⵓⴷⴰⵏ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵣⵡⴰⴳ, ⵍⵍ ⵙ ⵜⵓⵙⵉ ⵜⴳⵍⴷⵉⵜ ⴳ ⵓⵎⵙⴰⵙⴰ ⵏ ⵜⴰⵏⵏⴰⵢⵜ ⵜⴰⵏⴼⴳⴰⵏⵜ ⵏ ⵡⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⵜⴽⵛⵎ ⴳ ⵓⵙⴰⵜⵉ ⵏ ⵜⵎⵥⵍⴰ ⵜⴰⴽⵎⴰⵎⵜ ⵉⵖⵉⵢⵏ ⴰⴷ ⵉⵙⵙⵓⵖⵍ.”

ⵓⵎⵓ ⵏ ⵉⵎⵙⵜⴰⵢⵏ ⵙⴳ ⵙⵙⵃⵔⴰ ⵜⴰⵎⵖⵔⴱⵉⵜ ⴳ ⵓⴳⵔⴰⵡ ⵏ ⵜⵙⵇⵇⵉⵎⵜ ⵜⵉⵙⵙ 24 ⴰⵙⵓⵙⵙⵏ ⴰⵎⴰⴹⵍⴰⵏ ⴰⴳⵔⴰⵖⵍⴰⵏ ⵙ ⵓⴳⵏⵙⴻⵙ ⵏⵏⵙ ⵓⵣⵔⵉⴳ ⵉ ⵜⵙⴳⴳⵯⵉⵏ ⵏ ⵉⴼⴼⵓⵙ ( ⵍⵉⵜⵜⵉⵃⴰⴷ ⵍⵉⵛⵜⵉⵔⴰⴽⵉ)

ⵃⴰⴹⵉⵢⴰ ⵓⵖⴰⵡⴰⵙ ⵏ ⵓⵏⴱⴰ!ⴷ ⴰⵙⵉⵎⴰⵏ ⵍⵍⵉ ⵉⴼⴽⴰ ⵍⵎⵖⵔⵉⴱ ⴷ ⴰⴼⵙⵙⴰⵢ ⴰⴼⵔⴷⵉ ⵉ ⵓⴼⵔⵔⵓ ⵏ ⵓⵎⵏⵣⴰⵖ ⴰⵏⵎⵏⴰⴹ ⵖⴼ ⵙⵙⵃⵔⴰ ⵜⴰⵖⵔⴱⵉⵜ ⴰⵏⵏⴰⵍ ⵉⴷⵓⵙⵏ ⴷ ⵓⴱⴰⵔⴰⵡ ⴳ ⵓⴳⵔⴰⵡ ⴰⵏⵎⵏⴰⴹ ⵏ ⵜⵙⵇⵇⵉⵎⵜ ⵜⵉⵙⵙ 24 ⵉⴹⴼⴰⵕⵏ ⵉ ⵡⴰⵎⵓⵏⵏ ⵉⵎⵓⵏⵏ ⵏ ⵜⵙⴳⴰ ⵏ ⵢⵉⵍⴻⵍ ⴰⴽⴰⵔⴰⵢⵉⴱ, ⵍⵍⵉ ⵉⵣⵔⵉⵏ ⴳ ⵜⴼⵔⴽⵜ ⵙⴳ 11 ⴰⵔ 13 ⵎⴰⵢⵢⵓ ⴳ ⴽⴰⵙⵜⵔⵉⵙ, ⴳ ⵙⴰⵏⵜ ⵍⵡⵉⵙ. ⵉⵥⵍⵉ ⵉⵎⵊⵔⵉ ⴰ ⵙ ⵓⴷⵔⴰⵡ ⵏ ⵜⵏⵙⵙⵉⵅⴼⵜ ⵏ ⵜⵙⴳⴰ ⵏ ⴷⴷⴰⵅⵍⴰ ⴷ ⵡⴰⴷ ⴷⴷⴰⵀⴰⴱ, ⵖⴰⵍⴰ ⴱⴰⵀⵉⵢⴰ ⵉ ⵓⵙⴳⴳⵯⴰⵙ ⵡⵉⵙⵙ ⵙⵎⵎⵓⵙ ⵉⵎⴹⴼⴰⵕⵏ, ⴷ ⵓⴳⵏⵙⴰⵙ ⵏ ⵓⵏⵙⵙⵉⵅⴼ ⵏ ⵜⵎⵏⴰⴹⵜ ⵏ ⵍⵄⵢⵓⵏ ⴷ ⵜⵔⴳⵯⴰ ⵜⴰⵣⴳⴳⵯⴰⵖⵜ ⵎⵓⵃⵎⵎⴰⴷ ⴰⴱⴰ, ⵙ ⵜⵖⵓⵔⵉ ⵏ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⵉⵙⵙ 24. ⵜⵓⴼⴰ ⵜⵉⵀⴰⵡⵜ ⵏ ⵉⵎⵙⵜⴰⵢⵏ ⴰ ⵏ ⵙⵙⵃⵔⴰ ⵜⴰⵎⵖⵔⴱⵉⵢⵜ ⴰⵏⵙⵓⴼ ⴰⴱⴰⵔⴰⵡ ⵙⴳ ⵖⵓⵔ ⵓⵎⴹⴰⵏ ⴰⵅⴰⵜⴰⵔ ⵏ ⵉⴽⴰⴱⴰⵔⵏ ⵢⴰⵎⵓⵏ ⴳ ⵓⴳⵔⴰⵡ ⴰ, ⴰⵢⵍⵍⵉ ⵉⵜⵜⴽⵔⵔⴰⵙⵏ ⵜⵓⵣⵔⵉⴼⵜ  ⵏⵏⵙⵏ ⴰⵎⵎ ⵉⴳⵏⵙⴰⵙ ⵉⴷⵉⵎⵉⵇⵕⴰⵟⵉⵢⵏ ⵏ ⵉⵎⵣⴷⴰⵖ ⵏⵏ ⵙⵙⵃⵔⴰ ⵜⴰⵎⵖⵔⴱⵉⵜ, ⴷⴼⴼⵉⵔ  ⵉⵙⵜⴰⵢⵏ ⵍⵍⵉ ⵙⵏⵓⵎⵍⵏ ⵉⵎⵏⵥⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵙ ⵓⵎⵙⴰⵙⴰ ⵉⵙ ⵜⴳⴰ ⵜⴰⴷⵉⵎⵓⵇⵔⴰⵟⵉⵜ ⵜⵉⵍⴻⵍⵍⵉⵜ ⴷ ⵜⵎⴰⴼⴰⵡⵜ.

ⵜⵉⵎⵔⵙⵍⵜ ⵏ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ ⴰⵙⵅⵉⵜⵔ ⵏ ⵜⵎⵀⵍⵜ “ ⵉⵍⵍ ⵡⴰⵔ ⴱⵍⴰⵙⵜⵉⴽ” ⵙ ⵓⵣⵎⵣⵣⵓ ⵏ ⵜⵙⵓⵜⵍⵜ ⵜⵉⵙⵙ 23 ⵏ ⵉⵎⵣⵉⵣⵣⵍ ⵏ ⵉⴼⵜⴰⵙⵏ ⵉⵎⵣⴷⴰⴳⵏ ( ⵙⵙⵃⵔⴰ ⵜⴰⵎⵖⵔⴱⵉⵜ)

ⴳ ⵓⵎⵓⵜⵜⴳ ⵏ ⵉⵎⵉⵔ ⵏ ⵓⵏⴱⴷⵓ ⵍⵍⵉ ⴷ ⵢⵓⴷⵙⵏ, ⴷ ⵡⴰⵎⵎⴰⵙ ⵏ ⵓⵙⵎⵓⵜⵜⴳ ⵏ ⵉⵎⵖⵔⴱⵉⵢⵏ ⵙ ⵡⵓⵖⵓⵍ ⵖⵔ “ ⵜⴰⴹⴼⵉⵡⵉⵏ ⵏ ⵉⴼⵜⴰⵙⵏ”, ⵜⵙⵏⵎⴰⵍⴰ ⵜⵎⵔⵙⵍⵜ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ, ⵍⵍⵉ ⵙⵏⴰⵅⴼ ⵍⴰⵍ ⵏ ⵡⴰⴷⴷⵓⵔ ⴰⴳⵍⴷⴰⵏ ⵜⴰⴳⵍⴷⵓⵏⵜ ⵜⴰⵅⴰⵜⴰⵔⵜ ⵍⴰⵍⵍⴰ ⵃⵙⵏⴰ, ⵜⴰⵙⴰⵡⴰⵔⵜ ⵏ ⵓⵙⵎⵓⵜⵜⴳ ⵉ ⵜⵉⵍⴰⵍ ⵏⵏⵙ ⵏ ⵓⵏⴱⴷⵓ ⵉⵥⵍⵉⵏ ⵙ ⴰⴼⵜⴰⵙ ⴷ ⵉⴳⴰⵔⴰⵡⵏ, ⴰⵙⵍⵉⴷ ⴰⵙⵙⴰⵏⵜ ⵏ ⵓⴽⵕⴰⵙ. ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵏ ⵉⴼⵜⴰⵙⵏ ⵉⵣⴷⴷⵉⴳⵏ ⵍⵍⵉ ⵜⵙⵏⵎⴰⵍⴰ ⵜⵎⵔⵙⵍⵜ ⵙⴳ 23ⵏ ⵓⵙⴳⴳⵯⴰⵙ, ⵔⴰⴷ ⵉⵜⵜⵓⴳ ⵓⵙⵢⴰⴼⵓ ⵏ ⵓⵣⵎⵣⵣⵓ ⵏ ⵡⵓⴼⵓⵢ ⵏ ⵉⵎⵏⵎⵓⵔⵉⵢⵏ ⵏ ⵜⵏⵎⵓⵔⵉⵢⵉⵏ ⵙ ⵉⵎⴷⴰⵏⵏ ⵉⵅⴰⵜⴰⵔⵏ ⵖⴼ ⵓⴼⵜⴰⵙ ⵃⵎⴰ ⴰⴷ ⵜⵜⵓⴳⵏⵜ ⵜⵣⵎⵎⴰⵔ ⵜⵉⴷⵙⵍⴰⵏⵉⵏ ⵏ ⵓⴼⵔⴰⴽ ⵙ ⵜⵉⵅⵅⵉⵜⵔⵜ ⵏ ⵓⴼⵔⴰⴳ ⵉ ⵉⴳⴰⵔⴰⵡⵏ ⴷ ⵓⵙⴳⵎⵉ ⵖⵉⴼⵙ, ⵙ ⵍⴰⵡⴰⵏ ⴰⴽⴽⵯ ⵉⵙ ⵙⵙⴰⵎⵓⵏ ⵡⴰⵎⵓⵏⵏ ⵉⵎⵓⵏⵏ ⴰⵢⴰⵏⵏ ⵙⴳ ⵓⵡⵜⵜⴰⵙ ⵓⵟⵟⵓⵏ 14 ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ. ⵜⵍⵜⵖ ⵜⵎⵔⵙⵍⵜ ⴳ ⵜⵡⵓⵔⵉ ⵜⴰⵖⵣⵓⵔⴰⵏⵜ  ⵉ ⵉⴳⴰⵔⴰⵡⵏ ⵙ ⵜⵎⵏⵜⵉⵍⵜ ⵏ ⵓⴳⵊⴷⵉ ⵉⵜⵜⵓⵙⵎⴰⴳⴰⵍⵏ ⵙ ⵉⵍⴰⵍⵏ ⴷ ⵉⴳⴰⵔⴰⵡⵏ, ⵙ ⵜⵔⵏⵉ ⵏ ⵉⵙ ⴷⴰ ⵜⴻⵜⵜⵓⵎⵓ ⴳ ⵜⵙⵏⵜⴰⵢⵜ ⵜⴰⵎⵔⴰⵡⵜ ⵏ ⵡⴰⵎⵓⵏⵏ ⵉⵎⵓⵏⵏ ⵉ ⵜⵓⵙⵙⵏⵉⵡⵉⵏ ⵏ ⵉⴳⴰⵔⴰⵡⵏ ⵍⵍⵉ ⵎⵉ ⵜⵕⵥⵎ ⵜⵙⵇⵇⵉⵎⵜ ⵏ ⵍⵓⵏⵉⵙⴽⵓ ⵜⴰⵡⴰⵏⴽⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵉⴳⴰⵔⴰⵡⵏ, ⵍⵍⵉ ⵎⵉ ⵍⴰⵍ ⵏ ⵡⵓⴷⴷⵓⵔ ⴰⴳⵍⴷⴰⵏ ⵜⴰⴳⵍⴷⵓⵏⵜ ⵜⴰⵅⵜⴰⵔⵜ ⵍⴰⵍⵍⴰ ⵃⵙⵏⴰ ⵢⴰⵜ ⵙⴳ ⵉⵎⴽⵙⴰⵡⵏ ⵏⵏⵙ ⴷ ⵓⵙⴳⴰ ⵏⵏⵙ.

ⴰⵢⵜ ⵟⵟⴰⵍⴷ ⴷⴰ ⵉⵙⵙⵓⵜⵓⵔ ⵜⵉⴽⴽⵉ ⵏ ⵜⵉⵅⵅⵉⵜⵔⵜ ⵉ ⵓⵏⴱⴰⴹ ⴰⴷⵓⵙⴰⵏ ( ⵙⵙⵃⵔⴰ ⵜⴰⵎⵖⵔⴱⵉⵜ)

ⵉⵙⵙⵓⵜⵔ ⵓⵎⴰⵡⵙⴰⵙ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⵅⴰⵍⵉⴷ ⴰⵢⵜ ⵟⵟⴰⵍⴱ, ⴰⵙⵍⵉⴷ ⴰⵙⵙⴰⵏⵟ ⵏ ⵓⴽⵕⴰⵙ, ⵜⵉⴽⴽⵉ ⵏ ⵓⵏⴱⴰⴹ ⴰⴷⵓⵙⴰⵏ ⵜⵉⵅⵅⵉⵜⵔⵜ ⴷ ⵓⵙⵔⵓⵙ ⵏⵏⵙ ⴳ ⵜⵎⵣⵡⵓⵔⴰ ⵏ ⵜⵙⵔⵜⵉⵜⵉⵏ ⵜⵉⵎⴰⵜⴰⵢⵉⵏ ⵏ ⵜⴳⵍⴷⵉⵜ. ⵉⴷⴷⴰ ⴷ ⵓⵢⴰ ⴳ ⵜⵉⵏⴰⵡⵜ ⵖⴼ ⵓⵙⵏⵜⵍ “ ⴰⵏⴱⴰⴹ ⴰⴷⵓⵙⴰⵏ” ⵉⴼⴽⴰ ⵜⵜ ⴳ ⵜⴽⴰⴷⵉⵎⵉⵜ ⵃⴰⵙⴰⵏ ⵡⵉⵙⵙ ⵙⵉⵏ ⵉ ⵜⵎⴰⵙⵙⴰⵏⵉⵏ ⴷ ⵜⵉⵇⵏⵉⵢⵉⵏ ⵙ ⵓⵣⵎⵣⵣⵓ ⵏ ⵓⵙⴼⵓⴳⵍⵓ ⵙ ⵓⴽⵜⵜⴰⵢ ⵡⵉⵙⵙ 16 ⵏ ⵜⵍⴰⵍⵉⵜ ⵏ ⵜⴽⴰⴷⵉⵎⵉⵜ. ⵉⵏⵏⴰ ⴰⵢⵜ ⵟⵟⴰⵍⴱ ⵉⵙ ⴷⴰ ⵉⵜⵜⵓⵎⵓ ⵓⵙⵏⴰⵍⴰⵡ ⵏ ⵓⵏⴱⴰⴹ ⴰⴷⵓⵙⴰⵏ ⴳ ⵓⴼⵔⴰⴳ ⵉ ⵉⵡⵓⵏⴰⴽ ⵙⴳ ⵜⴰⵙⵙⴰⵙⵉⵏ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⵙⵔⵜⴰⵜⵉⵏ, ⵉⵔⵏⵓ, “ ⵓⵔ ⵜⵍⵍⵉ ⵜⴳⵎⵉ ⵜⴰⵙⵓⵍⴰⵏⵜ ⵜⴰⵔ ⵜⴰⴷⵓⵙⵉ, ⵓⵔ ⵜⵍⵍⵉ ⵜⴷⵓⵙⵉ ⵜⴰⵔ ⵜⵉⴳⵎⵉ ⵜⴰⴷⵓⵙⴰⵏⵜ”.

ⵍⵡⵉⵍⴰⵢⴰ ⵜⵉⵙⵙ ⵎⵔⴰⵡ.. ⵜⵉⵊⵍⵉ ⵏ ⵡⴰⴽⵓⴷ ⵓⵣⵔⵉⴼ ( ⵍⴰⵃⴷⴰⵜ ⵍⵎⵖⵔⵉⴱⵉⵢⴰ)

ⵉⴳⵯⵔⴰ ⵓⵙⵙⵉⵜⵜⴳ, ⵍⵍⵉ ⵉⵙⵙⵏⴽⴷ ⵓⴳⵔⴰⵙ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⵎⵙⵜⴰⵢ ⵙ ⵍⵡⵉⵍⴰⵢⴰ ⵜⵓⵣⵔⵉⴼⵜ ⵜⵉⵙⵙ ⵎⵔⴰⵡⵜ, ⵙ ⵉⵙ ⵉⵍⵍⴰ ⵓⵊⵍⵓ ⴰⵏⴰⴼⴰⵡ ⵏ ⵓⵡⴰⴽⵓⴷ ⵓⵣⵔⵉⴼ. ⵉⵏⵏⴰ ⵓⴳⵔⴰⵡ, ⵍⵍⵉ ⵉⵙⵙⵏⴽⴷⵏ ⵉⵣⴳⵣⴰⵍ ⵏ ⵓⵏⵇⵇⵉⵙ ⵏⵏⵙ ⴳ ⵜⵉⵏⴰⵡⵜ ⵍⵍⵉ ⴳ ⴰⵎⵓⵏ ⵉⵎⴳⴳⴰⵢⵏ ⵉⵙⵔⵜⴰⵏⵏ ⴷ ⵉⴽⴰⴷⵉⵎⵉⵢⵏ, ⴰⵙⵙ ⵏ ⵓⴽⵕⴰⵙ ⴳ ⵕⵕⴱⴰⵟ, ⵉⵙ “ ⵓⵔ ⵜⵉⵡⵉⵙ ⵜⵎⵢⴰⵏⴰⵡⵜ ⵏ ⵉⵎⴰⵙⵙⵏ ⵏ ⵜⵉⴹⴰⴼ ⵉⵜⵜⵓⴼⴽⴰⵏ ⵉ ⵓⴱⵕⵍⴰⵎⴰⵏ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵍⵡⵉⵍⴰⵢⴰ ⵜⵉⵙⵙ ⵎⵔⴰⵡⵜ ⴷ ⵓⴷⵡⴰⵙ ⵏ ⵜⵉⴳⴳⵉ ⴳ ⵓⵙⵡⵉⵔ ⵏ ⵓⵙⵙⵉⵜⴳ ⵏ ⵜⵙⵔⵜⵉⵜⵉⵏ ⵜⵉⴳⴷⵓⴷⴰⵏⵉⵏ”.  ⵉⵏⵏⴰ ⵓⴳⵔⴰⵡ ⴳ ⵓⵏⵇⵇⵉⵙ ⴰ ⵏⵉⵜ ⵏ ⵓⵙⵙⵉⵜⴳ ⵏ ⵜⵉⵔⵎⵉⵜ ⵜⴰⴱⵕⵍⴰⵎⵉⵏⵜ ⵉⵍⵍⴰⵏ ⵙⴳ 2016 ⴰⵔ 2021 ⵉⵙ “ ⵓⵔ ⵉⵜⵜⵓⴳⵉ ⵓⵙⵍⴳⴰⵎⵓ ⴰⴱⵕⵍⴰⵎⴰⵏⵉ ⵅⴼ ⵅⴼ ⵉⵎⴰⵙⵙⵏ ⵓⵔ ⵉⵜⵜⴳⴳⵯⵉⵏ ⵜⴰⵎⴰⵙⴰⵢⵜ ⵜⴰⵙⵔⵜⴰⵏⵜ ⵏ ⵜⵏⴱⴰⴹⵜ; ⵎⵇⵇⴰⵔ ⴳⴳⵓⴷⵉⵏ ⵉⵏⴷⵍⴰⴼ ⵍⵍⵉ ⵉⵙⵙⵏ ⵓⵙⵡⵓⴷⴷⵉ ⵏ ⴽⵉⴳⴰⵏ ⵏ ⵢⵉⴳⵔⴰⵏ ⵏ ⵜⵏⴱⴰⴹⵜ ⵍⵍⵉ ⵉⴳⴰⵏ ⵜⵉⵎⵏⵜⴰⵍ ⵏ ⵡⵓⴼⵓⵖ ⵏ ⴽⵉⴳⴰⵏ ⵏ ⵉⴳⵎⴰⵏ ⵏ ⵜⵏⴱⴰⴹⵜ ⴽⵉⴳⴰⵏ ⵏ ⵜⵉⴽⴽⴰⵍ.”

ⵜⴰⵔⵡⴰ .. ⴰⵖⵜⴰⵙ ⵏ ⵜⵏⵓⵕⵥⵎⵜ ⵏ ⵉⴱⴰⴱⴰⵜⵏ ( ⵍⴰⵃⴷⴰⵜ ⵍⵎⵖⵔⵉⴱⵉⵢⴰ)

ⵉⵙⵖⵣⵏ ⵓⵙⵇⵇⵉⵎ ⵏ ⵜⵏⴱⴰⴹⵜ, ⴳ ⵜⵙⵎⵓⵏⵉ ⵏⵏⵙ ⵏ ⵡⴰⵚⵚⴰⵏⴹ ⴰⴽⵡⴰⵙ 19 ⵎⴰⵢⵢⵓ 2022, ⴰⵙⵖⵏⵓ ⵉⵥⵍⵉⵏ ⵙ ⵓ,ⴳⵔⴰⵡ ⴰⴷⵙⵍⴰⵏ ⵏ ⵜⵙⵖⵏⵜ ⵜⴰⴳⵓⴷⵓⴷⴰⵏⵜ. ⵉⵡⴰⵜⵙ ⵓⵙⵖⵏⵓ ⴰ ⴰⵖⵜⴰⵙ ⵏ ⵜⵓⵎⴰⵢⵉⵏ ⵜⵉⵎⴰⵢⵏⵓⵜⵉⵏ ⵉⵇⵇⵏⵏ ⵙ ⵓⵙⴰⵃⴰ ⵏ ⵉⵎⵙⵖⴰⵏⵏ ⵉⵔⴳⴰⵣⵏ ⵍⵍⵉ ⵎⵉ ⵖⵓⵔ ⴷ ⵉⵍⵓⵍⴰ ⵓⵜⵔⵔⴰⵙ ⵏⵖ ⵓⵏⵏⴰ ⵎⵉ ⵖⵓⵔ ⵍⴽⴰⴼⴰⵍⴰ ⵏ ⵓⵔⴱⴰ ⵏ ⴷⴷⴰⵡ 14 ⵏ ⵉⵎⵍⴰⵙⵙ ⴳ ⵓⵡⵜⴰⵢ ⵜⵓⵔⴰⴳⵜ ⵏ ⵓⴱⴰⴱⴰⵜ ⴰⵣⵎⵣ ⵏⵏⵙ 15 ⵏ ⵡⴰⵙⵙ ⵉⵣⴷⵉⵏ ⵙ ⴼⵔⵔⵓ ⵏⵏⵙ, ⴰⵢⴰ ⵃⵎⴰ ⴰⴷ ⵉⵜⵜⵓⴼⴽ ⵓⴷⵔⴰⵡ ⴳ ⵜⵓⴷⵔⵜ ⵏ ⵜⴰⵡⵊⴰ ⴷ ⵓⴹⵎⴰⵏ ⵏ ⵓⵙⴷⴷⵓⵍ ⵉⵍⴰⵇⵏ ⵉ ⵜⵢⵎⵎⴰⵜ ⴷ ⵓⵃⴹⵉⴹ ⵍⵍⵉ ⵙ ⵉⵜⵜⵓⵙⵎⴰⴳⵍ, ⵙ ⵍⴰⵡⴰⵏ ⴰⴽⴽⵯ ⴳ ⵡⵓⵙⵙⴰⵏ ⵉⵎⵣⵡⵓⵔⴰ ⵏ ⵓⵡⵢⵜⴰⵢ ⵏⵏⵙ. ⴷⴰ ⵉⵜⵜⵙⴰⵃⴰ ⵓⵎⵙⵖⴰⵏ ⵙⴳ ⵜⵔⴰⴳⵜ ⴰ ⵙ ⵜⵓⵜⵜⵔⴰ ⵏⵏⵙ ⵙⴳ ⵡⴰⴽⵓⴷ ⵉⵜⵜⴷⴷⵓⵏ ⵙⴳ ⵜⵍⴰⵍⵉⵜ ⵏ ⵓⵔⴱⴰ ⵏⵖ ⵜⵉⴽⴽⵉ ⵏ ⵍⴽⴰⴼⴰⵍ ⴰⵔⴷ ⵢⴰⵡⴹ ⵓⵃⴹⵉⴹ ⴰⵡⵜⴰⵢ ⵏ 14 ⵏ ⵉⵎⵍⴰⵙⵙ.

ⵉⵙⴽⵎⵓⴹⵏ “ ⵉⴼⴷⵓⴷⴷⵔⵏ” .. ⵜⴰⵢⵔⵏⵉⵜ ⵏ ⵓⵊⵊⵏⵊⵎ ⵏ ⵍⴰⵙⴰⵎⵉⵔ “ ⵜⴻⵜⵜⴰⴽⴽⴰ ⴰⴼⵙⵙⴰⵢ ( ⵍⴰⵃⴷⴰⵜ ⵍⵎⵖⵔⵉⴱⵉⵢⴰ)

ⵜⵏⵏⴰ ⵜⵢⵔⵏⵉⵜ ⵜⴰⵏⴰⵎⵓⵔⵜ ⵏ ⵓⵊⵊⵏⵊⵎ ⵏ ⵓⵎⵣⵉⵣⴷⴳ ⵏ ⵓⴱⵉⵟⵔⵓⵍ ⵍ “ ⴰⵣⵓⴳⴳⵣ ⵏ ⵡⴰⵜⵉⴳⴳⵏ ⵏ ⵉⵙⴽⵎⵓⴹⵏ ⵉⵖⵉⵢ ⴰⴷ ⵢⵉⵍⵉ ⵎⴽ ⵜⵍⵍⴰ ⵜⵉⵔⴰⵜ ⵜⴰⵙⵔⵜⴰⵏⵜ”, ⵜⵙⵓⵎⵔ ⵜⵢⵔⵏⵉⵜ ⵉ ⵓⵢⴰ ⴽⵉⴳⴰⵏ ⵏ ⴼⵙⵙⴰⵢⵏ ⵙⴳⵙⵏ “ ⴰⵍⴰⵙ ⵏ ⵓⴼⴰⵔⵙ ⴳ ⵓⵎⵣⵉⵣⴷⴳ ⴰⵎⵖⵔⴱⵉ ⵏ ⵓⵉⴱⵟⵕⵓⵍ ⵙ ⵓⵥⵍⴰⵢ ⴳ ⵡⴰⵍⴰⵢ ⵏ ⵜⴰⵎⵉⵡⵉⵏ ⵏ ⵜⴽⵕⵉⵕ ⵍⵍⵉ ⵏⵏ ⵉⴳⴰⵏ ⴰⵜⵉⴳ ⵉⴱⵔⵎⵉ ⵏ ⴳⴰⵣⵡⴰⵍ ⴳ 70 ⴷⵓⵍⴰⵔ , ⴰⵢⵍⵍⵉ ⵉⵔⴰⵏ ⴰⴷ ⵢⴰⵡⵙ ⴳ ⵓⵙⴳⵓⴷⵉ ⵏ ⵜⴰⴳⴳⴰⵔⵜ ⵜⴰⵏⴰⵎⵓⵔⵜ ⵏ ⵜⵎⵜⵜⵉⵡⵉⵏ ⵜⵉⴱⵉⵟⵔⵓⵍⵉⵏ ⵉⵙⵓⴳⴳⵣ ⴰⵜⵉⴳⴳⵏ ⵏ ⵉⵙⴽⵎⵓⴹⵏ ⵉⵎⵣⴷⴰⴳⵏ ⵙⴳ ⴷⵔⵀⵎ ⴷ ⵓⵣⴳⵏ ⴰⵔ ⵙⵉⵏ ⵉⴷ ⴷⵔⵀⵎ ⵉ ⵢⴰⵏ ⵍⵉⵜⵔⵓ ⵙ ⵍⴰⵡⴰⵏ ⴰⴽⴽⵯ ⵏⵉⵍ ⵜⴰⴷⵔⵙⵉ ⵉⵜⵜⵓⵔⵏⵓⵏ ⴳ ⵓⵙⴽⴰⵏ ⵏ ⵜⵎⵜⵜⵉⵡⵉⵏ ⵙ ⵜⵔⵏⵉ ⵏ ⵜⴰⴷⵔⵙⵉ ⵏ ⵓⴱⵉⵟⵕⵓⵍ ⴰⵎⵙⴰⵔⵉ.” ⵏⵏⵉⴳ ⵓⵢⴰ ⵜⵙⵙⵓⵜⵔ ⵜⵢⵔⵏⵉⵜ ⵜⴰⵏⴱⴰⴹⵜ ⴰⴷ “ ⵜⵣⵍ ⴰⵏⴰⵖⵉⵣ ⵏ ⵡⴰⵜⵉⴳⴳⵏ ⵢⵓⵍⵉⵏ ⴷ ⴷ ⵓⵙⵡⵓⵜⵜⵓ ⵏ ⵡⴰⵜⵉⴳⴳⵏ ⵏ ⵔⴱⵃ ⵏ ⵉⵎⵣⵓⵣⵣⵔⵏ ⵙ ⵜⴰⵍⵖⴰ ⵜⴰⵎⴰⴼⴰⵡⵜ ⵜⵓⵖⴷⵉⵎⵜ.”

ⵎⴰⴱ 20 ⵎⴰⵢⵢⵓ 2022