ⴰⵙⴳⵎⴹⵏ ⵓⴱⵔⵓⵟⵓⴽⵓⵍ ⵏ ⵓⵎⵙⴰⵙⴰ ⵉ ⵓⵎⵢⴰⵡⴰⵙ ⴷ ⵓⵙⵏⴼⵍ ⵏ ⵉⵏⵖⵎⵉⵙⵏ ⴳⵔ ⵜⵎⵙⵙⵓⴳⵉⵔⵉⵏ ⵏ ⵜⴷⵉⵡⴰⵏⵜ ⴷ ⵉⵔⴳⴰⵢⵏ ⴰⵔⵓⵙⵔⵉⴷⵏ ⴷ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵎⵏⵖⵎⵉⵙⵏ ⵓⵥⵕⴼⵏ ( ⵍⵉⵣⴰⵏⵙⴱⵉⵔⴰⵙⵢⵓⵏ ⵉⴽⵓ)

ⵜⵙⵙⴳⵎⴹ ⵜⵎⵙⵙⵓⴳⵓⵔⵜ ⵏ ⵜⴷⵉⵡⴰⵏⵜ ⴷ ⵉⵔⴳⴰⵢⵏ ⴰⵔⵓⵙⵔⵉⴷⵏ ⴷ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵏⵖⵎⵉⵙⵏ ⵓⵥⵔⵉⴼⵏ, ⵜⵉⴳⵉⵔⴰ ⴰ ⴳ ⵕⵕⴱⴰⵟ, ⴰⴱⵔⵓⵟⵓⴽⵓⵍ ⵏ ⵓⵎⵙⴰⵙⴰ ⵉ ⵓⵎⵢⴰⵡⴰⵙ ⴷ ⵓⵙⵏⴼⵍ ⵏ ⵉⵏⵖⵎⵉⵙⵏ, ⵉ ⵓⵙⴷⵓⵙ ⵏ ⵓⵎⵍⵢⴰⵡⴰⵙ ⴰⵢⵓⴳⴰⵏ ⴳ ⵢⵉⴳⵔ ⵏ ⵓⵎⵏⵏⵓⵖ ⵎⴳⴰⵍ ⵜⴰⵔⴷⴰ ⵏ ⵓⴷⵔⵉⵎ ⴷ ⵓⵎⵡⵡⵍ ⵏ ⵓⴱⵔⵙⵉⵡⴷ. ⵉⴱⴷⵔ ⵓⵙⵉⵡⴹ ⴰⵎⴷⵔⴰⵡ ⵉ ⵙⵏⴰⵜ ⵜⵎⵔⵙⴰⵍ, ⵉⵙ ⵔⴰⴷ ⵎⴰⵢⴷⵏⵜ ⵙⵉⵏ ⴷⴷⵖ ⵙ ⵓⵎⵙⴰⵙⴰ ⴰ ⵍⵍⵉ ⵉⵙⵙⴳⵎⴹ ⵏⴰⴱⵉⵍ ⵍⵅⴹⵕ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⵙⵙⵓⴳⵓⵔⵜ ⴷ ⵉⵔⴳⴰⵢⵏ ⴰⵔⵓⵙⵔⵉⴷⵏ, ⴷ ⵊⴰⵡⵀⴰⵔ ⵏⴼⵉⵙⵉ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵏⵖⵎⵉⵙⵏ ⵓⵥⵕⵉⴼⵏ, ⵖⴼ ⵓⵙⵔⵓⵙ ⵏ ⵓⵙⴰⵜⵉ ⵏ ⵓⵎⵢⴰⵡⴰⵙ ⴰⵎⴷⵔⴰⵡ, ⵙ ⵜⵓⵣⵣⴳⵔⴰ ⵏ ⵓⵙⵍⴳⵏ ⴷ ⵉⵙⵓⴷⵙⵏ ⵉⵙⵡⵓⵔⵉⵏ, ⵙ ⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵓⵙⵏⴼⵍ ⵏ ⵉⵏⵖⵎⵉⵙⵏ ⵉⵥⵉⵍⵏ ⵏ ⵓⵎⵏⵏⵓⵖ ⵏ ⵜⴰⵔⴷⴰ ⵏ ⵓⴷⵔⵉⵎ ⴷ ⵓⵎⵡⵡⵍ ⵏ ⵓⴱⵔⵙⵉⵡⴷ.

ⴰⵙⴳⵎⴹ ⵏ ⵓⴱⵔⵓⵜⵓⴽⵓⵍ ⴳⵔ ⵍⵎⵖⵔⵉⴱ ⴷ ⴼⵔⴰⵏⵙⴰ ⵖⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵓⵏⵣⵡⵉ ⴷ ⵜⴳⵎⵉ ⵜⴰⵙⵓⵍⴰⵏⵜ(ⵍⵉⵣⴰⵏⵙⴱⵉⵔⴰⵙⵢⵓⵏ ⵉⴽⵓ)

ⵜⵙⵙⴳⵎⴹ ⵜⵎⴰⵡⴰⵙⵜ ⵏ ⵓⵎⵎⴰⵜⵜⵓ ⴰⵏⵥⴹⴰⵕⴷ ⵜⴳⵎⵉ ⵜⴰⵙⵓⵍⴰⵏⵜ ⴷ ⵜⵙⵏⵓⵔⴰⵢⵜ ⵜⴰⴼⵔⴰⵏⵙⵉⵙⵜ ⵏ ⵓⵜⴳⵎⵉ, ⴰⵙⵉⵎⵡⴰⵙ ⴳ ⵕⵕⴱⴰⵟ, ⵖⴼ ⵓⴱⵔⵓⵜⵓⴽⵓⵍ ⵏ ⵓⵎⵙⴰⵙⴰ ⵉⵡⴰⵜⵙⵏ ⴰⵙⴷⵓⵙ ⵏ ⵓⵎⵢⴰⵡⴰⵙ ⴳⵔ ⵍⵎⵖⵔⵉⴱ ⴷ ⴼⵔⴰⵏⵙⴰ ⴳ ⵢⵉⴳⵔ ⵏ ⵓⵏⵣⵡⵉ ⴷ ⵜⴳⵎⵉ ⵜⴰⵙⵓⵍⴰⵏⵜ. ⵉⵙⴼⴰⵡ ⵓⵙⵉⵡⴹ ⴳ ⵓⵙⴽⴽⵉⵏ ⴰ ⵉⵙ ⵔⴷ ⵜⴰⵡⵙ, ⵙ ⵓⴱⵔⵓⵜⵓⴽⵓⵍ ⴰ, ⵍⵍⵉ ⵉⵙⵙⴳⵎⴹ ⵙ ⵉⵙⴽⴽⵉⵍⵏ ⵉⵎⵣⵡⵓⵔⴰ ⵍⴰⵢⵍⴰ ⴱⵏⵄⵍⵉ, ⵜⴰⵎⴰⵡⵙⴰⵙⵜ ⵏ ⵓⵎⵎⴰⵜⵜⵉ ⴰⵏⵥⴹⴰⵕ ⴷ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵔⵉⵎⵉ ⵔⵉⵢⵓ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵙⵏⵓⵔⴰⵢⵜ ⵜⴰⴼⵔⴰⵏⵙⵉⵙⵜ ⵏ ⵜⴳⵎⵉ, ⵀⵉⵍⵉⵏ ⵍⵓⴳⴰⵍ, ⵜⴰⵎⵙⵇⴰⴷⵜ ⵏ ⴼⵔⴰⵏⵙⴰ ⴳ ⵍⵎⵖⵔⵉⴱ, ⵜⵙⵏⵓⵔⴰⵢⵜ ⵜⴰⴼⵔⴰⵏⵙⵉⵙⵜ ⵍⵎⵖⵔⵉⴱ ⴳ ⵓⵙⵉⵍⵖ ⵏ ⵜⵙⵜⵔⴰⵜⵉⵊⵉⵜ ⵏ ⵜⵙⵎⴽⵜⴰ ⵜⵓⵣⴷⵉⵔⵜ ⵏ ⵜⵣⴰⵔⴰⵢⵜ ⵜⴰⵎⴰⴳⴳⵓⴳⵜ. ⵉⵔⵏⵓ ⵓⵙⴰⴳⵎ ⴰ ⵏⵉⵜ ⵉⵙ ⵜⵡⴰⵜⵙ ⵜⵙⵎⴽⵜⴰ ⴰ ⵙ ⵓⵥⵍⴰⵢ, ⴰⵙⵉⵍⵖ ⵏ ⵓⵖⴰⵡⴰⵙⵏ ⵉⵏⴳⵔⴰⵏⵏ ⵏ ⵜⵡⵓⵔⵉⵖⴼ ⵜⵣⴰⵔⴰⵢⵜ ⵜⴰⵎⴰⴳⴳⵓⴳⵜ, ⴳ ⵢⵉⴳⵔⴰⵏ ⵏ ⵜⵥⴹⴰⵕⵜ ⴷ ⵓⵙⵢⴰⴼⵓ ⵏ ⵜⵔⵉⵙⵉⵏⵜⵉ, ⵜⴰⵎⴳⵓⵔⵉ, ⵜⴰⴽⵔⵣⴰ, ⵜⵓⵙⴽⴰ, ⴰⵙⵙⴰⵢ, ⵜⴰⴳⴰⵏⵉⵏ, ⵓⵍⴰⵉⴼⵕⴰⴹⵏ.

ⴰⵎⵢⴰⵡⴰⵙ ⴳⵔ ⵍⵎⵖⵔⵉⴱ ⴷ ⵓⵙⴰⴳⵔⴰⵡ “ⵍⴼⵓⴱⵔⵉⵍ” ⵉⵙⵍⵍⵡⴰ ⴷ “ⵜⵉⵏⵓⵟⵟⴰⴼ ⵜⵓⵎⵏⵉⴳⵉⵏ” (ⵍⴱⴰⵢⴰⵏ)

ⵉⵙⵙⵏⵜⵎ ⵓⵙⵉⵔⴰ ⴰⵎⴰⵜⴰⵢ ⴰⵎⵣⵣⴳⴰⵔ ⵏ ⵓⵙⴰⴳⵔⴰⵡ ⵏ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵉⵏ ⵏ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵎⴰⵔⵉⴽⴰⵏ ⵜⴰⵏⴰⵎⵎⴰⵙⵜ ⴷ ⵓⵎⴷⴰ ⵏ ⴽⴰⵔⴰⵢⵉⴱ ⴷ ⵎⵉⴽⵙⵉⴽⴽⵓ “ⵍⴼⵓⴱⵔⵉⵍ”, ⵙⴰⵏⵜⵢⴰⴳⵓ ⵓⵍⵉⵙⵉⵙ ⵔⵉⴱⴰⵙ, ⵜⵉⴳⵉⵔⴰ ⴰ ⴳ ⵕⵕⴱⴰⵟ, ⵉⵙ ⴷ ⵉⵙⵍⵍⵡⴰ ⵓⵎⵢⴰⵡⴰⵙ ⴳⵔ ⵍⵎⵖⵔⵉⴱ ⴷ ⵓⵙⴰⴳⵔⴰⵡ “ⵍⴼⵓⵔⴱⵉⵍ” “ⵜⵉⵏⵓⵟⵟⴰⴼ ⵜⵓⵎⵏⵉⴳⵉⵏ” ⵉⴱⴱⵉ “ ⵉⵃⵏⵓⵣⵏ ⵉⵎⵇⵔⴰⵏⵏ”, ⴰⵢⴰ ⴷⴼⴼⵉⵔ ⵜⴰⵙⵎⵓⵏⵉ ⵜⴰⵎⴳⴳⴰⵔⵓⵜ ⵖⴼ ⵣⵔⵉⵏ ⵙⵎⵎⵓⵙ ⵏ ⵉⵙⴳⴳⵯⴰⵙⵏ. ⵉⵏⵏⴰ ⵔⵉⴱⴰⵙ, ⴳ ⵜⵉⵏⴰⵡⵜ ⵜⴰⵏⵖⵎⴰⵙⵜ ⵉⵙⵙⴰⵔⵏ ⴰⴽⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⵎⵛⵛⵉⵡⴰⵔ, ⵔⴰⵛⵉⴷ ⵟⵟⴰⵍⴱⵉ ⵍⵄⴰⵍⴰⵎⵉ ⴷ ⵏⵏⵉⵄⴰⵎ ⵎⵢⴰⵔⴰ, ⴳ ⵜⵎⴳⴳⴰⵔⵓⵜ ⵏ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⵓⵙⵍⵉⴷⵜ ⵜⵉⵙⵙ 26 ⵏ ⵓⵙⴰⴳⵔⴰⵡ, ⵔⴰⴷ ⵉⵥⵔ ⵓⵎⵢⴰⵡⴰⵙ ⴳⵔ ⵜⴼⵓⵍⵉⵏ ⴰⴷⵃⴰⵢⴰⵎⴰⵢⵏⵓ ⵙ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⵛⵛⴰⵔⵏ ⴷ ⵜⵡⵓⵔⵉ ⵖⴼ ⵜⵎⵏⵜⵉⵍⵉⵏ ⵉⴷ ⵎⵎ ⵓⵏⵣⴳⵓⵎ ⵉⵙⵙⴰⵔⵏ, ⴰⵎⵎ ⵓⵙⵙⵓⵔⴼ ⵏ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵔ ⴽⵓⴼⵉⴷ ⴷ ⵓⵙⵖⵓⴷⵓ ⵏ ⵉⵙⵍⴳⵏⵏ ⵏ ⵓⵙⵙⵍⵎⴷ ⴷ ⵓⵎⵏⵏⵓⵖ ⵎⴳⴰⵍ ⴰⵏⵙⴼⵍ ⵏ ⵓⵏⵣⵡⵉ ⵍⵍⵉ ⴷ ⵉⵙⵔⴰⵙⵏ ⴰⵡⴷ ⵏⵜⵜⴰ ⴰⵎⵓⴽⵔⵉⵙ ⵏ ⵜⵏⴼⵔⵓⵜ ⵏ ⵡⵓⵛⵛⵉ.

ⵜⵓⵙⵙⵔⴰ ⵏ ⵓⵙⵜⴰⵢ ⵏ ⴽⴽⵓⵥ ⵏ ⵉⴳⵎⴰⵎⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴷⴳ ⵜⵎⵜⴻⵜⵜⴰⵢⵜ ⵜⵓⵙⵜⵉⵢⵜ ⵜⴰⴷⵖⵔⴰⵏⵜ “ⵍⵃⵓⵙⵉⵎⴰ” (ⵍⴱⴰⵢⴰⵏ)

ⵜⵏⴽⴹ ⵜⵙⵏⴱⴹⴰⵢⵜ ⵜⴰⴷⵙⵜⴰⵔⵜ, ⴳ ⵜⵖⵜⴰⵙⵜ ⵏⵏⵙ, ⵙ ⵜⵓⵙⵙⵔⴰ ⵏ ⵓⵙⵜⴰⵢ ⵏ ⴽⴽⵓⵥ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵔⴰ, ⴳ ⵜⵎⵜⴻⵜⵜⴰⵢⵜ ⵜⵓⵙⵜⵉⵢⵜ ⵜⴰⴷⵖⵔⴰⵏⵜ “ⵍⵃⵓⵙⵉⵎⵎⴰ”, ⵍⵍⵉ ⵙ ⵏⵏⴰⵏ ⵜⵜⵢⴰⵙⵜⴰⵢⵏ ⴳ ⵉⵙⵜⴰⵢⵏ ⵉⵣⵔⵉⵏ ⴰⵙⵙ ⵏ 8 ⵛⵓⵜⴰⵏⴱⵉⵔ ⴳ ⵓⵙⵇⵇⵉⵎ ⵏ ⵉⵎⵓⵔⴰ. ⵉⵎⴽ ⵉⵍⵍⴰⵏ ⴳ ⵜⵖⵜⴰⵙⵜ ⵏ ⵜⵙⴱⴹⴰⵢⵜ, ⵍⵍⵉ ⵉⴼⴼⵖⵏ ⴳ ⵡⴰⵏⵙⴰ ⵏⵏⵙ ⴰⵍⵉⴽⵟⵕⵓⵏⵉ, ⵉⵥⵍⵉ ⵓⵢⴰ ⵙ ⵉⴷ ⵎⴰⵙⵙ ⵏⵓⵔⴷⴷⵉⵏ ⵎⴹⵢⴰⵏ ⴷ ⴱⵓⵟⴰⵀⵔ ⵍⴱⵓⵟⴰⵀⵔⵉ ⴷ ⵎⵓⵃⵎⵎⴰⴷ ⵍⵃⵎⵎⵓⵜⵉ ⴷ ⵎⵓⵃⵎⵎⴰⴷ ⵍⵄⵕⵊ. ⵜⵙⵙⵓⵜⵔ ⵜⵙⵏⴱⴹⴰⵢⵜ ⴰⴷ ⴷⵉⵖ ⵜⵜⵓⴳⵉⵏ ⵉⵙⵜⴰⵢⵏ ⵉⵎⴰⵢⵏⵓⵜⵏ ⴳ ⵜⵎⴻⵜⴻⵜⵜⴰⵢⵜ ⵉⵜⵜⵢⴰⴱⴷⴰⵔⵏ ⴳ ⵓⵡⵇⵇⵔ ⵏ ⵉⵏⴽⴰⴹⵏ ⵏ ⵉⵎⵏⵏⵉ 91 ⵏ ⵓⵙⵍⴳⵏ ⴰⵎⵙⵙⵓⴷⵏ ⵉⵥⵍⵉⵏ ⵙ ⵓⵙⵇⵇⵉⵎ ⵏ ⵉⵎⵓⵔⴰ.

ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵍⵉⵎⴰⵔⵜ ⵉⵙⵙⵎⵖⵓⵔ ⵙ ⵜⵎⵍⴰⵍⵜ ⵜⵓⵣⵡⴰⵔⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⴳ ⵡⴰⵏⵏⴰⵍ ⵏ ⵉⴱⴷⴷⵉ ⵏ ⵍⵎⴰⵇⴷⵉⵙⵉⵏ (ⵍⵉⴱⵉⵔⴰⵙⵢⵓⵏ)

ⵉⵙⵙⵎⵖⵓⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ (ⴰⴱⵔⵍⴰⵎⴰⵏ) ⵏ ⵓⵡⴰⵏⴽ ⵏ ⵍⵉⵎⴰⵕⴰⵜ ⵉⵎⵓⵏⵏ ⵚⴰⵇⴰⵕ ⵖⴰⴱⴰⵛ ⵙ ⵜⵎⵍⴰⵍⵜ ⵜⴰⵎⵣⵡⴰⵔⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ, ⵉ ⵡⴰⵏⵏⴰⵍ ⵏ ⵉⴱⴷⴷⵉ ⵏ ⵍⵎⴰⵇⴷⵉⵙⵉⵏ.ⵉⵎⴽⵉⵏⵏⴰ ⵉⵙⵙⵉⵜⴳ ⵖⴰⴱⴰⵛ, ⴳ ⵡⴰⵡⴰⵍ ⵏⵏⵙ ⴳ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⵖⴰⵡⵍ ⵡⵉⵙⵙ ⴽⵕⴰⵎⵔⴰⵡ ⴷ ⴽⵕⴰⴹ ⵏ ⵡⴰⵎⵓⵏ ⵏ ⵉⴱⵕⵍⴰⵎⴰⵏⵏ ⵉⵄⵔⴰⴱⵏ ⴰⵙⵍⵉⴷ ⵏ ⵓⵚⵉⴹⵢⴰⵙ ⴳ ⵍⵇⴰⵀⵉⵔⴰ, ⵜⴰⵎⵍⴰⵍⵜ ⵏ ⴱⴰⴱ ⵏ ⵡⵓⴷⴷⵓⵔ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴳ ⵓⵎⵣⴰⵖ ⵏ ⵜⵎⴷⵉⵏⵜ ⵜⴰⴼⵓⵥⴰⵕⵜ. ⵉⴱⴷⵔ ⵚⴰⵇⴰⵕ ⵖⴰⴱⴰⵛ ⵍⵎⴰⵡⴰⵇⵉⴼ ⵏ ⵜⵎⴰⵣⵉⵔⵜ ⵏⵏⵙ ⵍⵍⵉ ⵉⵜⵜⵚⴷⴷⴰⵏ ⵙ ⵜⵙⴳⴰ ⵏ ⵉⵡⵓⵏⴰⴽ ⵉⵄⵔⴰⴱⵏ, ⴳ ⵜⵙⵔⵜⵉⵜ ⴷ ⵜⴷⵉⴱⵍⵓⵎⴰⵙⵉⵜ ⵉ ⵎⴰⵕⵕⴰ ⵜⵉⵎⵙⴽⵉⵔⵉⵏ ⴷ ⵜⵖⵜⴰⵙ ⵏ ⵉⵥⵔⴰⵢⵉⵍ ⵍⵍⵉ ⵉⵡⴰⵜⵙⵏ ⴰⵙⴰⵎⵙ ⴷ ⵓⵙⵏⴼⵍ ⵏ ⵜⵎⴰⴳⵉⵜ ⵏ ⵜⵎⵙⴳⵉⴷⴰ ⵏ ⵍⴰⵇⵙⴰ, ⵏⵖ ⴰⵙⵏⴼⵍ ⵏ ⵡⴰⴷⴷⴰⵍ ⵓⵍⴳⵉⵏ ⴷ ⵓⵎⵣⴰⵔⴰⵢ ⴳ ⵍⵇⵓⴷⵙ, ⴷ ⵓⵥⵍⴰⵢ ⵏⵏⵙ ⴰⵄⵔⴰⴱ ⴰⵏⵙⵍⵎ.

ⵉⵊⴳⵉⵍ ⵏ ⵓⵣⵡⵉⵍ ⵉⵙⵜⵉⴷⵍⴰⵍⵉ ⵏ ⵡⴰⵜⵉⴳⴳⵏ ⵖⵓⵔ ⵉⵏⵙⵎⵓⵜⵔⵏ ⵙ 1,8% ⴳ ⵡⴰⵢⵢⵓⵔ ⵏ ⵉⴱⵔⵉⵔ 2022 (ⵍⵉⴱⵉⵔⴰⵙⵢⵓⵏ)

ⵜⵏⵏⴰ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵏ ⵓⵙⵖⵉⵡⵙ, ⵉⵙ ⵉⵣⵎⵎⴻⵎ ⵓⵣⵡⵉⵍ ⵉⵙⵜⵉⴷⵍⴰⵍⵉ ⵏ ⵡⴰⵜⵉⴳⴳⵏ ⵖⵓⵔ ⵉⵏⵙⵎⵓⵔⵏ, ⴳ ⵡⴰⵢⵢⵓⵔ ⵏ ⵉⴱⵔⵉⵔ 2022 ⴳ ⵓⵙⵎⵣⴰⵣⴰⵍ ⴰⴽⴷ ⵡⴰⵢⵢⵓⵔ ⵉⵣⵔⵉⵏ. ⵜⵙⴼⴰⵡ ⵜⵙⵎⵉⵔⵉⵜ ⴳ ⵜⵎⵙⵙⴽⵜⵉⵜ ⵜⴰⵏⵖⵎⴰⵙⵜ ⵖⴼ ⵓⵣⵡⵉⵍ ⵉⵙⵜⵉⴷⵍⴰⵍⵉ ⵏ ⵡⴰⵜⵉⴳⴳⵏ ⵖⵓⵔ ⵉⵏⵙⵎⵓⵔⵏ ⴳ ⵡⴰⵢⵢⵓⵔ ⵏ ⵉⴱⵔⵉⵔ 2022, ⵉⵙ ⴷ ⵉⴷⴷⴰ ⵢⵉⵊⴳⵉⵍ ⴰ ⵙⴳ ⵜⵉⵔⵏⵉ ⵏ ⵓⵣⵡⵉⵍ ⵉⵙⵜⵉⴷⵍⴰⵍⵉ ⵏ ⵜⵎⵜⵜⵉⵡⵉⵏ ⵏ ⵡⵓⵛⵛⵉ ⵙ 3,0% ⴷ ⵓⵣⵡⵉⵍⵉⵙⵜⵉⴷⵍⴰⵍⵉ ⵏ ⵜⵎⵜⵜⵉⵡⵉⵏ ⵜⵉⵢⴹ ⴱⵍⴰ ⵜⵉⵏ ⵡⵓⵛⵛⵉ ⵙ 0,9%. ⵜⵙⴱⴰⵢⵏ ⵜⵙⵎⵉⵔⵉⵜ ⵉⵊⴳⵉⵍⵏ ⵏ ⵜⵎⵜⵜⵉⵡⵉⵏ ⵏ ⵡⵓⵛⵛⵉ ⵉⵜⵜⵓⵣⵎⵎⴻⵎⵏ ⴳⵔ ⵡⴰⵢⵢⵓⵔ ⵏ ⵎⴰⵕⵙ ⴷ ⵡⴰⵢⵢⵓⵔ ⵏ ⵉⴱⵔⵉⵔ 2022 ⴰⵖⵓⵍⵏ ⵙ ⵍⴰⵡⴰⵏ ⵙ ⵉⴳⵓⵎⵎⴰ (12,3%), ⵉⵣⴰⵜⵉⵎⵏ ⴷ ⴷⵓⵀⵏⵉⵢⴰⵜ” (5,0%), “ ⵉⵛⴰⴽⴰⵏ” (2,9%), ⴷ ⵉⵙⵍⵎⴰⵏ ⴷ ⵉⴳⵓⵎⵎⴰ ⵏ ⵢⵉⵍⴻⵍ” (1,4%),” ⵜⴰⵏⵖⵍⵓⵙⵜ ⴷ ⵡⴰⵜⴰⵢ ⴷ ⴽⴰⵡⴽⴰⵡ” (0,3%), ⵜⵙⵙⵎⵜⵔ ⵉⵙ ⴳⴳⵣⵏ ⵡⴰⵜⵉⴳⴳⵏ ⵏ ‘ⵓⴽⴼⴼⴰⵢ ⴷ ⵜⵉⴽⵍⵉⵍⵜ ⴷ ⵜⴳⵍⴰⵢ” ⵙ 0,5%.

ⵜⵉⵎⴰⵛⴽⵓⵜⵉⵏ ⵏ “ⵜⵣⵔⵣⴰⵢⵜ ⵏ ⵉⴱⵓⵖⴰⵙ” ⵓⵔ ⴷⴳⵙⵏⵜ ⵎⴰ ⴰⵢ ⴷ ⵉⵜⵜⵀⵡⵡⴰⵍⵏ ⵍⵎⵖⵔⵉⴱ ⴷ ⵓⵎⴰⴹⴰⵍ (ⵎⴰⵔⵓⴽ ⵍⵓⵊⵓⵔ)

ⵉⵙⵙⵏⵜⵎ ⵓⵎⵙⴳⵏⴰⴼ ⴰⵎⵔⵣⵓ ⴳ ⵜⵙⵔⵜⵉⵜⵉⵏ ⴷ ⵉⵏⴳⵔⴰⵡⵏ ⵉⴷⵓⵙⴰⵏⵏ, ⵟⵟⴱ ⵃⵎⴹⵉ, ⵉⵙ ⵉⵍⵍⵉ ⵎⴰ ⵉⵜⵜⵀⵡⵡⴰⵍⵏ ⴳ ⵜⵎⴰⵛⴽⵓⵜⵉⵏ ⵏ “ⵜⵣⵔⵣⴰⵔⵜ ⵏ ⵉⴱⵓⵖⴰⵙ” ⵉⵜⵜⵢⴰⵣⵎⵎⴰⵎⵏ ⴳ ⵜⵓⴳⴳⵜ ⵏ ⵜⵎⵉⵣⴰⵔ ⵉⵎⴰⵍⴰⵙⵙⵏ ⵉⵣⵔⵉⵏ “ ⵍⵎⵖⵔⵉⴱ ⴷ ⵓⵎⴰⴹⴰⵍ ⴳ ⵡⴰⴽⵓⴷ ⴰⵎⵉⵔⴰⵏ” ⵉⵙⴼⴰⵡ ⵍⵃⵎⴹⵉ, ⴳ ⵓⵎⴰⴳⵔⴰⴷ ⵙ ⵜⵎⴰⵜⴰⵔⵜ “ ⴰⴷⴷⴰⴷ ⴷ ⵉⵙⵎⵉⴳⵍⵏ ⵉⴷⵓⵙⴰⵏⵏ ⵉⴼⵓⴽⴽ ⴰⴷ ⵜⵜⵓⴹⵓⴼⵏ ⵜⵜⵡⴰⴹⴼⵕⵏ, ⵎⴰⵛⴰ ⵓⵔ ⵉⵍⵍⵉ ⵎⴰ ⵉⵜⵜⵀⵡⵡⴰⵍⵏ ⴳ ⵡⴰⴽⵓⴷ ⴰⵎⵉⵔⴰⵏ ⵍⵎⵖⵔⵉⴱ ⵓⵍⴰ ⵉⵡⵓⵏⴰⴽ ⵢⴰⴹⵏ”, “ⵉⵇⵇⴰⵏ ⴷ ⵓⵙⵎⵉⴳⵍ ⴰⴷⵓⵙⴰⵏ ⵜⵉⵎⴰⵛⴽⵓⵜⵉⵏ ⵏ ⵜⵣⵔⵣⴰⵔⵜ ⵏ ⵉⴱⵓⵖⴰⵙ ⵙⴳ ⵖⵓⵔ ⵜⵏⴱⴰⴹⵉⵏ ⵜⵉⴷⵓⵙⴰⵏⵉⵏ ⴳ ⵜⵎⴰⴷⴷⴰⵙⵜ ⵜⴰⵎⴰⴹⵍⴰⵏⵜ ⵏ ⵜⴷⵓⵙⵉ, ⴳ ⵓⵙⵉⴷⴷ ⵏ ⵜⵡⴰⴼⵉⵜ ⵏ ⵜⵉⵢⵢⴰⴹ ⵜⵎⴰⵛⴽⵓⵜⵉⵏ ⴳ ⵓⵕⵓⴱⴱⴰ ⴷ ⵎⴰⵔⵉⴽⴰⵏ ⵏ ⵉⵥⵥⵍⵎⴹ.”

ⴱⵏⵙⵄⵉⴷ ⵉⵔⵣⵣⵓ ⴰⴽⴷ ⵉⴽⵏⵉ ⵏⵏⵙ ⴰⴱⵃⵔⵉⵏⵉ ⵉⴱⵔⴷⴰⵏ ⵏ ⵓⵙⴱⵓⵖⵍⵓ ⴰⵢⵓⴳⴰⵏ ⴳ ⵢⵉⴳⵔ ⵜⵄⵓⵔⵔⵎⴰ ( ⵎⴰⵔⵓⴽ ⵍⵓⵊⵓⵔ)

ⵉⵔⵣⴰ ⵓⵎⴰⵡⵙⴰⵙ ⵏ ⵜⵄⵓⵔⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⵙ ⵜⵉⵇⵏⵉⵜ ⵏ ⵜⵉⵏⴰⵡⵜ ⵜⵉⵏⵉⵥⵕⵉⵜ ⴰⴽⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⵜⵄⵓⵔⵔⵎⴰ ⴷ ⵜⵓⵏⵏⵓⵏⵜ ⴰⴱⵃⵔⵉⵏⵉ ⴰⵢⵎⴰⵏ ⴱⵏ ⵜⴰⵡⴼⵉⵇ ⵍⵎⵓⴻⵢⵢⴰⵏ, ⵖⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵢⵓⴳⴰⵏ ⴳ ⵢⵉⴳⵔ ⵏ ⵜⵄⵓⵔⵔⵎⴰ. ⵉⴱⴷⵔ ⵓⵙⵉⵡⴹ ⵏ ⵜⵎⴰⵡⵙⴰⵙⵜ ⵏ ⵜⵄⵓⵔⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⵉⵙ ⵙⵙⵏⵜⵎⵏ ⵙ ⵙⵉⵏ ⴳ ⵜⵉⵣⵡⵓⵔⵉ ⵏ ⵓⵎⵙⴰⴳⴰⵔ ⴰ ⴰⴷⵡⴰⵙ ⵏ ⵉⵎⵢⴰⵙⵙⴰⵜⵏ ⵏ ⵜⵡⵉⵣⵉ ⵉⵙⵙⵓⴷⴰⵏ ⵍⵍⵉ ⵉⵙⵎⵓⵏⵏ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴰⴽⴷ ⵜⴳⵍⴷⵉⵜ ⵏ ⵍⴱⵃⵔⴰⵢⵏ ⵙ ⵜⵏⴱⴰⴹⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴷ ⵓⵢⵎⴰⵙ ⴱⴰⴱ ⵏ ⵡⵓⴷⴷⵓⵔ ⵃⵎⴷ ⴱⵏ ⵄⵉⵙⴰ ⴱⵏ ⵙⴰⵍⵎⴰⵏ ⴰⵍ ⵅⴰⵍⵉⴼⴰ, ⴷ ⵓⴹⴼⴰⵕ ⵏⵏⵙⵏ ⴰⵙⵙⵓⴷⵓ ⵏ ⵓⵙⴱⵓⵖⵍⵓ ⵏ ⵉⵎⵢⴰⵙⵙⴰⵜⵏ ⴰ ⴷ ⵓⵙⵙⵉⵍⵉ ⵏⵏⵙⵏ ⵙ ⵉⵙⵡⵉⵔⵏ ⵢⴰⵜⵜⵓⵢⵏ.

ⵜⴰⵎⴰⵡⴰⵙⵜ  ⵏ ⵓⵙⴳⵎⵉ ⴰⵏⴰⵎⵓⵔ ⵜⵕⵥⵎ ⵉⵙⵇⵙⴰⵢ ⵉⵜⵜⵢⴰⵣⵏ ⵉ ⵓⴳⴷⵓⴷ ⴰⴷ ⵢⵓⵎⵓ ⴳ ⵉⵎⵛⴰⵡⴰⵕⵏ ⵉⵏⴰⵎⵓⵔⵏ ⵖⴼ ⵓⵙⵖⵓⴷⵓ ⵏ ⵜⵉⵏⵎⵍ ⵜⴰⴳⴷⵓⴷⴰⵏⵜ (ⵍⵓⵎⴰⵜⵉⵏ)

ⵜⵕⵥⵎ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ ⴳ ⵜⴱⴰⴷⵓⵜ “ⵎⴰⴷⵔⴰⵙⴰⵜⵏⴰ.ⵎⴰ” ⴰⵙⵇⵙⴰⵢ ⵉⵜⵜⵢⴰⵣⵏⵏ ⵉ ⵎⴰⵕⵕⴰ ⵜⵉⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ ⴰⴷ ⵓⵎⵓⵏ ⴳ ⵉⵎⵛⴰⵡⴰⵕⵏ ⵉⵏⴰⵎⵓⵔⵏ ⵖⴼ ⵓⵙⵖⵓⴷⵓ ⵏ ⵜⵉⵏⵎⵍ ⵜⴰⴳⴷⵓⴷⴰⵏⵜ. ⵜⵄⵡⵡⵍ ⵜⵎⴰⵡⴰⵙⵜ ⵖⴼ ⵜⴱⵔⵉⴷⵜ ⴰ ⵜⴰⵍⵉⴽⵟⵕⵓⵏⵉⵜ ⵉⵍⵍⴰⵏ ⴳ ⵓⵣⴷⴰⵢ https://www.madrastna.ma/projects/questionnaire ⵖⴼ ⵡⵓⵟⵓⴼ ⵏ ⵜⴰⵏⵏⴰⵢⵉⵏ ⴷ ⵓⵙⵎⵎⵜⵔⵏ ⵏ ⵎⴰⵕⵕⴰ ⵜⵉⵏⵎⵓⵔⴰⵏ ⴷ ⵉⵏⵎⵓⵔⴰⵏ ⵖⴼ ⵉⴱⵔⴷⴰⵏ ⵏ ⵓⵙⵍⵍⵡⵓ ⵏ ⵜⵉⵏⵎⵍ ⵍⵍⵉ ⵔⴰⵏ ⵉⵜⵜⵔⴰⵔⴰⵏ ⵖⴼ ⵉⴳⴰⵏⵏⵉⵜⵏ ⵏⵏⵙⵏ.  ⵖⴼ ⵡⴰⵡⴰⴹ ⵏ ⵓⵡⵜⵜⴰⵙ ⴰ, ⵜⴳⵔ ⵜⵎⴰⵡⴰⵙⵜ ⴰⵖⵓⵔⵉ ⴰⴷ ⵉⵜⵜⵓⵙⵎⴰⵜⴰ ⵓⵣⴷⴰⵢ ⵏ ⵓⴽⵛⵛⵓⵎ ⵙ ⴰⵙⵇⵙⴰⵢ ⴰ ⵉ ⵎⴰⵕⵕⴰ ⵉⵎⴳⴳⴰⵢⵏ ⴷ ⵜⵎⵙⵎⵓⵏⵉⵏ ⵏ ⵉⵎⴰⵔⴰⵡⵏ ⴷ ⵉⵏⵖⵍⴰⴼⵏ, ⵓⵍⴰ ⵎⴰⵕⵕⴰ ⵉⵏⴽⵛⴰⵎⵏ ⴳ ⵜⵖⴰⵡⵙⴰ ⵜⴰⵙⴳⵎⴰⵏⵜ ⴷ ⵉⵎⴷⵔⴰⵡⵏ ⵏ ⵜⵉⵏⵎⵍ ⴷ ⵎⴰⵕⵕⴰ ⵉⴼⵔⴷⵉⵙⵏ ⵏ ⵡⴰⵎⵓⵏ ⴰⵎⵖⵔⵉⴱⵉ ⴰⴷ ⴰⴼⵏ ⴰⴷ ⵓⵎⵓⵏ ⴳ ⵓⵙⵖⵓⴷⵓ ⵏ ⵜⵉⵏⵎⵍ ⵜⴰⴳⴷⵓⴷⴰⵏⵜ.

ⵉⵣⵔⵉⵔⵉⴳ ⵏ ⵓⴳⴰⵣ ⴰⵎⵖⵔⵉⴱⵉ ⴰⵏⵉⵊⵉⵔⵉ ⵔⴰⴷ ⵉⵙⴷⵓⵙ ⴰⵙⵙⴰⵔⵓ (ⵍⵓⴱⵉⵏⵢⵓⵏ)

ⵜⵏⵏⴰ ⵍⴰⵟⵉⴼⴰ ⵍⵄⴱⴹⵍⵍⴰⵡⵉ, ⵜⴰⵏⵎⵀⴰⵍⵜ ⵜⴰⵎⴰⵜⴰⵢⵜ ⵏ ⵡⴰⵎⵎⴰⵙ ⴰⵏⵙⵍⵎ ⵉ ⵜⴳⵎⵉ ⵏ ⵜⵙⴱⴱⴰⴱⵜ, ⵉⵙ ⵉⵎⵙⴰⵙⴰ ⵓⵙⵖⵏⵓ ⵏ ⵉⵣⵔⵉⵔⵉⴳ ⵏ ⵓⴳⴰⵣ ⴰⵎⵖⵔⵉⴱⵉ ⴰⵏⵉⵊⵉⵔⵉ ⴰⴽⴷ ⵜⴰⵔⴰⵢⵜ ⵏ ⵜⴳⵎⵉ ⵜⴰⴷⵎⵙⴰⵏⵜ ⵜⴰⵎⵔⴰⵡⵜ 2015/2025 ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⵏⵙⵍⵎ ⵍⵍⵉ ⵉⵙⵙⵏⵜⴰⵎⵏ ⵖⴼ ⵓⵙⵎⴰⴷ ⴳⵔ ⵉⵡⵓⵏⴰⴽ ⵏ ⵜⵙⴳⴰ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⵏⵙⵍⵎ, ⵍⵍⵉ ⵉⴳⴰⵏ ⵢⴰⵏ ⵙⴳ ⵉⵡⵜⵜⴰⵙⵏ ⵏⵏⵙ ⵉⴷⵙⵍⴰⵏⵏ. ⵜⵏⵏⴰ ⵍⴰⵏ ⵉⵡⵓⵏⴰⴽ ⵉⴳⵎⴰⵎ ⴳ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⵏⵙⵍⵎ ⵜⵉⵎⴷⵔⴰⵡⵉⵏ ⴳ ⵓⵙⵖⵏⵓ ⴰ ⵜⵉⵥⵉⴹⴰⵕ ⵜⵉⵎⵙⵎⴰⴷⵉⵏ ⵉⵖⵉⵢⵏ ⴰⴷ ⴳⵔⵏ ⵓⵏⴼⵓⵙ ⴰⵎⴰⵢⵏⵓ ⵉⵙⵉⴷⴼ ⴰⴷⵎⵙⴰⵏ ⴳⵔ ⵉⵡⵓⵏⴰⴽ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⵏⵙⵍⵎ ⴰⴼⵔⵉⵇⵉⵢ.

ⵜⴰⴱⴰⴷⵓⵜ ⵏ ⵉⵄⵔⵔⵉⵎⵏ ⴳ ⵜⵉⵏⵖⵉⵔ : ⵜⴰⴽⴰⵢⵍⴰⵍⵜ ⵜⴰⵅⴰⵜⴰⵔⵜ ⵏ ⵉⵢⵉⵡⵙ ⵏ ⵉⵄⵔⵔⵉⵎⵏ ⵉ ⵜⵙⵉⵡⴰⵍⵜ ⵏ ⵉⵙⵖⵏⵓⵜⵏ ⵏⵏⵙⵏ ⵉⵥⵍⵉⵏ (ⵍⵓⴱⵉⵏⵢⵓⵏ)

ⵜⵍⴰ ⵜⵎⴷⵉⵏⵜ ⵏ ⵜⵉⵏⵖⵉⵔ ⵜⴰⴱⴰⴷⵓⵜ ⵏ ⵜⵄⵓⵔⵔⵎⴰ, ⵜⵙⵔⵙ ⵜⵓⵙⴽⵉⵡⵜ ⵏⵏⵙ ⵜⴰⴷⵙⵍⴰⵏⵜ ⵜⵙⵏⵜⴰⵢⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵜⴰⵏⴼⴳⴰⵏⵜ ⴳ ⵜⵙⴳⴰ, ⴰⵔ ⴱⴰⵀⵔⴰ ⵜⵙⵡⵓⵔⵉ ⵃⵎⴰ ⴰⴷ ⵜⵙⵡⴰⵍⴰ ⵉⵄⵔⵔⵉⵎⵏ ⵙ ⵉⴳⵔⴰⵏ ⵉⴷⵎⵙⴰⵏⵏ ⴷ ⵢⵓⵙⴰⵏ ⵉ ⵜⵥⵉⴹⴰⵕ ⵏⵏⵙⵏ ⴷ ⵡⴰⵙⵙⴰⵔⵏ ⵏⵏⵙⵏ. ⵜⵡⴰⵜⵙ ⵜⴱⴰⴷⵓⵜ ⴰ, ⵍⵍⵉ ⵉⵜⵜⵓⴳⴰⵏ ⴰⵎⵎⴰⵙ ⵏ ⵜⵖⵔⵎⵜ, ⴰⴷ ⵜⵙⵏⵓⴱⴱⴳ ⵜⵙⵡⴰⵍⴰ ⵉⵄⵔⵔⵉⵎⵏ ⵙ ⵉⵙⵖⵏⵓⵜⵏ ⵍⵍⵉ ⵉⵖⵉⵢⵏ ⴰⴷ ⵔⴰⵔⵏ ⵜⵉⵖⵔⴰⴷ ⵉⵡⵔⵏ, ⵎⵙⵉⵙⵉⵏⵜ ⴰⴽⴷ ⵜⵙⵓⴳⴰⵔ ⵜⵉⵣⵣⵓⵍⴰⵏⵉⵏ ⴷ ⵏ ⵓⵙⵙⵍⵎⴷ ⵏⵏⵙⵏ. ⵉⵎⴽⵉⵏⵏⴰ ⵜⵡⴰⵜⵙ ⴰⵙⵎⵓⵏ ⵏ ⵉⵄⵔⵔⵉⵎⵏ ⴳ ⵜⵙⵉⵍⴰⵡⵜ ⵏ ⵉⵙⵡⵉⵏⴳⵉⵎⵏ ⵏⵏⵙ ⴷ ⵓⵙⵏⴼⵍ ⵏⵏⵙⵏ ⵙ ⵉⵙⵖⵏⵓⵜⵏ ⵉⴷⵎⵙⴰⵏⵏ, ⴳ ⵓⵢⵏⵏⴰ ⵉⵎⵙⴰⵙⴰⵏ ⴷ ⵜⵥⵍⴰⵢⵜ ⵜⴰⴷⵖⵔⴰⵏⵜ, ⴷ ⵉⴱⵔⴷⴰⵏ ⵏ ⵓⵙⵎⵓⵔⵙ ⵏ ⵓⵙⵖⵏⵓ ⴳ ⵉⵙⵡⵉⵔⵏ ⵉⵜⵉⵇⵏⵉⵢⵏ ⴷ ⵜⵎⴳⴳⴰ ⴷ ⵓⵙⵍⵍⵡⵓⵏ ⵏ ⵉⵡⵜⵜⴰⵙⵏ ⵉⵜⵜⵢⴰⵇⵇⵍⵏ.

ⵉⵙⵙⴰⵔⵓⵜⵏ: ⴰⵏⵏⵓⵕⵥⵎ ⴰⵏⴰⵍⴰⵡ ⵏ ⵜⴼⵏⵉⵇⵜ ⵎⵓⵎⵎⴰⴷ ⵡⵉⵙⵙ ⵚⴹⵉⵚ ⴳ ⵎⴰ ⵏⵏ ⵓⵔ ⵢⴰⴳⴳⵓⴳⵏ (ⵍⵉⴽⵓⵏⵓⵎⵉⵙⵜ)

ⵉⵍⵍⴰ ⵓⵙⵓⵊⴷ ⵙ ⴽⵉⴳⴰⵏ ⵏ ⵓⴷⵡⴰⵙ ⵉ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵎⵣⵡⴰⵔⵓ ⵏ ⵜⵎⵙⵙⵓⴳⵓⵔⵜ ⵏ ⵜⴼⵏⵉⵇⵜ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵏ ⵓⵙⵙⴰⵔⵓ. ⵔⴰⴷ ⵜⵜⵢⵉⵙⵉⵢⵏⵜ ⴽⵉⴳⴰⵏ ⵏ ⵜⵖⵜⴰⵙ ⵉⵥⵍⵉⵏ ⵙ ⵓⵏⵏⵓⵕⵥⵎ ⴰⵏⴰⵍⴰⵡ ⵏ ⵜⴼⵏⵉⵇⵜ ⵙ ⵜⵎⵍⴷⴰ ⴰ. ⵙ ⵓⵥⵍⴰⵢ ⴳ ⵓⵢⵏⵏⴰ ⵉⵇⵇⵏⵏ ⵙ ⵓⵥⵟⵟⴰ ⴷ ⵜⵉⴳⴳⵉ ⵏ ⵜⴼⵏⵉⵇⵉⵏ ⵜⵉⵏⴳⵔⴰⵏⵉⵏ ⵍⵍⵉ ⵉⵍⵍⴰⵏ ⴳ ⵓⴹⵕⵉⵚ ⵏ ⵓⵙⵍⴳⵏ 76.20. ⵉⵡⴰⵜⵙ ⴰⴼⵔⴰⵏ ⵏ ⵜⵎⵙⵙⵓⵔⵜ ⵓⵔ ⵎⵉ ⵉⵜⵜⵢⴰⵙⵙⵏ ⵢⵉⵙⵎ ⵃⵎⴰ ⴰⴷ ⵜⵜⵓⵙⵍⴱⵜ ⵉ ⵉⵏⴽⴰⴹⵏ ⵏ ⵓⵙⵍⴳⵏ 17.95, ⴷ ⵜⵙⵏⵙⵉ ⵏ ⵉⵎⴰⵙⵙⵏ ⵏ ⵓⵙⵍⴳⴰⵎⵓ ⴷ ⵜⵎⵔⵉⵙⵜ ⵙ ⵉⵎⵏⵣⴰⵢⵏ ⵏ ⵜⵎⴰⴼⴰⵡⵜ ⴷ ⵜⵣⴷⴳⵉ ⵉ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⵏ ⵉⵎⵙⵙⴰⵔⵓⵜⵏ ⴷ ⵉⵎⴷⵔⴰⵡⵏ ⵏ ⵢⵉⴳⵔ ⵓⵙⵍⵉⴳ. ⵢⵓⵎⴰ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ, ⵙ ⵜⵏⵙⵙⵉⵅⴼⵜ ⵏ ⵓⵎⴰⵡⵙⴰⵙ ⵏ ⵓⵥⵕⴼ, ⵎⵔⴰⵡ ⵏ ⵉⵏⵎⵀⴰⵍⵏ, ⴽⴽⵓⵥ ⵙⴳⵙ ⴷ ⵉⵙⵉⵎⴰⵏⵏ. ⴰⵔ ⵉⵜⵜⵉⵍⵉ ⵜⴰⵎⵙⵙⵓⴳⵓⵔⵜ ⵏ ⵜⴼⵏⵉⵇⵜ ⵢⴰⵏ ⵓⵏⵎⵀⴰⵍⴰ ⴰⵎⴰⵜⴰⵢ ⴷⴰ ⵜⵜⵢⵓⵙⵜⴰⵢ ⵏ ⵜⵎⴳⴳⴰ ⵏ ⵓⵙⵎⵎⴰ ⵙ ⵜⵙⵖⵡⴰⵏ ⵜⵉⵎⴰⵜⵜⵜⴰⵢⵉⵏ

ⵎⴰⵎⴽ ⵉⴽⵓⵜ ⵉⵏⵏ ⴰⴷ ⵉⴳ ⵍⵎⵖⵔⵉⴱ “ⴰⵚⴰⴹ” ⴰⵙⴳⴰⵡⴰⵏ (ⵍⵉⴽⵓⵏⵓⵎⵉⵙⵜ)

ⵉⵏⵏⴰ ⵓⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ, ⵕⵢⵢⴰⴹ ⵎⵥⵡⴰⵕ, ⴳ ⵓⵎⵙⴰⴳⴰⵔ ⵍⵍⵉ ⵜⵙⵏⵎⴰⵍⴰ ⵜⵎⵙⵎⵓⵏⵜ ⴰⵍⴰⵢ ⵏ ⵉⵎⴰⵡⴰⵢⵏ “ ⵏⵍⴰ ⴰⵣⵎⵣⵣⵓ ⴰⴷ ⵏⴳ, ⴳ ⵙⵎⵎⵓⵙ ⵏ ⵉⵙⴳⴳⵯⴰⵙⵏ ⴷ ⵜⵜⴷⴷⵓⵏ, ⴰⵚⴰⴹ ⵏ ⵜⵙⴳⴰ”, ⵍⵓⵎⵏ ⵉⵙ “ ⵏⵍⵎⴰⵡⴰⵢ ⵉⵍⵍⵡⵉ ⵏ ⵓⵏⴳⵔⴰⵡ ⴰⵎⴰⴹⵍⴰⵏ ⴰⵎⴰⵢⵏⵓ”, ⴳ ⵓⵣⵎⵣ ⵏ ⵉⵙⵏⴼⵍⵏ ⵍⵍⵉ ⴷ ⵉⴳⴳⵯⵔⴰⵏ ⵙⴳ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ, ⴷ ⵜⴰⵙⵙⴰⵙⵜ ⵏ ⵓⴽⵕⴰⵏⵢⴰ, ⴷ ⵢⵉⵊⴳⵉⵍ ⵏ ⵡⴰⵜⵉⴳⴳⵏ ⵉⴳⵔⴰⵖⵍⴰⵏⵏ … ⴷⴰ ⴰ ⵙⴳ ⵜⴷⴷⴰ ⵜⵉⵅⵅⵉⵜⵔⵜ ⵏ “ ⵓⵔ ⵏⴼⵍⵜ ⴰⵣⵎⵣⵣⵓ ⴰ”, ⵉⵏⵏⴰ ⴳ ⵓⵙⴰⵜⵉ ⴰ, “ ⴰⵔ ⵉⵣⵔⵔⵉ ⵓⵢⴰ ⴳ ⵓⵙⴷⵓⵙ ⵏ ⵓⴷⵖⴰⵔ ⵏ ⵍⵎⵖⵔⵉⴱ ⵉⴳⴰⵏ ⵜⴰⴱⴰⴷⵓⵜ ⵏ ⵓⴼⴰⵔⵙ ⴷ ⵓⵙⴱⵓⵖⵍⵓ”, ⵉⵔⵏⵓ, “ ⵏⴱⴱⵉ ⴰⵃⵏⵓⵣ ⴰⵖⵣⵣⴰⴼ. ⵎⴰⵛⴰ ⴷⴰ ⵏⵜⵜⴷⴷⵓ ⴳ ⵓⴱⵔⵉⴷ ⴰⵎⴰⴷⴷⵓⴷ.”

ⴰⴳⵔⴰⵡ ⴰⵎⴰⵜⴰⵢ ⵡⵉⵙⵙ 26 ⵏ ⵜⵎⴰⴷⴷⴰⵙⵜ ⴰⵍⴰⵙⴽⵓ ⵉⵙⵙⵖⵓⵔ ⵜⵉⵣⵎⵎⴰⵔ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⵎⵣⴰⵖⵖⴼ ⵍⵇⵓⴷⵙ ⴰⵛⵛⵔⵉⴼ (ⵍⵓⵎⴰⵜⵜⴰⵏ)

ⵉⵙⵙⵎⵖⵓⵔ ⵓⴳⵔⴰⵡ ⴰⵎⴰⵜⴰⵢ ⵡⵉⵙⵙ 26 ⵏ ⵜⵎⴰⴷⴷⴰⵙⵜ ⵜⴰⵄⵔⴰⴱⵜ ⵏ ⵓⵙⴳⵎⵉ ⴷ ⵜⴷⵍⵙⴰ ⴷ ⵜⵎⴰⵙⵙⴰⵏⵉⵏ “ⴰⵍⴽⵙⵓ”, ⵍⵍⵉ ⵉⵍⵍⴰⵏ ⴰⵙⵙⵍⵉⴷ ⴳ ⵜⵓⵏⵙ, ⵙ ⵜⵣⵎⵎⴰⵔ ⵍⵍⵉ ⵉⵜⵜⴳⴳ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵍⵇⵓⴷⵙ ⴳ ⵓⵎⵣⴰⵖ ⵖⴼ ⵍⵇⵓⴷⵙ ⴰⵛⵛⵔⵉⴼ ⴷ ⵓⴼⵔⴰⴳ ⵉ ⵜⵎⴰⴳⵉⵜ ⵏⵏⵙ. ⵢⵓⵙⵉ ⵓⴳⵔⴰⵡ ⴰⵎⴰⵜⴰⵢ, ⵉⴳⴰⵏ ⵜⴰⵙⵓⵜⵍⵜ ⵏⵏⵙ ⴰⵍⵓⴳⴰⵏ, ⵍⵍⵉ ⵉⴳⴰⵏ ⵜⴰⵙⵇⵇⵉⵎⵜ ⵜⴰⵏⴰⴹⴰⵏⵜ ⴰⴽⴽⵯ ⵢⴰⵜⵜⵓⵢⵏ ⴳ ⴰⵍⴽⵙⵓ ⵍⵍⵉ ⵢⵓⵎⴰⵏ 22 ⵏ ⵓⵡⴰⵏⴽ ⴰⴳⵎⴰⵎ, ⵜⴰⵖⵜⴰⵙⵜ ⵉⵙⵙⴽⴰⵏ ⴰⵏⵏⴰⵍ ⵉ ⵓⴳⵍⵍⵉⴷ ⴱⴰⴱ ⵏⵡⴰⴷⴷⵓⵔ ⴳ ⵜⵓⴱⴷⴷⴰ ⵏ ⵓⵖⵔⴼ ⴰⴼⴰⵍⴰⵚⵟⵉⵏⵉ.ⵉⵎⴽⵉⵏⵏⴰ ⵉⵙⴱⴰⵢⵏ ⵜⴰⵡⵓⵔⵉ ⵏ ⵓⴱⴰⵔⴰⵣ ⵏ ⵜⵙⵏⵓⵔⴰⵢⵜ ⵏ ⵜⴰⴷⴷⴰⵔⵜ ⵏ ⵍⵎⴰⵍ ⵍⵇⵓⴷⵙ, ⵉⵖⵉⵍ ⴰⵎⵣⵣⴳⴰⵔ ⵏ ⵜⵙⵇⵇⵉⵎⵜ ⵍⵇⵓⴷⵔ, ⴷⴷⴰⵡ ⵓⵙⴰⵜⵉ ⴰⵏⵎⵢⴰⴳ ⴷ ⵉⵎⵕⵡⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⴰⵙⵉⵔⴰ ⴰⵏⴰⵎⵓⵔ ⴰⵎⵖⵔⵉⴱⵉ ⵏ ⵜⵎⴰⵍⵍⴰⵢⵜ ⵉⵙⴳⵯⵔⴰ ⵜⵉⵡⵓⵔⵉⵡⵉⵏ ⵏ ⵜⴼⵔⴽⵜ” ⵍⴰⵢⵜ ⵜⵓⵔ” ⵏ ⵓⵙⵓⵙⵙⵏ (ⴰⵍⵢⴰⵡⵎ ⵍⵎⵖⵔⵉⴱⵉ)

ⵉⵙⴳⵯⵔⴰ ⵓⵙⵉⵔⴰ ⴰⵏⴰⵎⵓⵔ ⴰⵎⵖⵔⵉⴱⵉ ⵏ ⵜⵎⴰⵍⵍⴰⵢⵜ, ⴳ ⵏⵢⵓⵢⵓⵔⴽ, ⵜⴰⴼⵔⴽⵜ “ⵍⴰⵢⵜ ⵜⵓⵔ”, ⵍⵍⵉ ⵢⵓⵎⴰⵏ ⵉⵎⴳⴳⴰⵢⵏ ⵉⵎⵖⵔⵉⴱⵉⵢⵏ ⴳ ⵢⵉⴳⵔ ⵏ ⵜⵎⴰⵍⵍⴰⵢⵜ ⵔⵣⴼⵏ ⵙ ⴽⵕⴰⴹ ⵓⴳⴰⴷⴰⵣⵏ ⵉⵙⵜⵔⴰⵜⵉⵊⵉⵢⵏ ⵏ ⵍⵎⵖⵔⵉⴱ ⵉⴳⴰⵏ ⵜⴰⵏⵉⵍⴰ ⵏ ⵜⵎⴰⵍⵍⴰⵢⵜ, ⴳ ⵜⵍⵍⴰ ⴼⵔⴰⵏⵙⴰ ⴳ ⵜⴳⵍⴷⵉⵜ ⵉⵎⵓⵏⵏ ⴷ ⵉⵡⵓⵏⴰⵎ ⵎⵓⵏⵏⵉⵏ. ⴷⴼⴼⵉⵔ ⵏ ⴱⴰⵔⵉⵣ ⴷ ⵍⵓⵏⴷⵓⵏ, ⵉⴱⴷⴷⴰ ⵓⴽⴰⴱⴰⵔ “ⵍⴰⵢⵜ ⵜⵓⵔ” ⴳ ⵜⵎⴷⵉⵏⵜ ⵏ ⵏⵢⵓⵢⵓⵔⴽ ⵜⴰⵎⵇⵔⴰⵏⵜ, ⵓⵍ ⴰⴷⵎⵙⴰⵏ ⴰⵥⵕⴼⴰⵏ ⴰⴷⵍⵙⴰⵏ ⵉⴽⴽⴰⵜⵏ ⵏ ⵉⵡⵓⵏⴰⴽ ⵎⵓⵏⵏⵉⵏ, ⴰⵢⴰ ⴳ ⵓⵙⴰⵜⵉ ⵏ ⵜⵙⵓⵜⵍⵜ ⵍⵍⵉ ⵉⵡⴰⵜⵙⵏ ⴰⴹⴼⴰⵕ ⴰⵏⵙⴱⴰⴱ ⵏ ⵓⵎⵣⵉⵣⵡⵔ ⴰⵎⵙⵙⴰⵡⴰⴹ ⴰⵎⴰⵢⵏⵓ “ ⵏ ⵍⵎⵖⵔⵉⴱ, ⴰⴽⴰⵍ ⵏ ⵉⵙⴰⴷⴷⵏ”. ⴳ ⵜⴰⵎⴰ ⵏ “ⵙⴰⵏⵟⵕⴰⵍ ⴱⴰⵔⴽ” ⴳ ⵎⴰⵏⵀⴰⵜⵏ, ⵓⴼⴰⵏ ⵉⵎⵙⵙⵓⴷⵙⵏ ⵏ ⵜⵏⵢⵓⴷⴷⵓⵜⵉⵏ ⴷ ⵉⵎⵥⵍⴰⵢⵏ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵉⵎⴰⵔⵉⴽⴰⵏⵏ, ⴳ ⵓⴼⵉⵍⵎ ⴰⵏⵎⵔⵙⴰⵍ, ⴰⴷ ⵙⵙⵉⵜⵜⴳⵏ ⵜⴰⴷⵍⵙⴰ ⴷ ⵜⵖⵔⵎⴰ ⴱⵖⵓⵔⵏⵉⵏ ⵖⵓⴱⴰⵏⵉⵏ ⵏ ⵍⵎⵖⵔⵉⴱ ⵍⵍⵉ ⵉⵜⵜⵢⴰⵙⵙⵏ ⵙ ⵜⵣⵖⵕⵜ ⵏⵏⵙ ⴷ ⵓⵏⵏⵓⵕⵣⵎ ⵏⵏⵙ ⵖⴼ ⵜⴻⵜⵔⴰⵔⵜ ⴷ ⵜⵎⵢⴰⵏⴰⵡⵜ.

ⵜⵓⵏⵖⵉⵍⵜ ⵜⴰⵎⵓⴼⴰⵢⵜ ⵏ ⵓⵖⴰⵡⴰⵙ “ⵜⵉⵙⵉⵔ” (ⵓⵊⵓⵔⴷⵡⵉ ⵍⵓ ⵎⴰⵔⵓⴽ)

ⵜⴳⵔ ⵜⵏⴱⴰⴹⵜ ⵜⵉⵙⵓⵔⵉⴼⵉⵏ ⵜⵉⵅⴰⵜⴰⵔⵉⵏ ⴳ ⵓⵙⵎⴽⵍ ⵏ ⵡⵓⴷⵎⴰⵡⵏ ⵏ ⵓⵎⵓⴽⵔⵉⵙ ⵉⵍⵍⴰⵏ ⴳ ⵓⵖⴰⵡⴰⵙ “ⵜⵉⵙⵉⵔ”, ⵉⴳⴰⵏ ⴰⵖⴰⵡⴰⵙ ⵢⴰⴽⴽⴰⵏ ⵜⴰⵏⴰⵍⵉⵜ ⵜⴰⵥⵕⴼⴰⵏⵜ ⵉ ⵜⴰⵡⵊⵉⵡⵉⵏ ⵜⵉⵎⵥⵍⴰⴹ ⵃⵎⴰ ⴰⴷ ⵓⵔ ⵢⵉⵍⵉ ⵡⵓⴼⵓⵖ ⵙⴳ ⵜⵉⵏⵎⵍ. ⵔⴰⴷ ⵉⵜⵜⵓⵙⵖⵓⴷⵓ ⵓⵏⴳⵔⴰⵡ ⵏ ⵓⵙⵡⴰⵜⵜⵙ ⴰ ⴳ ⵜⵙⵖⵣⵏⵜ ⵏ ⵓⵙⴷⴷⵉ ⴰⵎⴰⵢⵏⵓ ⵍⵍⵉ ⵉⵙⵙⵎⵜⵔ ⵓⵣⵎⵎⴻⵎ ⴰⵏⴰⵎⵓⵏ ⴰⵎⵢⵉⵡⵏ. ⵉⵎⴽⵉⵏⵏⴰ ⵉⵍⵍⴰⵏ ⴳ ⵜⴼⵍⵡⵉⵜ ⵜⴰⵣⵎⵣⴰⵏⵜ ⵉⵜⵜⵓⵖⵜⵙⵏ, ⵉⵖⵉⵢ ⴰⴷ ⵉⵏⵏⵓⵕⵣⵎ ⵓⵙⵖⵏⵓ ⴰ ⴰⵎⵣⵡⴰⵔ ⵏ ⵓⵣⵎⵎⴻⵎ ⴰⵏⴰⵎⵓⵏ ⴰⵎⵢⵉⵡⵏ ⴳ ⵕⵕⴱⴰⵟ ⴷ ⵍⵇⵏⵉⵟⵕⴰ ⴳ ⵎⴰⵢⵢⵓ 2022. ⵜⵙⵖⴰⵡⵙ ⵜⵎⴰⵡⴰⵙⵜ ⵏ ⵜⴳⵯⵏⵙⴰⵏⵜ ⴳ ⵉⴷⵉⵔ ⵏ 2023 ⴰⵎⴰⵡⴰ ⵏ ⵡⴰⵜⵜⴰⵢ ⵏ 2000 ⵏ ⵡⴰⵎⵎⴰⵙ ⵉⴱⴹⴰⵏ ⵖⴼ ⵎⴰⵕⵕⴰ ⵜⵉⵙⴳⴳⵯⵉⵏ ⵏ ⵡⴰⴽⴰⵍ ⴰⵏⴰⵎⵓⵔ ⵙ ⵜⵔⵏⵉ ⵏ 200 ⵏ ⵜⴰⵢⴰⵏⵜ ⵉ ⵓⵙⵡⵀⵏ ⵏ ⵓⵙⴷⴷⵉ ⵏ ⵓⵣⵎⵎⴻⵎ ⴳ ⵡⴰⵍⵓⴳ ⴰⵏⴰⵎⵓⵏ ⴰⵎⵢⵉⵡⵏ. ⴳ ⵜⵙⴳⴰ ⵏⵏⵙ ⵜⵙⵎⵓⵜⵜⴳ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴰⵏⵎⵎⴰⵍ ⴰⵎⴰⵢⵏⵓ ⵏ ⵜⵖⴰⵔⴰⵙⵉⵏ ⵏ ⵓⵖⴰⵡⴰⵙ “ⵜⵉⵙⵉⵔ”. 

ⵉⵏⵟⵉⵍⴰⵇⴰ : ⴰⵙⵍⵍⵡⵓ ⵏ ⵡⵓⴳⴳⴰⵔ ⵏ 90% ⵏ ⵉⵡⵜⵜⴰⵙⵏ (ⵓⵊⵓⵔⴷⵡⵉ ⵍⵓⵎⴰⵔⵉⴽ)

ⵉⵡⴹⵏ ⵉⵎⵔⵡⴰⵙⵏ ⵉⵜⵜⵓⴼⴽⴰⵏ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵉⵏⵟⵉⵍⴰⵇⴰ ⴰⵔ ⵜⵉⴳⵉⵔⴰ ⵏ ⵉⴱⵔⵉⵔ ⵉⵣⵔⵉⵏ, ⴰⵜⵜⴰⵢ ⵏ 6ⵎⵍⵢⴰ ⴷⵔⵀⵎ. ⴰⵣⵡⵉⵍ ⴰ ⵉⵜⵜⵓⴱⵔⵔⵃ ⴳ ⵓⴳⵔⴰⵡ ⵏ ⵜⵙⵇⵇⵉⵎⵜ ⵏ ⵜⵏⴱⴰⴹⵜ ⵏ ⵜⴼⵏⵉⵇⵜ ⵏ ⵡⴰⵏⵏⴰⵍ ⵏ ⵓⵎⵡⵡⵍ ⵏ ⵜⵎⵣⵡⴰⵔⵜ ⵏ ⵜⵡⵓⵔⵉⵡⵉⵏ, ⴰⵙⵙ ⵏ ⵓⵙⵉⵎⵡⴰⵙ ⴳ ⵕⵕⴱⴰⵟ, ⴷⴷⴰⵡ ⵜⵏⵙⵙⵉⵅⴼⵜ ⵏ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵓⵥⵕⴼ, ⵏⴰⴷⵢⴰ ⴼⵜⵜⴰⵃ ⵍⵄⴰⵍⴰⵡⵉ. ⴳ ⵉⴼⵔⵓⵔⵉⵜⵏ, ⵉⵡⴹⵏ ⵉⵎⵔⵡⴰⵙⵏ ⵉⵜⵜⵓⴼⴽⴰⵏ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⴰ, ⴰⵔ ⵜⵉⴳⵉⵔⴰ ⵏ ⵉⴱⵔⵉⵔ ⵉⵣⵔⵉⵏ, ⴰⵜⵜⴰⵢ ⵏ 6 ⵎⵍⵜⵜⴰⵕ ⴷⵔⵀⵎ, ⴷⴼⴼⵉⵔ ⴰⵖⵣⵓⵔⴰⵏ ⵉⵍⴽⵎⵏ 44.695 ⵏ ⵓⵎⵔⵡⴰⵙ ⵉ ⵓⵚⴰⵃⴰ ⵏ 28.665 ⵏ ⵜⵎⵙⵙⵓⵔⵜ, ⴰⵢⵍⵍⵉ ⵉⵜⵜⴳⵏⵙⴰⵙⵏ 94% ⵏ ⵓⵡⵜⵜⴰⵙ ⵉⵜⵜⵓⵡⵜⵜⴰⵏ (13.5.. ⵉ ⵓⵙⴳⴳⵯⴰⵙ). ⵉⵎⴽⵉⵏⵏⴰ ⵉⵜⵜⵓⴳⴰⵏⵏⴰ ⴰⴷ ⴷ ⴼⴼⵖⵏⵜ ⵙⴳ ⵓⵎⵡⵡⵍ ⵉⵜⵜⵓⴼⴽⴰⵏ ⵉ ⵓⵙⴰⵜⵉ ⴰ ⵏ ⵓⵖⴰⵡⴰⵙ ⵉⵙⵙⴰⵔⵓⵜⵏ ⵙ ⵡⴰⵜⵉⴳ ⴰⵖⵣⵓⵔⴰⵏ ⵏ 13.7ⵎⵍⵢⴰⵕ ⴷⵔⵀⵎ, ⵏⵏⵉⴳ ⵡⵓⵎⵓ ⴳ ⵜⵉⴳⴳⵉ ⵏ 97.000 ⵏ ⵓⵣⵎⵣⵣⵓ ⵏ ⵜⵡⵓⵔⵉ ⵓⵙⵔⵉⴷ, ⵉⴳⴰⵏ 159 % ⵏ ⵓⵡⵜⵜⴰⵙ (27.000 ⵉ ⵓⵙⴳⴳⵯⴰⵙ).

ⵉⵏⴽⵔⴰⴼ ⴳ ⵜⵎⵏⵜⵉⵍⵉⵏ ⵏ ⵓⴱⵔⵙⵉⵡⴷ (ⵍⵄⴰⵍⴰⵎ)

ⵉⴱⵔⵔⵃ ⵓⵎⴰⵙⴰⵢ ⴰⵎⵖⵔⵉⴱⵉ, ⵉⵙ ⵍⵍⴰⵏ 842 ⵏ ⵓⵏⴽⵔⴰⴼ ⴳ ⵜⴳⵍⴷⵉⵜ, ⵙ ⵜⵎⵏⵜⵉⵍⵜ ⵏ ⵜⵖⴰⵡⵙⵉⵡⵉⵏ ⵏ ⵓⴱⵔⵙⵉⵡⴷ ⴳⵔⴰⵙⵏ ⵙⵏⴰⵜ ⵜⵎⵖⴰⵔⵉⵏ ⴷ 14 ⵏ ⵉⵎⵣⵣⵉ. ⵉⴷⴷⴰ ⴷ ⵓⵢⴰⵏ ⴳ ⵜ ⵜⴳⵓⵔⵉ ⵏ ⵎⵓⵍⴰⵢ ⴷⵔⵉⵙ ⴰⴳⵍⵎⴰⵎ, ⴰⵏⵎⵀⴰⵍ ⵏ ⵜⵎⵀⵍⴰ ⵏ ⵢⵉⴳⴳⵉ ⴰⵏⴰⵎⵓⵏ ⴰⴷⵍⵙⴰⵏ ⵉ ⵉⵏⴽⵔⴰⴼ ⴷ ⵡⴰⵍⴰⵙ ⵏ ⵓⵙⵉⴷⴼ ⵏⵏⵙⵏ ⴳ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ, ⴳ ⵜⵖⵔⵎⵜ ⵏ ⵙⵍⴰ, ⵉⴱⴷⵔ ⵓⵎⴰⵙⴰⵢ ⴰⵎⵖⵔⵉⴱⵉ ⵉⵙ “ⵉⴳⴰ ⵓⵙⵡⵉⵔ ⵏ 19% ⵏ ⵉⵏⴽⵔⴰⴼ ⴰ ⴰⵙⴷⴰⵡⴰⵏ, ⴷ 21% ⵖⵓⵔⵙⵏ ⴰⵙⵙⵍⵎⴷ ⴰⵏⴰⵎⵎⴰⵙ ⴰⵙⵉⵏⴰⵏ ⴰⵎⴰⵜⴰⵢ, ⴷ 59% ⵖⵓⵔⵙ ⴰⵙⵡⵉⵔ ⵏ ⵓⵙⵙⵍⵎⴷ ⵢⴰⵎⵓⵏ ⴽⵉⴳⴰⵏ.”

“ⵜⴰⵣⵔⵣⴰⵢⵜ ⵏ ⵉⴱⵓⵖⴰⵙ” ⵜⴷⵃⵃⵉ ⴽⵎⵖⵔⵉⴱ ⵙ ⴰⵙⵔⵓⵙ ⵏ ⵜⵖⴰⵔⴰⵙⵜ ⵜⴰⵎⵣⵉⵣⵡⴰⵔⵜ ⵜⴰⵖⵣⵓⵔⴰⵏⵜ ⵏ ⵜⵉⴹⴰⴼ ⴷ ⵓⵖⴰⵡⵍ (ⵍⵄⴰⵍⴰⵎ)

ⵙⵙⵏⵜⴰⵏⵜ ⵜⵏⴱⴰⴹⵉⵏ ⴷ ⵜⵏⵓⴼⴰ ⵜⵉⵎⵖⵔⵉⴱⵉⵢⵉⵏ ⴳ ⵓⵙⵙⵉⵟⵟⵏ ⵏ ⵉⴱⵓⵖⴰⵙ ⴳ ⵓⵙⵔⵓⵙ ⵏⵏⵙⵏ ⴷⴷⴰ ⵜⵉⴹⴰⴼ ⵜⵉⵔⵡⵡⴰⵎⵉⵏ, ⵉⵎⵉⵍ ⵜⵎⴰⵡⴰⵙⵜ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⵉⵎⴰⵙⴰⵢⵏ ⴷ ⵉⵙⴰⵜⵉⵜⵏ ⵏ ⵡⴰⵎⵎⴰⵙ ⴰⵏⴰⵎⴰⵓⵔ ⵏ ⵜⵎⵀⴰⵍ ⵏ ⵓⵖⴰⵡⵍ ⴹⴼⴰⵕⵏ ⴰⴷⴷⴰⴷ ⴰⴷⵓⵙⴰⵏ ⵏ ⵉⵎⵓⴷⴰⵔ ⴰ, ⴷ ⵓⴹⴼⴰⵕ ⵏ ⵜⵏⵎⵎⴰⵍⵉⵏ ⵎⵢⴰⵏⴰⵡⵏⵉⵏ ⵏ ⵓⴱⴰⵢⵢⵓⵕ, ⴷ ⵉⵙⵖⵍⴰⴼ ⵏ ⵜⵎⴰⴷⴷⴰⵙⵜ ⵜⴰⵎⴰⴹⵍⴰⵏⵜ ⵏ ⵜⴷⵓⵙⵉ ⵉⵥⵍⵉⵏ ⵙ ⵜⵎⵔⵏⵉⵡⵉⵏ ⵏ ⵓⴱⴰⵢⵢⵓⵕ “ ⵜⴰⵣⵔⵣⵔⵜ ⵏ ⵉⴱⵓⵖⴰⵙ”. ⴳ ⵓⵙⴰⵜⵉ ⵏ ⵜⵖⴰⵔⴰⵙⵔ ⵜⴰⵎⵣⵉⵣⵡⴰⵔⵜ, ⵉⵙⴷⵓⵙ ⵍⵎⵖⵔⵉⴱ ⵜⵉⵎⴳⴳⵉⵢⵉⵏ ⵏ ⵜⵉⴹⴰⴼ ⵜⴰⴷⵓⵙⴰⵏⵜ ⵜⵉⵎⵣⵉⵣⵡⴰⵔ, ⴳ ⵜⵏⵇⵇⴰⴹ ⵎⵢⴰⵏⴰⵡⵏⵉⵏ ⵏ ⵉⵡⵜⵜⴰ ⵏⵏⵙ ⵏ ⵡⴰⴽⴰⵍ ⵓⵍⴰ ⵡⵉⵏ ⵢⵉⵍⴻⵍ ⴷ ⵢⵉⴳⵏⵏⴰ, ⴷ ⴰⵙⵓⵊⴷ ⵉ ⴽⵔⴰⵢⴳⴰⵜ ⴰⵖⴰⵡⵍ. ⴳ ⵓⵙⴰⵜⴰⵍ ⴰ, ⵢⴰⵏⵏⴰⵢ ⵟⵟⵢⵢⴱ ⵃⵎⴹⵉ, ⴰⵎⵙⴳⵏⴰⴼ ⴰⵎⵔⵣⵓ ⴳ ⵜⵙⵔⵜⵉⵜⵉⵏ ⴷ ⵉⵏⴳⵔⴰⵡⵏ ⵉⴷⵓⵙⴰⵏⵏ, ⵉⵙ ⴷ ⵡⴰⵅⵅⴰ ⵜⵜⵢⴰⴼⴰⵏⵜ ⵜⵎⴰⵛⴽⵓⵜⵉⵏ ⵏ “ ⵜⵣⵔⵣⴰⵢⵜ ⵏ ⵉⴱⵓⵖⴰⵙ” ⴳ ⴽⵔⴰ ⵏ ⵉⵡⵓⵏⴰⴽ ⵏⵓⵕⵓⴱⴱⴰ ⵏⵖ ⵎⴰⵔⵉⴽⴰⵏ ⵏ ⵉⵥⵥⵍⵎⴹ ⵎⵓⵏⵏⵜ ⴷ ⵉⵙⵎⵉⴳⵉⵍⵏ ⵉⴷⵓⵙⴰⵏⵏ, ⵓⵔ ⵉⵍⵍⵉ ⵎⴰ ⵉⵀⵡⵡⵍⵏ ⵍⵎⵖⵔⵉⴱ.

ⵉⵜⵉⵍⴰⵇⴰ : ⵜⴰⵙⵎⵓⵏⵉ ⵏ ⵜⵙⵇⵇⵉⵎⵜ ⵏ ⵜⵏⴰⵔⴰ ⵏ ⵜⴼⵏⵉⵇⵜ ⵏ ⵡⴰⵏⵏⴰⵍ ⵏ ⵓⵎⵡⵡⵍ ⵏ ⵓⵎⵣⵉⵣⵡⴰⵔ ⵏ ⵜⵡⵓⵔⵉⵡⵉⵏ (ⵍⵢⴰⵡⵎ ⵍⵎⴰⵖⵔⵉⴱⵉ)

ⵜⵙⵙⴽⵔ ⵜⵙⵇⵇⵉⵎⵜ ⵏ ⵜⵏⴰⵔⴰ ⵏ ⵜⴼⵏⵉⵇⵜ ⵏ ⵡⴰⵏⵏⴰⵍ ⵏ ⵓⵎⵡⵡⵍ ⵏ ⵜⵎⵣⵉⵣⵡⴰⵔⵜ ⵏ ⵜⵡⵓⵔⵉⵡⵉⵏ, ⵍⵍⵉ ⵉⴳⴰⵏ ⵉⵎⵉⵙⵙ ⵏ ⵓⵖⴰⵡⴰⵙ ⴰⵙⵉⴷⴼⴰⵏ ⵏ ⵡⴰⵏⵏⴰⵍ ⵏ ⵓⵎⵡⵡⵍ ⵏ ⵜⵎⵙⵙⵏⵜⴰⵢ, ⵜⴰⵙⵎⵓⵏⵉ ⴰⵙⵉⵎⵡⴰⵙ ⴳ ⵕⵕⴱⴰⵟ, ⴷⴷⴰⵡ ⵜⵏⵙⵙⵉⵅⴼⵜ ⵏ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵓⵥⵕⴼ, ⵏⴰⴷⵢⴰ ⴼⵜⵜⴰⵃ ⵍⵄⴰⵍⴰⵡⵉ, ⵜⴱⴷⵔ ⴼⵜⵜⴰⵃ ⵍⵄⴰⵍⴰⵡⵉ, ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ, ⵉⵙ ⵉⵏⵜⴰ ⵓⵖⴰⵡⴰⵙ “ⵉⵏⵟⵉⵍⴰⵇⴰ” ⴷⴼⴼⵉⵔ ⵜⵉⵏⴰⵡⵜ ⵜⴰⵎⴰⵜⵜⴰⵢⵜ ⵏ ⵓⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⵙ ⵓⵣⵎⵣⵣⵓ ⵏ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⵓⵣⵔⵉⴼ ⵡⵉⵙⵙ ⴽⴽⵓⵥ ⵏ ⵍⵡⵉⵍⴰⵢⴰ ⵜⵓⵣⵣⵔⴰⴼⵜ ⵜⵉⵙⵙ ⴽⴽⵓⵥⵜ ⵏ ⵍⵡⵉⵎⴰⵢⴰ ⵜⵣⵣⵔⴰⴼⵜ ⵜⵉⵙⵙ ⵎⵔⴰⵡⵜ. ⵉⴽⴽⴰ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵉⵙⴷⴷⵉⴷ ⵉⴳⵔ ⵏ ⴰⴱⴰⵏⴽⴰⵏ ⴷ ⵓⵥⵕⴼⴰⵏ ⵖⴼ ⵡⴰⵏⵏⴰⵍ ⵏ ⵜⵎⵙⵙⵏⵜⴰⵢ ⵜⵉⵄⵔⵔⵉⵎⵉⵏ ⴷ ⵉⵎⴰⵙⴰⵢⵏ ⵏ ⵉⵙⵖⵏⵓⵜⵏ ⵙ ⵓⵙⵔⵓⵙ ⵏ ⵜⵡⵓⵔⵉ ⵖⴼ ⵓⵖⴰⵡⴰⵙ ⵉⵥⵍⵉⵏ ⵉⵎⵙⴰⵙⴰⵏ ⴰⴽⴷ ⵉⵎⴰⵙⴰⵢⵏ ⵏ ⵉⵙⵖⵏⵓⵜⵏ ⴳ ⵉⵄⵔⵔⵉⵎⵏ.

ⵜⵉⵎⵔⵙⵍⵜ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵏ ⵓⴼⵔⴰⴳ ⵏ ⵜⵡⵏⵏⴰⴹⵜ ⴷ ⵜⵎⵙⵇⴰⴷⵜ ⵏ ⴱⵕⵟⵇⵇⵉⵣ ⴳ ⵍⵎⵖⵔⵉⴱ ⵙⵏⵎⴰⵍⴰⵏⵜ ⵜⵉⵏⴰⵡⵜ ⵖⴼ ⵓⴼⵔⴰⴳ ⵉ ⵉⴳⴰⵔⴰⵡⵏ (ⵙⵙⵃⵔⴰ ⵜⴰⵎⵖⵔⵉⴱⵉⵜ)

ⵜⵙⵏⵎⴰⵍⴰ ⵜⵎⵔⵙⵍⵜ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵉ ⵓⴼⵔⴰⴳ ⵏ ⵜⵡⵏⵏⴰⴹⵜ, ⵍⵍⵉ ⵜⵙⵏⵉⵅⵉⴼ ⵍⴰⵍ ⵏ ⵡⵓⴷⴷⵓⵔ ⴰⴳⵍⴷⴰⵏ ⵜⴰⴳⵍⴷⵓⵏⵜ ⵍⴰⵍⵍⴰ ⵃⵙⵏⴰⴻ, ⴰⵙⵙ ⵏ ⵓⵢⵏⴰⵙ ⴳ ⵕⵕⴱⴰⵟ, ⵙ ⵜⵎⴷⵔⴰⵡⵜ ⴰⴽⴷ ⵜⵎⵙⵇⴰⴷⵜ ⵏ ⴱⵕⵟⵇⵇⵉⵣ ⴳ ⵍⵎⵖⵔⵉⴱ, ⵜⵉⵏⴰⵡⵜ ⵏ ⵜⵎⵜⵜⵉⵏ ⵉⵎⵓⵏⵏ 2022 ⵖⴼ ⵉⴳⴰⵔⴰⵡⵏ : ⵎⴰⵜⵜⴰ ⵜⵎⵍⴰⵍⵜ ⵏ ⵜⵎⴰⵙⵙⴰⵏⵉⵏ ⴷ ⵓⵙⵏⵓⵍⴼⵓ ⴳ ⵍⵎⵖⵔⵉⴱ ⴷ ⵉⴼⵔⵉⵇⵢⴰ?”. ⵜⴽⵛⵎ ⵜⵉⵏⴰⵡⵜ ⴰ, ⵍⵍⵉ ⵉⵜⵜⵓⴳⴰⵏ ⴳ ⵡⴰⵎⵎⴰⵙ ⵃⴰⵙⴰⵏ ⵡⵉⵙⵙ ⵙⵉⵏ ⴰⴳⵔⴰⵖⵍⴰⵏ ⵏ ⵓⵙⵎⵓⵜⵜⴳ ⴳ ⵢⵉⴳⵔ ⵏ ⵜⵡⵏⵏⴰⴹⵜ, ⵉⵖⵉⵍ ⴰⴽⴰⴷⵉⵎⵉ ⵏ ⵜⵎⵔⵙⵍⵜ, ⴳ ⵓⵙⴰⵜⵉ ⵏ ⵜⵉⵍⴰⵍ ⵉⵣⴷⵉⵏ ⴷ ⵜⵙⵏⵜⴰⵢⵉⵏ ⵍⵍⵉ ⵜⴻⵜⵜⴰⵙⵉ ⵜⵎⵔⵙⵍⵜ ⴷ ⵉⵎⴷⵔⴰⵡⵏ ⵏⵏⵙ ⵙⴳ 20 ⵏ ⵓⵙⴳⴳⵯⴰⵙ. ⵉⵙⴼⴰⵡ ⵓⵙⵉⵡⴹ ⵍⵍⵉ ⴷ ⵙⵙⵓⴼⵖⵏ ⵉⵎⵙⵏⵎⴰⵍⴰⵏ ⵏ ⵓⵎⵓⵙⵙⵓ ⴰ ⵜⴰⴳⵔⴰⵖⵍⴰⵏⵜ, ⵍⵍⵉ ⵉⵔⴰⵏ ⴰⴷ ⵢⵉⵍⵉ ⵜⴰⵎⴷⴷⵉⵜ ⵏ ⵓⴳⵔⴰⵡ ⵏ ⵜⵎⵜⵜⵉⵏ ⵉⵎⵓⵏⵏ ⵖⴼ ⵉⴳⴰⵔⴰⵡⵏ, ⵍⵍⵉ ⵉⴷⴷⴰⵏ ⴰⴷ ⵢⵉⵍⵉ ⴷ ⵓⵣⵎⵣ ⵉⵍⵍⴰⵏ ⵙⴳ 27 ⵢⵓⵏⵢⵓ ⴰⵔ 1 ⵢⵓⵍⵢⵓⵣ ⴷ ⵉⴷⴷⴰⵏ ⴳ ⵍⵛⴱⵓⵏⴰ, ⵔⴰⴷ ⵜⵙⵏⵓⴱⴱⴳ ⵉⴳⵎⴰⵎⵏ ⵉⵙⵏⵏⴳⵣⴰⵎⵏ ⵙ ⵉⴳⴰⵔⴰⵡⵏ ⴳ ⵉⵎⵖⵔⵉⴱⵉⵏ ⴷ ⵉⴼⵔⵉⵇⵉⵢⵏ.

ⵎⵥⵡⴰⵕ: ⵍⵎⵖⵔⵉⴱ ⵢⴰⵜ ⵙⴳ ⵜⵎⵉⵣⴰⵔ ⴰⴽⴽⵯ ⵢⵓⴳⵔⵏ ⴳ ⵓⵎⵣⵉⵣⵡⵔ ⴳ ⵓⵎⴰⴹⴰⵍ ⴳ ⵓⵙⵡⵉⵔ ⴰⵎⴳⵓⵔⴰⵏ (ⵍⴰⵃⴷⴰⵜ ⵍⵎⵖⵔⵉⴱⵉⵢⴰ)

ⵉⵙⵙⵏⵜⵎ ⵓⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵢⵙⴱⴱⴰⴱⵜ ⵕⵢⵢⴰⴹ ⵎⵥⵡⴰⵕ, ⴰⵙⴷⵖⵔ ⵏ ⵍⵎⵖⵔⵉⴱ, ⴳ ⵓⵙⵡⵉⵔ ⴰⵎⴳⵓⵔⴰⵏ, ⵉⵙ ⵉⴳⴰ ⵢⴰⵜ ⴳ ⵜⵎⵉⵣⴰⵔ ⴰⴽⴽⵯ ⵢⵓⴳⵔⵏ ⴳ ⵓⵎⵣⵉⵣⵡⵔ ⴳ ⵓⵎⴰⴹⴰⵍ. ⴳ ⵜⴽⵛⵛⵓⵎⵜ ⵏⵏⵙ ⴳ ⵜⵉⵏⴰⵡⵜⵏⵏⴰ ⵜⵙⵏⵎⴰⵍⴰ “ⵜⵎⵙⵎⵓⵏⵜ ⵏ ⵓⵙⴱⵖⵍⵓ ⵏ ⵉⵎⵙⵡⵓⴷⴷⵓⵜⵏ”, ⴳ ⵜⴰⴷⴷⴰⵔⵜ ⵜⵓⵎⵍⵉⵍⵜ, ⵖⴼ ⵉⵙⵏⵉⵍⴰⵜⵏ ⵉⵎⴰⵢⵏⵓⵜⵏ ⵏ ⵜⵙⵔⵜⵉⵜ ⵜⴰⵎⴳⵓⵔⴰⵏⵜ ⴳ ⵍⵎⵖⵔⵉⴱ, ⵉⵙⵙⵎⵜⵔ ⵎⵣⵡⴰⵔ ⵜⵍⴰ ⵜⴳⵍⴷⵉⵜ “ⵜⴰⵙⵜⵔⴰⵜⵉⵊⵉⵜ ⵜⴰⵎⴳⵓⵔⴰⵏⵜ ⵉⴼⴰⵡⵏ ⵜⵉⵡⵜⵜⴰ ⵙ ⵜⵖⴰⵔⴰⵙⵜ ⵉⵖⵓⴷⴰⵏ”. ⵉⵏⵏⴰ ⵉⵙ ⵜⴳⵓⵎ ⵜⵙⵜⵔⴰⵜⵉⵊⵉⵜ ⵜⴰⵎⴳⵓⵔⴰⵏⵜ ⵏ ⵍⵎⵖⵔⵉⴱ ⵖⴼ ⵓⵏⴱⴰⴹ ⴰⵎⴳⵓⵔⴰⵏ ⴷ ⵓⵙⴷⵖⵔ ⵏ ⵍⵎⵖⵔⵉⴱ ⵉⴳⴰⵏ ⴰⴳⵊⴷⵉ ⴰⵙⴳⴰⵡⴰⵏ, ⴰⵔ ⵜⵙⵏⴰⵎⵎⴰⵙ ⴰⵡⴷ ⵖⴼ ⵉⵙⵓⴳⴰⵏ ⵉⵏⴼⴳⴰⵏⵏ ⵉⵏⴰⵎⵓⵔ ⴳ ⵓⵍⵎⴰⵡⴰⵢ ⵎⴰⵕⵕⴰ ⵉⵏⴰⵥⴰⵕⵏ ⴷ ⵓⵍⴷⴰⵢ ⵏ ⵉⵎⵙⵙⴰⵔⵓⵏ ⵙⴳ ⵎⴰⵕⵕⴰ ⵜⵉⵙⴳⴳⵯⵉⵏ ⵏ ⵓⵎⴰⴹⴰⵍ.

ⵍⵎⵖⵔⵉⴱ ⵉⴼⵔⵏ ⴰⴱⵔⵉⴷ ⴰⵏⴰⴼⴰⵡ ⵉ ⵓⵎⵢⴰⵡⴰⵙ ⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ (ⵍⴰⵃⴷⴰⵜ ⵍⵎⵖⵔⵉⴱⵉⵢⴰ)

ⵜⵙⵙⵏⵜⵎ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵜⵏ ⵏ ⵜⵎⵏⴰⴹⵉⵏ ⵏ ⵍⵎⵖⵔⵉⴱ, ⵎⴱⴰⵔⴽⴰ ⴱⵓⵄⵉⴷⴰ, ⵉⵙ ⵉⵙⵜⵉ ⵍⵎⵖⵔⵉⴱ ⴰⴱⵔⵉⴷ ⴰⵏⴰⴼⴰⵡ ⵏ ⵓⵎⵢⴰⵡⴰⵙ ⴳⵔ ⵜⵎⵉⵣⴰⵔ ⵏ ⵉⴼⵔⵉⵇⵢⴰ, ⴰⴱⵔⵉⴷ ⵉⵙⴷⵓⵙⵏ  ⵜⴰⴳⵯⵎⴰⵏⵉⵜ ⵏⵏⵙ ⵙ ⵉⴼⵔⵉⵇⵢⴰ. ⵜⵏⵏⴰ ⴱⵓⵄⵉⴷⴰ ⴳ ⵜⴰⵎⴰ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⵜⵥⴰⵜ ⵏ ⵓⴳⵔⴰⵡ “ⴰⴼⵔⵉⵙⵜⵉ” ⵍⵍⵉ ⵉⵎⴷⴰⵏ ⴰⵙⵍⵉⴷ ⵏ ⵓⵚⵉⴹⵢⴰⵙ ⴳ ⴽⵉⵙⵉⵎⵓ, “ⵏⴽⵯⵏⵉ ⴷⴰ ⵏⵇⵇⴰⵔ ⵙ ⵓⵎⵢⴰⵡⴰⵙ ⴰ ⵍⵍⵉ ⴰ ⵢⵉⵡⵙⵏ ⴰⴷ ⵏⵙⴷⵓⵙ ⵜⴰⴳⵯⵎⴰⵏⵉⵜ ⵏⵏⵖ ⵙ ⵉⴼⵔⵉⵇⵢⴰ”. ⵜⵙⴱⴰⵢⵏ ⵉⵙ “ ⵓⵔ ⴷⴰ ⵉⵜⵜⵖⵉⵎⴰ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴳ ⵢⵉⵏⴰⵡⵏ ⵏⵏⵙ, ⵓⵔ ⵉⵙⵙⵏⵜⵉⵎ ⴰⵎⵢⴰⵡⴰⵙ ⵉⵥⵥⵍⵎⴹ-ⵉⵥⵥⵍⵎⴹ, ⴷ ⵜⵉⵅⵅⵉⵜⵔⵜ ⵍⵍⵉ ⵏⴰⴽⴽⴰ ⵉ ⵡⴰⵡⵎⴰⵜⵏⵖ ⵉⴼⵔⵉⵇⵉⵢⵏ, ⵜⵔⵏⵓ ⵉⵙ ⴱⴷⴷⴰ ⵜⵍⵍⴰ ⵜⴳⵍⴷⵉⵜ ⵜⴳ ⴰⵎⵣⵉⵣⵡⴰⵔ ⴳ ⵉⵙⵡⵉⵔⵏ ⵉⵎⵥⴰⵡⵏ ⴳ ⵡⴰⵀⵍⵉ ⵏ ⵜⵙⴳⴳⵯⵉⵏ.”

ⵜⴰⵎⵙⵇⴰⴷⵜ ⵏ ⵍⵎⵖⵔⵉⴱ ⴳ ⵙⴰⵍⴰⴳⴰⵏ ⵜⵙⵙⴽⴰⵔⴽⵙ ⵓⵛⵓⴹⵏ ⴷ ⵡⵓⵏⵓⴼⵏ ⵏ ⵓⵎⵙⵇⴰⴷ ⴰⴼⴰⵍⴰⵚⵟⵉⵏⵉ ⴳ ⴷⴰⴽⴰⵔ(ⵔⵉⵙⴰⵍⵜ ⵍⵓⵎⵎⴰ)

ⵜⵙⵙⴽⴰⵔⴽⵙ ⵜⵎⵙⵇⴰⴷⵜ ⵏ ⵍⵎⵖⵔⵉⴱ ⴳ ⵙⴰⵍⴰⴳⴰⵏ, ⴰⵙⵉⵎⵡⴰⵙ ⵉⵣⵔⵉⵏ, ⵓⵛⵓⴹⵏ ⴷ ⵡⵓⵏⵓⴼⵏ ⵏ ⵓⵎⵙⵇⴰⴷ ⴰⴼⴰⵍⴰⵚⵟⵉⵏⵉ ⴳ ⴷⴰⴽⴰⵔ, ⴳ ⵡⵓⴼⵓⵖ ⴰⵏⵖⵎⴰⵙ ⵏⵏⵙ ⴳ ⵡⴰⵏⵙⴰ ⴰⵍⵉⴽⵟⵕⵓⵏⵉ ⴰⴷⵖⵔⴰⵏ ⵜⵙⵙⵏⵜⵎ ⵉⵙ ⵓⵔ ⵎⵙⴰⵙⴰⵏ “ ⴷ ⵜⵎⵔⵙⴰ ⵜⵉⵎⴰⴷⴷⵓⴷⵉⵏ ⵏ ⵉⵎⴰⵙⴰⵢⵏ ⵏⵏⵙ ⵓⵙⵔⵉⴷⵏ”. ⴳ ⵜⵏⵎⵎⴰⵍⵜ ⵏ ⵜⵉⴷⵜ, ⵜⵖⵣⵏ ⵜⴳⵏⵙⴰⵙⵜ ⵏ ⵜⴳⵍⴷⵉⵜ ⴳ ⵙⴰⵍⴰⴳⴰⵏ ⵓⴼⵓⵖ ⴰ ⴰⵏⵖⵎⴰⵙ ⵉⵙⵖⵉⵍⵉⴼⵏ ⴰⵔ ⵉⵙⴽⵉⵔⴽⵉⵙ, ⵏⵓⴷⵉⴱⵍⵓⵎⴰⵙⵉ ⴰ ⵉⵣⴷⵖⵏ ⴳ ⴷⴰⴽⴰⵔ. “ⴷⴰ ⵉⵙⵖⵉⵍⵉⴼ ⴰⵛⴽⵓ ⵉⵜⵜⴽⴰⵔ ⵏ ⵡⵓⵛⵓⴹⵏ ⴷ ⵡⵓⵏⵓⴼⵏ, ⵓⵍⴰ ⴰⵡⴷ ⴰⵎⵣⴰⵔⴰⵢ ⴰⴽⴷ ⵜⵎⵔⵙⴰ ⵜⵉⵎⴰⴷⴷⵓⴷⵉⵏ ⵏ ⵉⵎⴰⵙⴰⵢⵏ ⵉⵅⴰⵜⴰⵔⵏ”, ⵜⵙⵙⵏⵜⵎ ⵜⵎⵙⵇⴰⴷⵜ ⵏ ⵍⵎⵖⵔⵉⴱ ⴳ ⵜⵙⵎⵎⴰⵍⵜ ⴰ ⵍⵍⵉ ⴷ ⵡⵉⵏⵜ ⵉⵎⴰⵙⵙⵏ ⵉⵏⵖⵎⴰⵙⵏ ⵏ ⵙⴰⵍⴰⴳⴰⵏ.

ⵍⵎⵖⵔⵉⴱ ⵉⴼⴽⴰ ⴰⵙⴰⵔⵎ ⵏ ⵜⵓⵜⵍⴰⵢⵉⵏ ⴷⴷⵔⵏⵉⵏ ⴷ ⵜⴰⵔⵣⵣⵉⴼⵜ ⵉ ⵜⴽⴰⴷⵉⵎⵉⵜ ⵜⴰⴷⵉⴱⵍⵓⵎⴰⵙⵉⵜ ⵏ ⵎⵓⵕⵉⵟⴰⵏⵢⴰ (ⵍⵉⵜⵜⵉⵃⴰⴷ ⵍⵉⵛⵜⵉⵔⴰⴽⵉ)

ⵉⴼⴽⴰ ⵍⵎⵖⵔⵉⴱ ⵜⴰⵔⵣⵣⵉⴼⵜ ⵉ ⵜⴽⴰⴷⵉⵎⵉⵜ ⵜⴰⴷⵉⴱⵍⵓⵎⴰⵙⵉⵜ ⵏ ⵎⵓⵕⵉⵟⴰⵏⵢⴰ ⵉⴳⴰⵏ ⴰⵙⴰⵔⵎ ⵏ ⵜⵓⵜⵍⴰⵢⵉⵏ ⴷⴷⵔⵏⵉⵏ ⵜⴼⴽⴰ ⵜⵜ ⵜⵎⴰⵡⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ. ⵜⴻⵜⵜⴼⴽⴰ ⵜⵔⵣⵣⵉⴼⵜ ⴰ ⵉ ⵜⴽⴰⴷⵉⵎⵉⵜ ⵜⴰⴷⵉⴱⵍⵓⵎⴰⵙⵉⵜ ⵏ ⵎⵓⵕⵉⵟⴰⵏⵢⴰ, ⴳ ⵜⴼⵓⴳⵍⴰ, ⵜⵙⵏⵎⴰⵍⴰ ⴰⵙⵉⵎⵡⴰⵙ ⴳ ⵏⵡⴰⴽⵛⵓⵟ, ⵜⵀⴰ ⵜ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵎⴰⵡⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴷ ⵉⵎⵓⵕⵉⵟⴰⵏⵉⵢⵏ ⵏ ⴱⵕⵕⴰ, ⵍⵄⴰⵍⵢⴰ ⴱⵏⵜ ⵢⵃⵢⴰ ⵡⵍⴷ ⵎⵏⴽⵓⵙ, ⴷ ⵓⵎⵙⵇⴰⴷ ⵏ ⵜⴳⵍⴷⵉⵜ ⴳ ⵎⵓⵕⵉⵟⴰⵏⵢⴰ ⵃⴰⵎⵉⴷ ⵛⴱⴰⵔ. ⵢⵓⵎⴰ ⵓⵙⴰⵔⵎ ⴽⵉⴳⴰⵏ ⵏ ⵉⵎⵙⵙⵓⴷⵙⵏ ⵉⵥⵍⵉⵏ ⵙ ⵓⵏⴰⴳⵔⴰⵡ ⴰⵙⵏⵙⵍⴽⵉⵎ ⴷ ⵓⵥⵟⵟⴰ ⵏ ⵓⵎⵢⴰⵡⴰⴹ ⴰⴷⵖⵔⴰⵏ ⵍⵍⵉ ⵢⴰⴽⴽⴰⵏ ⵉ ⵉⵏⴹⴼⴰⵕⵏ ⵏ ⵜⵎⵙⵉⵔⵉⵏ ⴰⴷ ⴹⴼⴰⵕⵏ ⵉⵙⵎⴰⵜⵜⴰⴳⵏ.

ⴰⴽⴰⴱⴰⵔ ⵏ ⵍⵉⵛⵜⵉⵔⴰⴽⵉ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵉⴳⵔ ⴰⵖⵓⵔⵉ ⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⵉ ⵜⵙⵎⵓⵏⵉ ⵖⴼ ⵓⵣⵔⴰⵡ ⵏ ⵡⴰⴷⴷⴰⴷ ⵏ ⵡⴰⵙⵙⴰⵢ ⴰⵖⵔⵎⴰⵏ ⴳ ⵜⵎⴷⵉⵏⵉⵏ ⵜⵉⵎⵇⵔⴰⵏⵉⵏ ( ⵍⵉⵜⵜⵉⵃⴰⴷ ⵍⵉⵛⵜⵉⵔⴰⴽⵉ)

ⵉⵙⵙⵓⵜⵔ ⵓⴽⴰⴱⴰⵕ ⵏ ⵍⵉⵛⵜⵉⵔⴰⴽⵉ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵣⵣⴳⵉⵔ ⵏ ⵜⵓⵎⴰⵢⵉⵏ ⵏ ⵓⵙⵍⴳⵏ ⴰⴳⵯⵏⵙⴰⵏ ⵓⵙⵇⵇⵉⵎ, ⴳ ⵜⵎⵢⴰⵣⴰⵏⵜ ⵉⵙⵙⴰⴼⴹ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⴰⵙⵙ ⵏ 20ⵎⴰⵢⵢⵓ 2022, ⵙⴳ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵜⵏ ⴰⴷ ⵜⵎⵎⴳⵔⴰⵡ ⵖⴼ ⵓⵣⵔⴰⵡ ⵏ ⵡⴰⴷⴷⴰⴷ ⵏ ⵡⴰⵙⵙⴰⵢ ⴰⵖⵔⵎⴰⵏ ⴳ ⵜⵎⴷⵉⵏⵉⵏ ⵜⵉⵎⵇⵔⴰⵏⵉⵏ. ⴳ ⵜⴳⴰ ⵢⴰⴹⵏ ⵉⴼⴽⴰ ⵍⵎⵀⴷⵉ ⵍⵄⴰⵍⵡⵉ, ⴰⴳⵎⴰⵎ ⵏ ⵓⴽⴰⴱⴰⵔ ⴰⵛⵜⵉⵔⴰⴽⵉ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵇⵙⵉ ⴰⵎⵉⵔⴰⵢ ⵖⴼ ⵡⵓⴱⵓⵢ ⵉⵜⵜⵡⴰⵍⴰⵙⵏ ⴷ ⵜⴰⴷⵔⵙⵉ ⵏ ⵡⴰⵎⴰⵏ ⵏ ⵜⵉⵙⵙⵉ ⴳ ⵉⵜⵙⵏⵜ ⵜⵎⴷⵉⵏⵉⵏ ⵏ ⵜⵙⴳⴰ ⵏ ⵉⵎⵜⵖⵔⵏ. ⵉⵣⵎⵎⴻⵎ ⵉⵎⴰⵔⵉ ⴰⵛⵜⵉⵔⴰⴽⵉ ⴳ ⵓⵙⵇⵙⵉ ⴰ ⵏⵉⵜ, ⵉⵙ ⴼⵇⵇⵄⵏ ⵉⵎⵣⴷⴰⵖ ⵏ ⵔⵔⵉⵚⴰⵏⵉ, ⴰⵔⴼⵓⴷ, ⵍⵊⵔⴼ ⵜⵉⴳⵉⵔⵉⵡⵉⵏ ⴰ ⵙ ⵡⵓⴱⵓⵢⵏ ⵉⵣⴷⵉⵏ ⴷ ⵜⴰⴷⵔⵙⵉ ⵏ ⵡⴰⵎⴰⵏ ⵏ ⵜⵉⵙⵙⵉ ⴳ ⵓⵣⵎⵣ ⵉⵍⵍⴰⵏ ⴳⵔ 24 ⴰⵔ 72 ⵏ ⵜⵙⵔⴰⴳⵜ ⴱⵍⴰ ⴰⵙⵎⵉⴳⵍ ⵉⵣⵡⴰⵔⵏ, ⴰⵢⴰ ⴽⵓⴷⵏⵏⴰ ⵜⴰⵜⵜⵓⵢ ⵜⵙⴽⵯⴼⵍⵜ ⵏ ⵜⵣⵖⵍⵜ ⴷ ⵡⴰⴷⴰⵙ ⵏ ⵉⵎⵉⵔ ⵉⵡⵉⵍⵏ, ⴰⵢⵍⵍⵉ ⴷ ⵉⵙⴳⵯⵔⴰⵏ ⴰⵖⵉⵍⴼ ⴷ ⵓⵏⴽⴽⵔ ⴰⵅⴰⵜⴰⵔ ⵖⵓⵔ ⵉⵏⵙⵎⵓⵔⵏ ⵏ ⵜⵎⵜⵜⴰ ⴰ ⵜⴰⵎⵉⴷⵉⵔⵜ ⴳ ⵡⴰⵏⵙⴰⵜⵏ ⵏ ⵓⵎⵢⴰⵡⴰⴷ ⴰⵏⴰⵎⵓⵏ.

ⵏⴰⴱⵉⵍ ⴱⵏⵄⴱⴹⵍⵍⴰ ⵉⵙⵎⵉⴳⵉⵍ ⵜⴰⵏⴱⴰⴹⵜ ⵙ ⵓⵣⵓⵛⵛⵍ ⵏ ⵡⴰⵙⴰⵢ ⵏ ⵜⵎⴳⴳⴰ ⵜⵉⴽⵎⴰⵎⵉⵏ ⵉ ⵓⵍⵎⴰⵡⴰⵢ ⵏ ⵡⴰⴷⴷⴰⵏ ⵉⵙⵖⵓⴼⵓⵏ ⴳ ⵜⵎⴰⵣⵉⵔⵜ (ⴱⴰⵢⴰⵏ ⵍⵢⴰⵡⵎ)

ⵉⵙⵏⴰⵅⴼ ⵎⵓⵃⵎⵎⴰⴷ ⵏⴰⴱⵉⵍ ⴱⵏⵄⴱⴷⵍⵍⴰ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵎⵓⵍⵍⵉ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ, ⴰⵙⵉⵎⵡⴰⵙ ⵉⵣⵔⵉⵏ, ⴰⵏⵎⵓⴳⴳⴰⵔ ⵏ ⵓⵎⵢⴰⵡⴰⴹ ⵉⵙⵏⵎⴰⵍⴰ ⵜ ⵡⴰⵢⵢⴰⵡ ⴰⵙⴳⴰⵡⴰⵏ ⵏ ⵓⵎⵓⵍⵍⵉ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ, ⵖⴼ ⵓⵙⵏⴽⴷ ⴷ ⵓⵎⵙⴰⵡⴰⵍ ⵏ ⵜⵏⵜⴰⵎⵜ “ⵜⵉⵏⴽⵛⵓⵎⵉⵏ ⵉ ⵓⵙⵡⵉⵏⴳⵎ ⴷ ⵓⵎⵙⴰⵡⴰⵍ”, ⴰⵢⴰ ⴳ ⵓⵙⵎⵓⵜⵜⴳ ⵏ ⵓⴳⵔⴰⵡ ⴰⵏⴰⵎⵓⵔ ⵡⵉⵙⵙ ⵢⴰⵏ ⴷ ⵎⵔⴰⵡ ⵏ ⵓⵎⵓⵍⵍⵉ ⵍⵍⵉ ⵉⵔⴰⵏ ⴰⴷ ⵓⵉⵍⵉ ⴰⵙⴳⴳⵯⴰⵙ ⴰ. ⵉⵙⴼⴰⵡ ⵏⴰⴱⵉⵍ ⴱⵏⵄⴱⴷⵍⵍⴰ ⵉⵙ ⵉⵥⵍⵉ ⵓⵎⵙⴰⴳⴰⵔ ⴰ ⵙ ⵓⵙⵔⵜⴰⵏ ⴳ ⵓⴹⴼⴰⵕ ⵏ ⵡⴰⴷⴷⴰⴷ ⴰⵎⴰⵜⴰⵢ ⵏ ⵜⵎⴰⵣⵉⵔⵜ ⵉ ⵓⵢⵍⵍⵉ ⵜⵙⴽⴰⵔ ⵜⵏⴱⴰⴹⵜ, ⴷ ⵓⵢⵍⵍⵉ ⵓⵔ ⵜⵙⴽⴰⵔ ⵃⵎⴰ ⴰⴷ ⵜⵍⵎⴰⵡⴰⵢ ⴰⴷⴷⴰⵜ ⵉⵙⵖⵓⴼⵓⵏ ⴳ ⵜⵎⴰⵣⵉⵔⵜ, ⵙ ⵍⴰⵡⴰⵏ ⴰⴽⴽⵯⵎⵏⵉⴷ ⵏ ⵢⵉⵊⴳⵉⵍ ⵏ ⵡⴰⵜⵉⴳⴳⵏ ⴷ ⵡⴰⵜⵉⴳ ⵏ ⵜⵓⴷⵔⵜ ⵍⵍⵉ ⵢⴰⵖⵓⵍ ⵜⵣⵏⵏⴼ ⵉ ⵉⵏⵎⵓⵔⴰⵏ ⴳ ⵎⴰⵕⵕⴰ ⵜⵉⵙⴳⴳⵯⵉⵏ ⵏ ⵜⵎⴰⵣⵉⵔⵜ. ⵉⵙⵎⵉⴳⵍ ⵓⵏⴼⵍⵓⵙ ⴰⵎⴰⵜⴰⵢ ⴳ ⵡⴰⴽⵓⴷ ⴰ ⵏⵉⵜ ⵙ ⵓⵣⵓⵛⵛⵍ ⵏ ⵉⵙⵉⵜⵜⵢ ⵏ ⵜⵎⴳⴳⴰ ⵜⵉⴽⵎⴰⵎⵉⵏ, ⵉⵙⵙⵎⵜⵔ ⵉⵙ ⵉⴹⴼⴰⵕ ⵓⴽⴰⴱⴰⵔ, ⵙⴳ ⵓⵜⵓⵣⵍⵜ, ⵜⵉⵖⴰⵡⵙⵉⵡⵉⵏ ⴰ ⵙ ⵓⵎⵙⴰⵡⴰⵍ ⴰⴳⵯⵏⵙⴰⵏ ⵏⵏⵙ.

ⵜⵉⵏⴰⵡⵜ ⵜⵙⴰⵡⴰⵍ ⵖⴼ ⵜⵎⵍⴰⵍⵜ ⵏ ⵉⵏⵎⵢⴰⵡⵙⵏ ⵉⵏⴰⵎⵓⵏⵏ ⴳ ⵜⵖⴰⵡⵙⵉⵡⵉⵏ ⵏ ⵢⵉⵡⵍ ⵏ ⵜⵓⵎⵥⵢⵉⵏ (ⴱⴰⵢⴰⵏ ⵍⵢⴰⵡⵎ)

ⵜⵙⵙⴳⴷⵍ ⵜⵉⵏⴰⵡⵜ ⵜⵙⵏⵎⴰⵍⴰ ⵜⵎⵙⵎⵓⵏⵜ “ⵉⵣⵔⴼⴰⵏ ⴷ ⵜⵣⵔⴼⵜ” ⵙ ⵓⵣⴷⴰⵢ ⴰⴽⴷ ⵜⵎⵙⵎⵓⵏⵜ ⵍⵃⴰⵙⴰⵏⵉⵢⴰ ⵏ ⵉⵙⵏⴱⴹⴰⵢⵏ ⴷ ⵜⵎⵙⵎⵓⵏⵜ ⵏ ⵉⵎⵙⵖⴰⵏⵏ ⵏ ⵜⵣⵔⴼⵜ, ⴰⵙⵉⵎⵡⴰⵙ ⴳ ⵜⴰⴷⴷⴰⵔⵜ ⵜⵓⵎⵍⵉⵍⵜ, ⵜⴰⵎⵍⴰⵍⵜ ⵏ ⵉⵏⵎⵢⴰⵡⴰⵙ ⵉⵏⴰⵎⵓⵏⵏ ⴳ ⵜⵖⴰⵡⵙⵉⵡⵉⵏ ⵏ ⵡⴰⴳⴳⵯⴰⵍ ⵏ ⵜⵓⵎⵥⵉⵢⵉⵏ, ⴰⵛⴽⵓ ⴳⴰⵏ ⴰⴼⵔⴷⵉⵙ ⴰⴷⵙⵍⴰⵏ ⵏ ⵜⵏⴱⴰⴹⵜ ⵜⵉⵎⵉⵍⵖⵜ ⵏ ⵓⵙⵓⵔⴼ ⵉ ⵢⵉⵡⵍ ⵏ ⵜⵓⵎⵥⵉⵢⵉⵏ ⵏⵖ ⵓⵀⵓ. ⴳ ⵜⴳⵓⵔⵉ ⵏⵏⵙ ⵙ ⵓⵣⵎⵣⵣⵓ ⴰ ⵉⵏⵏⴰ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵎⵓⵔⴰⴷ ⴼⴰⵡⵣⵉ ⵉⵙ ⵍⴰⵏ ⵉⵏⵎⵢⴰⵡⴰⵙⵏ ⵉⵏⴰⵎⵓⵏⵏ ⵜⴰⵎⵍⴰⵍⵜ ⵜⴰⴳⵓⵎⴰⵏⵜ ⴳ ⵢⵉⵡⵙ ⵏ ⵉⵙⵏⴱⴹⴰⵢ ⴳ ⵡⴰⵙⴰⵢ ⵏ ⵜⵖⵜⴰⵙⵜ ⵢⵓⵖⴷⵏ ⴳ ⵜⵖⴰⵡⵙⵉⵡⵉⵏ ⵉⵥⵍⵉⵏ ⵏ ⵢⵉⵡⵍ ⵏ ⵜⵓⵎⵥⵉⵢⵉⵏ, ⵉⵎⵉⵍ ⴷⴰ ⵜⵜⴰⵡⵙ ⵜⵉⵔⵎⵉⵜ ⵏⵏⵙⵏ ⴳ ⵜⵉⴳⴳⵉ ⵏ ⵓⵔⵣⵣⵓ ⴰⵏⴱⴰⵔⴰⵣ ⵉ ⵓⵙⵎⵓⵏ ⵏ ⵜⵎⵓⵛⴰⵢ ⵜⵉⵏⴰⵎⵓⵏⵉⵏ-ⵜⵉⴷⵎⵙⴰⵏⵉⵏ ⵖⴼ ⵜⴰⵡⵊⴰ ⵏ ⵜⵓⵎⵥⵉⵢⵜ ⴷ ⵜⴰⵡⵊⴰ ⵏ ⵓⵎⵙⵉⴳⴳⵍ ⵏ ⵍⵉⵜⵉⵀⴰⵍ.

ⵜⴰⵙⵜⵔⴰⵜⵉⵊⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵣⵡⴰⴳ ⵜⵙⴽⴰ ⵖⴼ ⵜⵎⵢⴰⵎⴰⵥⵜ ⵜⴰⴳⴰⵎⵏⵜ ⴳⵔ ⵜⴰⵏⵏⴰⵢⵜ ⵏ ⵜⴳⵍⴷⵉⵜ ⴷ ⵡⴰⵀⵉⵍ ⵉⴳⵔⴰⵖⵍⴰⵏⵏ (ⵔⵉⵙⴰⵍⴰⵜ ⵍⵓⵎⵎⴰ)

ⵉⵙⵙⵏⵜⵎ ⵓⵎⵙⵇⴰⴷ ⴰⴳⵏⵙⴰⵙ ⴰⵎⵖⵍⴰⵍ ⵖⵓ ⵜⵎⵜⵜⵉⵏ ⵉⵎⵓⵏⵏ, ⵄⵓⵎⴰⵔ ⴳⵉⵍⴰⵍ, ⴰⵙⵉⵎⵡⴰⵙ ⴳ ⵏⵢⵓⵢⵓⵔⴽ, ⵉⵙ ⵜⵙⴽⴰ ⵜⵙⵜⵔⴰⵜⵉⵊⵉⵜ ⵍⵍⵉ ⵙ ⵉⵙⵡⵓⵔⵉ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵣⵡⴰⴳ ⵖⴼ ⵜⵎⵢⴰⵎⴰⵥⵜ ⵜⴰⴳⴰⵎⵏⵜ ⴰⴽⴷ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴷ ⵡⴰⵀⵉⵍ ⵉⴳⵔⴰⵖⵍⴰⵏⵏ ⴷ ⵓⵣⵡⴰⴳ. ⵉⵙⵙⵏⵜⵎ ⵄⵓⵎⴰⵔ ⵀⵉⵍⴰⵍ ⴳ ⵜⴳⵓⵔⵉ ⵏⵏⵙ ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵏ ⵓⴳⵔⴰⵡ ⴰⴳⵔⴰⵖⵍⴰⵏ ⴰⵎⵣⵡⴰⵔⵓ ⵏ ⵓⵣⵔⴰⵡ ⵏ ⵉⵣⵡⴰⴳⵏ ⵉⴳⵔⴰⵖⵍⴰⵏⵏ, ⵉⵙ ⵓⵔ ⵜⴳⵉ ⵜⵡⵓⵔⵉ ⵏ ⵜⵍⵎⵖⵔⵉⴱ “ ⵜⵉⵏ ⵢⴰⵏ ⵡⴰⴽⵓⴷ ⵏⵖ ⴷ ⵢⴰⵏ ⵓⵣⵎⵣⵣⵓ, ⵎⴰⵛⴰ ⴷⴰ ⵜⴽⵔⵔⴰⵙ ⵜⴰⵎⵢⴰⵎⴰⵥⵜ ⵜⴰⴳⴰⵎⵏⵜ ⴳⵔ ⵉⵎⵏⵣⴰⵢ ⴷ ⵉⵙⵏⵉⵎⴰⵍⵏ”; ⵉⵙⴼⴰⵡ ⵓⵎⵙⵇⴰⴷ ⵉⵙ ⵉⴳⵍⴰ ⵍⵃⴰⵍ “ ⵜⴰⵎⵢⴰⵎⴰⵥⵜ ⴳⵔ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵄⵎⵎⴰⴷ ⵡⵉⵙⵙ ⵚⴹⵉⵚ ⵍⵍⵉ ⵉⵙⵎⵓⵏⵏ ⵜⴰⵎⴰⵙⴰⵢⵜ ⴷ ⵜⵉⴼⴼⵓⴳⵏⴰ ⵍⵍⵉ ⵉⵍⵍⴰⵏ ⴳ ⵜⵙⵜⵔⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵓⵣⵡⴰⴳ ⵉⵙⴽⴰⵏ ⵖⴼ ⵜⵉⵏⴷⵉⵜⵉⵏ ⴰ ⵏⵉⵜ.”

ⴱⵏⵄⴱⴹⵍⵍⴰ : ⵓⵔ ⵜⴼⵔⵉⴳ ⵜⵏⴱⴰⴹⵜ ⵉ ⵉⵎⵖⵔⴰⴱⵉⵢⵏ ⵙⴳ ⵢⵉⵊⴳⵉⵍ ⵏ ⵡⴰⵜⵉⴳⴳⵏ ⵏ ⵉⵙⴽⵎⵓⴹⵏ (ⵍⵎⴰⵙⴰⴻ)

ⵉⵏⵏⴰ ⵏⴰⴱⵉⵍ ⴱⵏⵄⴱⴹⵍⵍⴰ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵎⵓⵍⵍⵉ ⵏ ⵡⴰⵍⴰⵢ ⴷ ⵜⵙⵔⵎⵓⵏⵜ, ⵉⵙ ⵓⵔ ⵜⵙⵔⵉⵙ ⵏⵜⵏⴱⴰⴹⵜ ⵉⵙⵍⴳⵏⵏ ⵓⵍⴰ ⵜⴽⵛⵎ ⵃⵎⴰ ⴰⴷ ⵜⵣⵓⴳⴳⵣ ⴰⵜⵉⴳⴳⵏ ⵏ ⵉⵙⴽⵎⵓⴹⵏ ⵍⵍⵉ ⵢⴰⵊⴳⵓⵍⵏ ⴽⵉⴳⴰⵏ ⴳ ⵉⴳⴰⴷⴰⵣⵏ ⵉⴳⵔⴰⵖⵍⴰⵏⵏ, ⴰⵛⴽⵓ “ⵎⵎⴽⵛⴰⵎⵏⵜ ⵜⵏⵓⴼⴰ ⵏ ⴰⵢⵜ ⵜⵎⵙⵙⵓⵔⵉⵏ ⵏ ⵉⵙⴽⵎⵓⴹⵏ ⴱⴰⵛ ⴰⴷ ⵙⴳⴰⴷⵉⵏ ⴰⵔⵔⴰⵣⵏ, ⵙⵢⴰⴼⵓⵏ ⵙⴳ ⵡⴰⴷⴷⴰ ⴰⵎⴰⴹⵍⴰⵏ.” ⵉⵙⵙⵓⵜⵔ ⵏⴰⴱⵉⵍ ⴱⵏⵄⴱⴹⵍⵍⴰ, ⵍⵍⵉ ⵉⴽⴽⴰⵏ ⴷⴰ ⵉⵙⴰⵡⴰⵍ ⴳ ⵓⵎⵙⴰⴳⴰⵔ ⴰⵏⵎⵓⵍⵍⵉ ⴳ ⴱⵏⵉ ⵎⵍⵍⴰⵍ, “ ⴰⵙⵍⵍⵡⵓ ⵏ ⵜⵙⵉⵎⴰⵏⵜ ⵏ ⵍⵎⵖⵔⵉⴱ ⴳ ⵜⴷⴰⵎⵙⴰ ⴷ ⵜⵥⴹⴰⵕⵜ”, ⵉⵙⵙⵏⵜⵎ ⵉⵙ ⵓⵔ ⵔⴰⴷ ⵢⵉⵎⵉ ⵎⴰⵢⴰⵏⵏ ⵖⴰⵙ ⵙ “ⵡⴰⵍⴰⵙ ⵏ ⵓⵙⵡⵓⵔⵉ ⵏ ⵓⵙⵔⵙ ⵍⴰⵙⴰⵎⵉⵔ ⵉ ⵓⵣⵓⵣⴷⴳ ⵏ ⵓⴱⵉⵟⵕⵓⵍ ⴷ ⵓⵣⵓⵣⵣⵔⵏ ⵏⵏⵙ ⵖⴼ ⵜⵎⵙⵙⵓⵔⵉⵏ ⵙ ⵡⴰⵜⵉⴳ ⴷ ⵢⵓⵙⴰⵏ ⵉⵖⵉⵢⵏ ⴰⵙ ⵉⵏⵎⵓⵔⴰⵏ ⵉⵎⵖⵔⴰⴱⵉⵢⵏ.”

ⵜⵉⵖⵜ ⵏ ⵜⵎⵔⴰⵡⵜ ⵏ ⵉⵏⵍⴰⴷⵏ ⵙ ⵢⵉⵔⵉⵏⵏ ⵏ ⵡⵓⵛⵛⵉ (ⵍⵎⴰⵙⴰⴻ)

ⵜⵜⵢⴰⵙⵎⵎⴰⵎⵏⵜ ⵜⵎⵔⴰⵡⵉⵏ ⵏ ⵉⵏⵍⵎⴰⴷⵏ ⵏ ⵢⵉⵔⵉⵏⵏ ⵏ ⵡⵓⵛⵛⵉ ⴷⴼⴼⵉⵔ ⵎⴰ ⵛⵛⴰⵏ ⵜⵉⵔⵎⵜ ⵏ ⵉⵎⴽⵍⵉ ⴰⵙⵍⵉⴷ ⵏ ⵓⵚⵉⴹⵢⴰⵙ, ⴳ ⵜⵉⵏⵎⵍ ⵜⴰⵎⵏⵣⵓⵜ ⵜⴰⵙⴳⴰ ⵏ ⵜⵉⵟⵡⴰⵏ, ⴰⵡⵉⵏ ⵜⵏ ⵙ ⴰⵙⴳⵏⴰⴼ ⴰⵙⴳⴰⵡⴰⵏ ⵏ ⵜⵉⵟⵡⴰⵏ ⵃⵎⴰ ⴰⴷ ⴰⵙⵏ ⵉⵜⵜⵓⴳ ⵓⵙⵎⴽⵍ. ⴳ ⵓⵢⵏⵏⴰ ⵜⵙⵎⴰⵏ ⵍⵎⴰⵙⴰⴻ ⵙⴳ ⵜⵉⴳⴳⴰ ⵉⵎⵙⴰⵙⴰⵏ ⵏ ⴽⵔⴰ ⵏ ⵉⵏⵖⵍⴰⴼⵏ ⵏ ⵉⵏⵍⵎⴰⴷⵏ, 42 ⵏ ⵓⵏⵍⵎⴰⴷ ⵉⵙⴽⴰⵔⵏ ⵜⵉⵖⵔⵉ ⵏⵏⵙⵏ ⴳ ⵜⵉⵏⵎⵍ ⴳ ⵜⴳⵔⴰⵡⵜ “ⵙⵙⵃⵜⵔⵉⵢⵢⵉⵏ” ⵙⵢⴰⴼⴰⵏ ⵏ ⵢⵉⵏⴽⴰ ⴰⵎⵎ ⵓⵏⴳⴰⵥ ⵏ ⵓⴷⵉⵙ ⴷ ⵓⵏⵎⵔⵉ ⵏ ⵢⵉⵖⴼ ⴷ ⵓⵖⵍⴰⵛⴰ ⵙⵔⵉⴷ ⵎⴰⴷ ⵛⵛⴰⵏ ⵜⵉⵔⵎⵜ ⵏ ⵉⵎⴽⵍⵉ ⴳ ⵜⵉⵏⵎⵍ,ⵉⵡⵡⴰ ⵙⵙⵉⵡⴹⵏ ⴰⵏⵖⵎⵉⵙ ⵉ ⵜⵏⴱⴰⴹⵜ ⵜⴰⴷⵖⵔⴰⵏⵜ ⵍⵍⵉ ⴷ ⵉⴷⴷⴰⵏ ⵙ ⴰⴷⵖⴰⵔ ⴰⴽⴷ ⵉⴼⵔⴷⵉⵙⵏ ⵏ ⵡⴰⵔⴰⵢ ⵓⵖⵔⵉⵎ, ⵍⵍⵉ ⵢⵓⵙⵉⵏ ⵉⵏⵍⵎⴰⴷⵏ ⵙ ⵜⵀⵉⵔⵉⵜⵉⵏ ⵙ ⵓⵙⴳⵏⴰⴼ ⴰⵙⴳⴰⵡⴰⵏ ⴰⴷ ⴰⵙⵏ ⵜⵜⵓⴳⵏ ⵉⵙⵎⴽⵉⵍ ⴷ ⵢⵓⵙⴰⵏ.

ⴰⵙⴱⵏⵏⴷ ⵏ ⵜⵣⵎⵎⴰⵔ ⵏ ⵍⵎⵖⵔⵉⴱ ⴳ ⵓⵎⵏⵏⵓⵖ ⵎⴳⴰⵍ ⵉⵙⴰⴼⴰⵔⵏ ⴷ ⵉⴼⴰⵔⵙⵏ ⵉⴷⵓⵙⴰⵏⵏ ⵉⴷⵖⵍⵏ ⴷ ⵡⴰⵔⵓⵙⵍⵉⴳⵏ (ⵙⵙⵃⵜⴰ ⵍⵎⵖⵔⵉⴱⵉⵢⴰ)

ⵜⴷⵔⴰ ⵜⵎⵀⵍⴰ ⵏ ⵉⵙⴰⴼⴰⵔⵏ ⴷ ⵜⵉⵏⵉⵙⴰⴼⴰⵔⵏ ⴳ ⵜⵎⴰⵡⴰⵙⵜ ⵏ ⵢⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ ⴳ ⵜⵉⵏⴰⵡⵜ ⵜⵉⵙⵙ ⴽⴽⵓⵥⵜ ⵏ ⵉⵙⴰⵔⵎⵏ ⵉⵎⴰⴷⴷⵓⴷⵏ ⵉ ⵜⵉⴹⴰⴼ ⵏ ⵉⵙⴰⴼⴰⵔⵏ, ⵍⵍⵉ ⵉⵜⵜⵓⵙⵏⵎⴰⵍⴰⵏ ⵉⵎⴰⵍⴰⵙⵙ ⵉⵣⵔⵉⵏ ⵖⵓⵔ ⵜⵎⵀⵍⴰ ⵏ ⵓⵕⵓⴱⴱⴰ ⵉ ⵜⵖⴰⵔⴰ ⵏ ⵉⵙⴰⴼⴰⵔⵏ ⴷ ⵓⵏⵀⵍⵍⴰ ⴰⴷⵓⵙⴰⵏ ⴳ ⵜⵎⴰⵥⵓⵏⵜ ⵏ ⵟⵟⴰⵍⵢⴰⵏ ⵕⵓⵎⴰ. ⵉⵙⵏⵖⵍ ⵓⵙⵉⵡⴹ ⵏ ⵜⵎⴰⵡⴰⵙⵜ ⵖⴼ ⵜⵙⵍⵎⴰⴷⵜ ⴱⵓⵛⵔⴰ ⵎⴷⴷⴰⵃ ⵜⴰⵏⵎⵀⴰⵍⵜ ⵏ ⵜⵎⵀⵍⴰ ⵏ ⵉⵙⴰⴼⴰⵜⵏ ⴷ ⵜⵉⵏⵉⵙⴰⴼⴰⵔⵏ ⵉⵙ ⵜⵏⵏⴰ ⵉⴽⵛⵎ ⵓⴷⵔⴰⵡ ⵏ ⵍⵎⵖⵔⵉⴱ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⴰ ⵜⴰⴳⵔⴰⵖⵍⴰⵏⵜ ⵍⵍⵉ ⵜⵙⵏⵎⴰⵍⴰ ⵙ ⵜⵎⴰⵜⴰⵔ “ ⴰⵎⵏⵏⵓⵖ ⵎⴳⴰⵍ ⵉⵙⴰⴼⴰⵔⵏ ⵉⴷⵖⵍⵏ ⴷ ⵡⵉⵢⵢⴰⴹ ⵉⵙⴼⴰⵔⵏ ⴰⵔⵓⵙⵍⵉⴳⵏ” ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵜⵏⴼⵔⵓⵜ ⵜⴰⵏⵙⴰⴼⴰⵔⵜ ⵏ ⵜⴳⵍⴷⵉⵜ ⴷ ⵓⵙⵏⴼⵍⵜ ⵏ ⵜⵉⵔⵎⵉⵜⵉⵏ, ⴷ ⵓⵙⴷⵓⵙ ⵏ ⵓⴷⵖⴰⵔ ⵉⵥⵍⵉⵏ ⵍⵍⵉ ⵉⴳⴰⵏ ⵜⵉⵏⵏⵙ ⵙ ⵜⵎⵏⵜⵉⵍⵜ ⵏ ⵜⴰⵏⵏⴰⵢⵜ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⵉⴷⴷⵖ ⵉⴳⴰ ⴰⵡⴰⵏⴽ ⴰⴼⵔⵉⵇⵉⵢ ⴰⴼⵔⴷⵉ ⵍⵍⵉ ⵢⴰⵎⵓⵏ ⴳ ⵓⵎⵙⴰⴳⴰⵔ ⴰ.

ⵎⴰⴱ23 ⵎⴰⵢⵢⵓ 2022